ອາລີບາບາເປີດສຳນັກງານ ແຫ່ງທຳອິດໃນອາຊຽນ
ສຳນັກງານແຫ່ງໃໝ່ໃນມາເລເຊຍຂອງ ອາລີບາບາ ກຣຸບ ເຊິ່ງຖືເປັນສຳນັກງານແຫ່ງທຳອິດໃນອາຊີຕາເວັນອອກສຽງໃຕ້ ໄດ້ເປີດດຳເນີນການໃນວັນທີ 17 ມິຖຸນານີ້. ຊີ້ໃຫ້ເຫັນເຖິງການຂະຫຍາຍທຸລະກິດຢ່າງຕໍ່ເນື່ອງຂອງບໍລິສັດໃນພາກພື້ນອາຊີຕາເວັນອອກສຽງໃຕ້.
ໂດຍ ອາລີບາບາ ໄດ້ສ້າງ eHub ນາໆຊາດແຫ່ງທຳອິດຂຶ້ນ ພາຍໃຕ້ໂຄງການ Electronic World Trade Platform (eWTP) initiative ໂດຍຕັ້ງເປົ້າຈະໃຫ້ອາຄານສຳນັກງານແຫ່ງນີ້ຕອບສະໜອງຄວາມຕ້ອງການຂອງຜູ້ປະກອບການ SMEs ແລະ ຊ່ວຍລັດຖະບານມາເລເຊຍໃນການຝຶກອົບຮົມຜູ້ມີຄວາມສາມາດຮຸ່ນໃໝ່.
ທ່ານ ແຈ໊ກ ມ່າ ຜູ້ສ້າງຕັ້ງ ອາລີບາບາ ແລະ ປະທານບໍລິຫານ ກ່າວກັບສຳນັກຂ່າວຊິນຮົວວ່າ: ອາລີບາບາ ມີແຜນຈະເນັ້ນດຳເນີນການໃຫ້ເລິກເຊິ່ງຍິ່ງຂຶ້ນໃນມາເລເຊຍ ແລະ ມີຂະບວນການທີ່ຈະຈ້າງວຽກປະຊາຊົນໃນພື້ນທີ່ ເຊິ່ງອາດຈະຫລາຍກວ່າ 1.000 ຄົນໃນອະນາຄົດ ໂດຍທ່ານກ່າວວ່າ: ການລົງທຶນຂອງ ອາລີບາບາ ທີ່ມີມູນຄ່າສູງກວ່າ 100 ລ້ານໂດລາສະຫະລັດ.
ທັງນີ້, ອາລີບາບາ ຂະຫຍາຍທຸລະກິດໃນມາເລເຊຍນອກເໜືອຈາກ eWTP ໂດຍໄດ້ສ້າງສູນຂໍ້ມູນຄອມພິວເຕີຄລາວ, ໃຫ້ບໍລິການຈ່າຍເງິນທາງສະມາດໂຟນ Alipay ແລະ ໄດ້ຝຶກອົບຮົມບຸກຄົນທົ່ວໄປນັບພັນຄົນ ລວມທັງຜູ້ປະກອບການ ແລະ ຜູ້ຊ່ຽວຊານລະບົບຄລາວ ພາຍໃຕ້ໂຄງການທີ່ຫລວງຫລາຍ.
ກ່ອນໜ້າພິທີເປີດ, ທ່ານ ແຈ໊ກ ມ່າ ສະແດງຄວາມຫວັງທີ່ຈະໄດ້ເຂົ້າພົບນາຍົກລັດຖະມົນຕີ ມະຫາທີ ໂມຮຳເໝັດ ເຊິ່ງມີວິໄສທັດທີ່ຈະເຮັດໃຫ້ມາເລເຊຍເປັນສູນກາງດ້ານເຕັກໂນໂລຊີ ແລະ ຂໍ້ມູນຂ່າວສານ ນັບແຕ່ 20 ປີກ່ອນ ເນື່ອງຈາກທັງສອງຄືກັນຫລາຍຢ່າງເຊັ່ນ: ການເຊື່ອຕໍ່ພະລັງຂອງອິນເຕີເນັດ, ເຕັກໂນໂລຊີ, ຄົນຮຸ່ນໃໝ່ ລວມທັງສົນໃຈຈະໃຊ້ເຕັກໂນໂລຊີເພີ່ມຄວາມແຂງແຮງໃຫ້ກະສິກຳໃນຊົນນະບົດ.
