ປີນີ້ທົ່ວປະເທດມີຜູ້ຕິດເຊື້ອໄຂ້ຍຸງລາຍແລ້ວພັນກວ່າຄົນ ແລະ ເສຍຊີວິດ 2 ຄົນ
ກະຊວງສາທາລະນະສຸກ, ໄດ້ລາຍງານໃຫ້ຮູ້ໃນພິທີສະເຫລີມສະຫລອງວັນຕ້ານໄຂ້ຍຸງລາຍອາຊຽນ ແລະ ວັນສັບປະດາປ່ອຍປາຫາງນົກຍຸງຄົບຮອບ 5 ປີທີ່ຈັດຂຶ້ນເມື່ອບໍ່ດົນມານີ້ວ່າ: ໃນປິີ 2018 ນີ້, ກະຊວງສາທາລະນະສຸກໄດ້ຮັບລາຍງານສະຖິຕິການຕິດເຊື້ອພະຍາດໄຂ້ຍຸງລາຍມາຮອດວັນທີ 13 ມິຖຸນາຜ່ານມາວ່າມີຈໍານວນ 1.089 ຄົນ ແລະ ເສຍຊີວິດແລ້ວ 2 ຄົນ. ໃນນັ້ນແຂວງຈຳປາສັກແມ່ນຫລາຍກວ່າໝູ່ມີຜູ້ຕິດເຊື້ອ 164 ຄົນ. ສຳລັບນະຄອນຫລວງວຽງຈັນມີ 102 ຄົນແຕ່ບໍ່ມີຜູ້ເສຍຊີວິດ, ໃນນັ້ນເມືອງໄຊທານີພົບຫລາຍກວ່າໝູ່, ໂດຍພະຍາດໄຂ້ຍຸງລາຍເກີດຈາກເຊື້ອຈຸລະໂລກ, ມີພາຫະນຳເຊື້ອແມ່ນຍຸງລາຍ ແລະ ອາຊຽນໄດ້ກຳນົດເອົາວັນທີ 15 ມິຖຸນາຂອງທຸກໆປີເປັນວັນຕ້ານໄຂ້ຍຸງລາຍອາຊຽນ ເພຶື່ອປຸກລະດົມປະຊາຊົນໃນຂົງເຂດອາຊຽນໃຫ້ມີສ່ວນຮ່ວມໃນການປ້ອງກັນ ແລະ ຄວບຄຸມພະຍາດໄຂ້ຍຸງລາຍ, ເພື່ອເປັນການຫລຸດຜ່ອນອັດຕາການເຈັບເປັນ ແລະ ເສຍຊີວິດຈາກພະຍາດໄຂ້ຍຸງລາຍ, ທັງເປັນການສ້າງຂະບວນການຮ່ວມກັນໃນການປ້ອງກັນ ແລະ ຄວບຄຸມພາຫະນຳເຊື້ອພະຍາດໄຂ້ຍຸງດ້ວຍການລ້ຽງປາຫາງນົກຍຸງເພື່ອຕັດຕ່ອງໂສ້ການຈໍລະຈອນຂອງພາຫະນຳເຊື້ອພະຍາດໄຂ້ຍຸງລາຍ.
ເຂົ້າຮ່ວມພິທີດັ່ງກ່າວ, ມີທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫລວງວຽງຈັນ, ຜູ້ຊີ້ນໍາວຽກ ງານວັດທະນະທຳ-ສັງຄົມຂັ້ນນະຄອນຫລວງ ແລະ ອາສາສະໝັກຂັ້ນບ້ານ, ພ້ອມດ້ວຍພະນັກງານກ່ຽວຂ້ອງເຂົ້າຮ່ວມເປັນຈໍານວນຫລາຍ.
