ເບລຢ້ຽມ ຖະຫລົ່ມ ປານາມາ ແບບຂາດລອຍ
ທີມຊາດເບລຢ້ຽມ ທີມອັນດັບທີ 3 ຂອງເອີຣົບ ໄລ່ຖະຫລົ່ມ ທີມຊາດປານາມາ ທີມອັນດັບທີ 55 ຂອງໂລກໄດ້ແບບຂາດລອຍ 3-0 ໃນວັນທີ 18 ມິຖຸນາຜ່ານມານີ້ ຂອງການແຂ່ງຂັນບານໂລກ 2018 ທີ່ປະເທດຣັດເຊຍ.
ທີມຊາດເບລຢ້ຽມ ລົງສະໜາມນັດທໍາອິດຂອງກຸ່ມ ຈີ ໂດຍໃຊ້ລະບົບການຫລິ້ນ 3-4-3, ສ່ວນທີມຊາດປານາມາ ໃຊ້ລະບົບການຫລິ້ນ 4-1-4-1. ການແຂ່ງຂັນເລີ່ມຂຶ້ນ ເຊິ່ງເປັນທີມຊາດເບລຢ້ຽມ ເປັນຝ່າຍຄອງບານຫລາຍກວ່າ ພ້ອມທັງມີລຸ້ນປະຕູຈາກ ລູກາກູ ແລະ ອາຊາ ແຕ່ບໍ່ສາມາດເຮັດໄດ້. ຕໍ່ມາອີກ 20 ນາທີ ອາຊາ ລາກບານຈາກທາງປິກຂວາ ແລ້ວສົ່ງຕໍ່ໃຫ້ ລູກາກູ ແຕ່ກໍບໍ່ສາມາດຍິງປະຕູໄດ້. ຫລັງຈາກທີມຊາດປານາມາ ຕັ້ງເກມໄດ້ໂດຍເລີ່ມການຕອບໂຕ້ຂຶ້ນມາກົດດັນ ທີມຊາດເບລຢ້ຽມ ແຕ່ບໍ່ສາມາດເຈາະເຂົ້າຈຸດເຂດໂທດໄດ້. ຂະນະທີ່ ອາຊາ ຍັງພະຍາຍາມໃຊ້ຄວາມສາມາດສະເພາະຕົວລ້ຽງບານໃສ່ທາງທີມຊາດປານາມາຈັງຫວະສຸດທ້າຍຍັງບໍ່ສາມາດດີພໍ ຈົບເກມເຄິ່ງເວລາທໍາອິດສະເໝີກັນ 0-0; ເຂົ້າເຄິ່ງເວລາທີ 2 ທີມຊາດເບລຢ້ຽມ ໄດ້ປະຕູຂຶ້ນນໍາຈາກການຍິງຂອງ ດຣີສ ເມີເທນ ເປັນ 1-0 ແລະ ນາທີ 68 ທີມຊາດເບລຢ້ຽມ ຍິງປະຕູນໍາຫ່າງເປັນ 2-0 ຈາກລູກຕໍາຫົວຂອງ ລູກາກູ ກອງໜ້າສະໂມສອນ ແມນເຊັສເຕີ ຢູໄນເຕັດ, ຖັດມາອີກ 6 ນາທີ ລູກາກູ ສາມາດຍິງປະຕູໃຫ້ທີມນໍາຫ່າງເປັນ 3-0; ຈົບເກມ ທີມຊາດເບລຢ້ຽມ ສາມາດເກັບ 3 ຄະແນນ.
ຂະນະທີ່ ທີມຊາດອັງກິດ ສາມາດເກັບ 3 ຄະແນນຈາກ ຕູນີເຊຍ ໂດຍເລີ່ມການແຂ່ງຂັນ ທີມຊາດອັງກິດ ເປັນຝ່າຍທີ່ຫລິ້ນໄດ້ດີຫລາຍກວ່າ ແລະ ມີຈັງຫວະທີ່ຈະໄດ້ປະຕູຈາກການເຕະມຸມຂອງ ແອຊລີ ເຂົ້າໄປໜ້າປະຕູກ່ອນທີ່ຜູ້ຮັກສາປະຕູ ທີມຊາດຕູນີເຊຍ ຈະປັດອອກຈາກເສັ້ນປະຕູ ແຕ່ບານມາເຂົ້າທາງ ແຮຣີເຄນ ເຂົ້າແບບງ່າຍໆ ເຮັດໃຫ້ ທີມຊາດອັງກິດ ໄດ້ປະຕູຂຶ້ນນໍາ 1-0 ແລະ ນາທີຕໍ່ມາ ຍ້ອນຄວາມຜິດພາດຂອງ ໄຄ ວໍເກີ ກອງຫລັງຂອງອັງກິດ ທີ່ເຈຕະນາດຶງນັກເຕະທີມຊາດຕູນີເຊຍໃນຂອບເຂດໂທດ ເຮັດໃຫ້ຖືກກໍາມະການເປົ່າເປັນຈຸດໂທດ ຈົນໃຫ້ເສຍປະຕູ ຈົບເຄິ່ງເວລາທໍາອິດ ສະເໝີກັນ 1-1; ອັງກິດໄດ້ປະຕູໄຊໃນເຄິ່ງເວລາທີ 2 ຈາກລູກຕໍາຫົວຂອງ ແຮຣີເຄນ ຈົບເກມ ທີມຊາດອັງກິດ ເກັບໄດ້ 3 ຄະແນນ.
ສໍາລັບກຸ່ມ ເອັຟ ສະວີເດັນ ເກັບ 3 ຄະແນນ ຈາກ ສ ເກົາຫລີ ເຊິ່ງຄູ່ນີ້ ສະວີເດັນ ເປັນຝ່າຍທີ່ມີຄວາມແຂງແກ່ນ ແລະ ຮູບຮ່າງທີ່ໃຫຍ່ກວ່າ ສ ເກົາຫລີ ໃນເຄິ່ງເວລາທໍາອິດເກືອບໄດ້ຫລາຍປະຕູແຕ່ບໍ່ສໍາເລັດສະເໝີ 0-0 ແຕ່ພໍເຂົ້າເຄິ່ງເວລາທີ 2 ໃນນາທີ 62 ຄີມມິນວູ ກອງຫລັງທີມຊາດ ສ ເກົາຫລີ ໄປສຽບ ວິດເຕີ ຄລາເອສັນ ລົ້ມລົງໃນຂອບເຂດໂທດ ກ່ອນກໍາມະການຈະຊີ້ໃຫ້ເປັນຈຸດໂທດໃຫ້ແກ່ ສະວີເດນ ເຊິ່ງ ອັນເດຣີ ກຣັນຄວິສ ຫົວໜ້າທີມສະວີເດັນເປັນຄົນຍິງປະຕູໃຫ້ ສະວີເດນ ຂຶ້ນນໍາ ຈົບເກມ ທີມຊາດສະວີເດນ ເອົາຊະນະ ທີມຊາດ ສ ເກົາຫລີ 1-0.
