ທ່ານ ກິມ ຈ໋ອງອຸນ ຢ້ຽມຢາມຈີນຮອບ 3 ຫາລືເລື່ອງປົດນິວເຄຼຍຢູ່ແຫລມເກົາຫລີ
ສື່ທາງການ ສປປ ເກົາຫລີ ລາຍງານວ່າ: ທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ແລະ ປະທານປະເທດ ສີ ຈິ້ນຜິງ ຂອງຈີນ ເຫັນພ້ອມກັນໃນບັນຫາຕ່າງໆ ລວມທັງເລື່ອງປົດນິວເຄຼຍຢູ່ແຫລມເກົາຫລີ ໃນໄລຍະທີ່ທ່ານ ກິມ ຈ໋ອງອຸນ ເດີນທາງໄປພົບປະຫາລື ໃນວັນທີ 19 ມິຖຸນານີ້.
ສຳນັກຂ່າວ KCNA ລາຍງານວ່າ: ຜູ້ນຳທັງສອງໄດ້ຕີລາຄາຜົນສຳເລັດຂອງກອງປະຊຸມສຸດຍອດຄັ້ງປະຫວັດສາດ ລະຫວ່າງທ່ານ ກິມ ຈ໋ອງອຸນ ກັບປະທານາທິບໍດີ ໂດນັນ ທຣຳ ຂອງອາເມລິກາ ທີ່ສິງກະໂປ ໃນອາທິດກ່ອນ ແລະ ແລກປ່ຽນທັດສະນະເລື່ອງທາງເລືອກໃນການປົດນິວເຄຼຍ. ຜູ້ນຳ ສປປ ເກົາຫລີ ໄດ້ຮັບປາກວ່າຈະຮ່ວມມືກັບທາງການຈີນສ້າງສັນຕິພາບທີ່ແທ້ຈິງໃນຂະບວນການເປີດອະນາຄົດໃໝ່ຢູ່ແຫລມເກົາຫລີ.
ຜູ້ນຳ ສປປ ເກົາຫລີ ເດີນທາງໄປຈີນເປັນຄັ້ງທີ 3 ແລ້ວໃນປີນີ້ ພາຍຫລັງໄປຄັ້ງທຳອິດໃນເດືອນມີນາ ແລະ ເປັນຄັ້ງທຳອິດນັບແຕ່ຂຶ້ນເປັນຜູ້ນຳປະເທດໃນທ້າຍປີ 2011.
