ສະພາຮັບຮອງຮ່າງກົດໝາຍວ່າດ້ວຍ “ ປ້າຍ ” ສະບັບສ້າງໃໝ່

ໃນວາລະດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ຄັ້ງວັນທີ 21 ມິຖຸນາ ນີ້, ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ, ໃນກອງປະຊຸມສະມາຊິກສະພາໄດ້ພ້ອມກັນປະກອບຄໍາຄິດເຫັນໃສ່ຮ່າງກົດໝາຍວ່າດ້ວຍປ້າຍ ສະບັບສ້າງໃໝ່, ເພື່ອເຮັດໃຫ້ຮ່າງກົດໝາຍດັ່ງກ່າວມີເນື້ອໃນຄົບຖ້ວນສົມບູນ ແລະ ຮັດກຸມແທດເໝາະກັບຕົວຈິງຂອງປະເທດ ແລະ ເຫັນດີຮັບຮອງເອົາກົດໝາຍສະບັບດັ່ງກ່າວດ້ວຍຄະແນນສຽງສ່ວນຫຼາຍ.

ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ໄດ້ສະເໜີຮ່າງກົດໝາຍດັ່ງກ່າວ ຕໍ່ກອງປະຊຸມວ່າ: ຮ່າງກົດໝາຍວ່າດ້ວຍ ປ້າຍ ປະກອບມີ XI ພາກ, 7 ໝວດ ແລະ 61 ມາດຕາ. ເນື້ອໃນພື້ນຖານຂອງກົດໝາຍສະບັບນີ້ ຍັງຮັກສາເນື້ອໃນ ໂຄງສ້າງພື້ນຖານທີ່ມີຢູ່ໃນດໍາລັດວ່າດ້ວຍປ້າຍ ໂດຍໄດ້ປັບປຸງ ແລະ ເພີ່ມເຕີມໃໝ່ບາງມາດຕາ ເພື່ອເຮັດໃຫ້ເນື້ອໃນຄົບຖ້ວນ, ກະທັດຮັດ ແລະ ຮັດກຸມ ເພີ່ມຄວາມສາມາດ ແລະ ຄວາມຄ່ອງຕົວໃນການຄຸ້ມຄອງ ກ່ຽວກັບປ້າຍໃຫ້ສົມບູນແບບຂຶ້ນ. ຜ່ານການຈັດຕັ້ງປະຕິບັດດໍາລັດວ່າດ້ວຍປ້າຍ ຜ່ານມາ ເຫັນວ່າມີບາງບັັນຫາ ແລະ ຄວາມຈໍາເປັນໃນການສ້າງກົດໝາຍ ສະບັບນີ້ ເພື່ອເປັນເຄື່ອງມືໃນການຄຸ້ມຄອງ, ຕິດຕາມ, ກວດກາ, ແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນການເຄື່ອນໄຫວກິດຈະການກ່ຽວກັບປ້າຍໃຫ້ເປັນເອກະພາບໃນທົ່ວປະເທດ; ເພື່ອຊຸກຍູ້ສົ່ງເສີມ ການພັດທະນາກ່ຽວກັບປ້າຍ ດ້ວຍນິຕິກໍາ ແລະ ສ້າງເງື່ອນໄຂ, ທັງເປັນການຊຸກຍູ້ສົ່ງເສີມທຸກພາກສ່ວນ ພ້ອມກັນຕັ້ງໜ້າເຂົ້າໃນການຄົ້ນຄວ້າ, ນໍາໃຊ້ວິທະຍາສາດ, ເຕັກໂນໂລຊີ ທີ່ທັນສະໄໝເຂົ້າໃນການກໍ່ສ້າງ, ອອກແບບ, ຜະລິດ, ຕິດຕັ້ງ ແລະ ພັດທະນາປ້າຍ ໃຫ້ມີຄວາມຖືກຕ້ອງເໝາະສົມໃນທຸກດ້ານ, ເພື່ອຕອບສະໜອງຂໍ້ມູນຂ່າວສານໃຫ້ສັງຄົມໄດ້ຮັບຮູ້ເຖິງຜະລິດຕະພັນ ແລະ ການບໍລິການດ້ວຍປ້າຍ ແລະ ເພື່ອຊຸກຍູ້ສົ່ງເສີນ ຄຸນຄ່າຜະລິດຕະພັນດ້ານພູມປັນຍາ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.

ພາຍຫຼັງກົດໝາຍສະບັບນີ້ ໄດ້ຖືກຮັບຮອງ ແລະ ປະກາດໃຊ້ ຈະເປັນເຄື່ອງມືໃຫ້ແກ່ຂະແໜງການ ແລະ ພາກສ່ວນກ່ຽວຂ້ອງໃນການຄຸ້ມຄອງ ທີ່ເປັນເອກະພາບໃນຂອບເຂດທົ່ວປະເທດ ດ້ານການເຄື່ອນໄຫວວຽກງານກ່ຽວກັບປ້າຍ ຕາມທິດສາມສ້າງ; ຈະເປັນບ່ອນອີງໃຫ້ເຈົ້າໜ້າທີ່ພາກລັດ ແລະ ຜູ້ປະກອບກິດຈະການກ່ຽວກັບປ້າຍ ໃນຂອບເຂດການເຄື່ອນໄຫວວຽກງານຂອງຕົນ ໃຫ້ຖືກຕ້ອງສອດຄ່ອງກັບກົດໝາຍ; ຈະເປັນການປະກອບສ່ວນສ້າງຄວາມເປັນລະບຽບຮຽບຮ້ອຍ ແລະ ຄວາມສວຍງາມໃຫ້ແກ່ຕົວເມືອງ ແລະ ຊົນນະບົດໃນປະເທດເຮົາ ແລະ ເປັນບ່ອນອີງໃນການຮ່ວມມືແລກປ່ຽນໃນການອອກແບບ, ຜະລິດ, ຕິດຕັ້ງ ດ້ວຍເຕັກໂນໂລຊີທີ່ທັນສະໄໝ ກັບບັນດາປະເທດພາກພື້ນ ແລະ ສາກົນ.