ຮອງປະທານປະເທດຫວຽດນາມເຂົ້າຢ້ຽມຂໍ່ານັບປະທານສະພາແຫ່ງຊາດລາວ

ໃນວັນທີ 20 ມິຖຸນານີ້, ທີ່ສະພາແຫ່ງຊາດລາວ, ສະຫາຍນາງ ດັ້ງ ຖິ ຫງ໋ອກ ທິ້ງ ກຳມະການຄະນະບໍລິຫານງານສູນກາງພັກກອມມູນິດຫວຽດນາມ, ຮອງປະທານປະເທດແຫ່ງ ສສ.ຫວຽດນາມ, ໄດ້ເຂົ້າຢ້ຽມຂໍ່ານັບ ສະຫາຍນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດລາວ ໃນໂອກາດທີ່ສະຫາຍພ້ອມຄະນະ ໄດ້ມາຢ້ຽມຢາມ ສປປ ລາວ ຢ່າງເປັນທາງການ ໃນແຕ່ວັນທີ 19-22 ມິຖຸນານີ້, ຕາມຄໍາເຊື້ອເຊີນຂອງສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ.

ໃນໂອກາດດັ່ງກ່າວ, ສະຫາຍນາງ ປານີ ຢາທໍ່ຕູ້ ໄດ້ສະແດງຄວາມຊົມເຊີຍ ແລະ ຕ້ອນຮັບອັນອົບອຸ່ນມາຍັງສະຫາຍ ນາງ ດັ້ງ ຖິ ຫງ໋ອກ ທິ້ງ ແລະ ຄະນະຜູ້ແທນແຫ່ງ ສສ.ຫວຽດນາມ ທີ່ໄດ້ມາຢ້ຽມຢາມ ສປປ ລາວ ຢ່າງເປັນທາງການເປັນຄັ້ງທໍາອິດ, ນັບຕັ້ງແຕ່ສະຫາຍໄດ້ດໍາລົງຕໍາແໜ່ງເປັນຮອງປະທານປະເທດແຫ່ງ ສສ.ຫວຽດນາມ ເປັນຕົ້ນມາ. ພ້ອມນີ້, ສະຫາຍ ນາງ ປານີ ຢາທໍ່ຕູ້ ຍັງໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດອັນສໍາຄັນ, ຮອບດ້ານທີ່ປະຊາຊົນຫວຽດນາມອ້າຍນ້ອງຍາດມາໄດ້ພາຍໃຕ້ການນໍາພາອັນຖືກຕ້ອງຂອງພັກກອມມູນິດຫວຽດນາມໃນໄລຍະຜ່ານມາ. ພ້ອມນີ້, ສະຫາຍນາງ ປານີ ຢາທໍ່ຕູ້ ກໍໄດ້ຕີລາຄາສູງຕໍ່ພັກ, ສະພາແຫ່ງຊາດ, ລັດຖະບານແຫ່ງ ສສ.ຫວຽດນາມ ກໍຄືສະຫາຍນາງ ດັ້ງ ຖິ ຫງ໋ອກ ທິ້ງ ທີ່ໄດ້ເອົາໃຈໃສ່ຕິດຕາມ, ຊຸກຍູ້, ຊີ້ນໍາບັນດາຫົວໜ່ວຍທຸລະກິດຂອງຫວຽດນາມ ທີ່ໄດ້ມາລົງທຶນຢູ່ ສປປ ລາວ ຢ່າງໃກ້ຊິດ, ເຮັດໃຫ້ການລົງທຶນຂອງຫວຽດນາມຢູ່ ສປປ ລາວ ມີປະສິດທິຜົນ, ຊຶ່ງໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ກໍຄືການເສີມຂະຫຍາຍສາຍພົວພັນອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ. ນອກນັ້ນສະຫາຍນາງ ປານີ ຢາທໍ່ຕູ້ ກໍໄດ້ຕີລາຄາສູງຕໍ່ການດໍາເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ 14 ຂອງ ສສ.ຫວຽດນາມ, ພ້ອມທັງໄດ້ແຈ້ງໂດຍຫຍໍ້ກ່ຽວກັບສະພາບການດໍາເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ 8 ຂອງ ສປປ ລາວ ທີ່ພວມດໍາເນີນດ້ວຍບັນຍາກາດອັນຟົດຟື້ນ.

ໃນການພົບປະ, ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງ ສອງປະເທດໃນໄລຍະຜ່ານມາ ກໍຄືການຢ້ຽມຢາມ ສປປ ລາວ ຂອງສະຫາຍນາງ ດັ້ງ ຖິ ຫງ໋ອກ ທິ້ງ ໃນຄັ້ງນີ້, ຊຶ່ງເປັນການເສີມຂະຫຍາຍໄມຕີຈິດມິດຕະພາບອັນດູດດື່ມແຫ່ງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ອ້າຍນ້ອງທີ່ມີມາແຕ່ດົນນານແລ້ວນັ້ນໃຫ້ແໜ້ນແຟ້ນຍິ່ງໆຂຶ້ນ. ທັງເປັນການກະຕຸກຊຸກຍູ້ການຮ່ວມມືລະຫວ່າງສອງປະເທດ ໃຫ້ເຂົ້າສູ່ລວງເລິກອີກບາດກ້າວໜຶ່ງ. ພ້ອມນີ້, ທັງສອງຝ່າຍຍັງໄດ້ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ ຈົ່ງໝັ້ນຄົງທະນົງແກ່ນຕະຫລອດໄປ.

