ກອງປະຊຸມປະຈຳໄຕມາດ 2 ຂອງແຜນ ງານລາວ/030 ສຳລັບ 4 ແຂວງເປົ້າໝາຍ
ກອງປະຊຸມປະຈຳໄຕມາດ 2 ຂອງແຜນງານລາວ/030 ສຳລັບ 4 ແຂວງເປົ້າໝາຍ ກອງປະຊຸມປະຈຳໄຕມາດ 2 ຂອງແຜນງານລາວ/030 ສຳລັບ 4 ແຂວງເປົ້າໝາຍມີ: ບໍ່ແກ້ວ, ແຂວງວຽງຈັນ, ບໍລິຄຳໄຊ ແລະ ຄຳມ່ວນ, ໄດ້ຈັດຂຶ້ນໃນວັນທີ 20 ມິຖຸນານີ້ທີ່ກະຊວງແຜນການ ແລະ ການລົງທຶນ ເພື່ອລາຍງານຄວາມຄືບໜ້າ ແລະ ປຶກສາຫາລືກ່ຽວກັບສິ່ງທ້າທ້າຍ ແລະ ຂໍ້ຫຍຸ້ງຍາກທີ່ທ່ວງດຶງການຈັດຕັ້ງປະຕິບັດ ກໍຄືການກຳນົດແຜນໃນຕໍ່ໜ້າ, ໂດຍການເປັນປະທານຂອງທ່ານນາງ ພອນວັນ ອຸທະວົງ ຫົວໜ້າກົມແຜນການກະຊວງແຜນການ ແລະ ການລົງທຶນ, ມີທ່ານ ປີເຕີ ເຄີດແຮນເຊັນ ທີ່ປຶກສາອາວຸໂສຂອງອົງການ LuxDev ພ້ອມດ້ວຍພາກສ່ວນກ່ຽວຂ້ອງຕ່າງໆເຂົ້າຮ່ວມ.
ໃນໂອກາດນີ້, ທ່ານນາງ ພອນວັນ ອຸທະວົງ ໃຫ້ຮູ້ວ່າ: ການຈັດຕັ້ງປະຕິບັດ ແຜນງານລາວ/030 ມີໄລຍະເວລາ 5 ປີ, ມີມູນຄ່າ 23 ລ້ານເອີໂຣ, ໂດຍມີເປົ້າໝາຍຫລຸດຜ່ອນຄວາມທຸກຍາກ, ການປັບປຸງໂພຊະນາການ ແລະ ການຄຸ້ມຄອງທີ່ດິນ, ອັນເປັນເປົ້າໝາຍສຳຄັນໃນແຜນການພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII (2016-2020), ເຊິ່ງແນ່ໃສ່ 3 ເປົ້າໝາຍຫລັກໃນການພັດທະນາຄື: ສ້າງຄວາມເຂັ້ມແຂງພາກລັດ, ການພັດທະນາທີ່ຖືເອົາຊຸມຊົນເປັນຫລັກ ແລະ ຄວາມສາມາດເຂົ້າເຖິງໂຄງລ່າງນຖານຂອງບັນດາບ້ານເປົ້າໝາຍ, ຄາດວ່າມີຜູ້ໄດ້ຮັບຜົນປະໂຫຍດຈາກໂຄງການປະມານ 150 ພັນຄົນໃນ 230 ບ້ານເປົ້າໝາຍຂອງ 4 ແຂວງ.
ສຳລັບການຈັດຕັ້ງປະຕິບັດ 6 ເດືອນຕົ້ນປີນີ້, ໄດ້ສຳເລັດການສຳຫລວດເກັບກຳຂໍ້ມູນເບື້ອງຕົ້ນບ້ານເປົ້າໝາຍ 230 ບ້ານ, ຄຽງຄູ່ກັບການແນະນຳໃຫ້ຄຳປຶກສາ ແລະ ວາງແຜນເບື້ອງຕົ້ນກ່ຽວກັບກິດຈະກຳທີ່ຕິດພັນກັບກອງທຶນພັດທະນາບ້ານໄດ້ປະມານ 90% ຂອງຈຳນວນບ້ານເປົ້າໝາຍ, ສຳເລັດການເຊັນສັນຍາເພື່ອເສີມສ້າງຂີດຄວາມສາມາດ, ສ້າງຄວາມເຂັ້ມແຂງ ແລະ ແບ່ງຄວາມຮັບຜິດຊອບໃນຂັ້ນບ້ານ. ສຳລັບວຽກງານກໍ່ສ້າງພື້ນຖານໂຄງລ່າງແມ່ນໄດ້ສຳເລັດການວາງແຜນ, ອອກແບບ, ປະມູນ ແລະ ເຊັນສັນຍາຈຳນວນ 58 ໂຄງການ, ເຊິ່ງເລີ່ມກໍ່ສ້າງແຕ່ເດືອນມິຖຸນາຫາເດືອນທັນວາ 2018. ນອກນີ້, ໃນ ລະດູແລ້ງປີ 2018-2019 ຄາດວ່າຈະດຳເນີນການກໍ່ສ້າງເພີ່ມອີກ 94 ໂຄງການ.