ໃນໂອກາດດຽວກັນ, ສະຫາຍນາງ ດັ້ງ ຖິ ຫງ໋ອກ ທິ້ງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງສະຫາຍນາງ ປານີ ຢາທໍ່ຕູ້ ແລະ ຄະນະ, ພ້ອມທັງໄດ້ຕີລາຄາສູງຕໍ່ການພົວພັນຮ່ວມມືລະຫວ່າງສອງສະພາແຫ່ງຊາດລາວ-ຫວຽດນາມ ໃນໄລຍະຜ່ານມາ. ພ້ອມນັ້ນ, ສະຫາຍ ຍັງໄດ້ແຈ້ງໂດຍຫຍໍ້ກ່ຽວກັບຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ 14 ຂອງ ສສ.ຫວຽດນາມ, ຊຶ່ງບັນດາສະມາຊິກສະພາແຫ່ງຊາດຫວຽດນາມ ໄດ້ມີການປຶກສາຫາລືກັນຢ່າງກົງໄປກົງມາໃນຫຼາຍບັນຫາບົນພື້ນຖານການເຄົາລົບສິດທິຂັ້ນພື້ນຖານຂອງພົນລະເມືອງໃນການປາກເວົ້າ, ອັນເປັນການສ່ອງແສງໃຫ້ເຫັນເຖິງຄວາມເອົາໃຈໃສ່ຕິດຕາມກວດສອບຢ່າງໃກ້ຊິດຂອງບັນດາສະມາຊິກສະພາແຫ່ງຊາດ. ພ້ອມດຽວກັນນີ້, ກໍໄດ້ອວຍພອນໃຫ້ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ 8 ຂອງ ສປປ ລາວ ທີ່ກໍາລັງດໍາເນີນຢູ່ນີ້ໃຫ້ໄດ້ຮັບຜົນສໍາເລັດຢ່າງຈົບງາມ.

ໃນຕອນທ້າຍ, ສະຫາຍນາງ ປານີ ຢາທໍ່ຕູ້ ໄດ້ອວຍພອນໃຫ້ສະຫາຍ ນາງ ດັ້ງ ຖິ ຫງ໋ອກ ທິ້ງ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ສືບຕໍ່ນໍາພາປະເທດຊາດກ້າວຂຶ້ນຕາມເປົ້າໝາຍທີ່ວາງໄວ້ ແລະ ໄດ້ຮັບຜົນສໍາເລັດຢ່າງຈົບງາມໃນການມາຢ້ຽມຢາມ ສປປ ລາວ ໃນຄັ້ງນີ້, ສະແດງຄວາມຂອບໃຈຕໍ່ພັກ, ລັດຖະບານ ກໍຄື ສະພາແຫ່ງຊາດຫວຽດນາມ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອແກ່ສະພາແຫ່ງຊາດລາວ ໂດຍດີຕະຫລອດມາ, ພິເສດແມ່ນໂຄງການກໍ່ສ້າງຫໍສະພາແຫ່ງຊາດ. ພ້ອມນີ້, ສະຫາຍນາງ ປານີ ຢາທໍ່ຕູ້ ກໍໄດ້ຝາກຄໍາຢື້ຢາມຖາມຂ່າວ ເຖິງການນໍາຫວຽດນາມ, ໂດຍສະເພາະສະຫາຍປະທານສະພາແຫ່ງຊາດ ຫວງຽນ ທິ ກິມ ເງິນ.

ໃນວັນດຽວກັນ, ສະຫາຍ ນາງ ດັ້ງ ຖິ ຫງ໋ອກ ທິ້ງ ພ້ອມດ້ວຍຄະນະ ຍັງໄດ້ຢ້ຽມຢາມສູນກາງສະຫະພັນແມ່ຍິງລາວ ແລະ ພົບປະກັບສະຫາຍນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ, ຢ້ຽມຢາມ ໂຮງຮຽນພອນສະຫວັນ, ຊຶ່ງຖືກຕ້ອນຮັບໂດຍທ່ານ ສົມສີ ຍໍພັນໄຊ ວ່າການອະທິການບໍດີມະຫາວິທະຍາໄລແຫ່ງຊາດ, ພ້ອມດ້ວຍຜູ້ອໍານວຍການ ແລະ ບັນດາຄູອາຈານໂຮງຮຽນພອນສະຫວັນ. ນອກນັ້ນ, ຍັງໄດ້ວາງພວງມາລາ ຢູ່ອານຸສາວະລີນັກຮົບນິລະນາມ ແລະ ຢ້ຽມຊົມພະທາດຫລວງວຽງຈັນ.