ເຜີຍແຜນເດັດຜູ້ຈັດການທີມເມັກຊິໂກ ປະເດີມສະໜາມຊະນະນັດທໍາອິດ

ຮວນຄຣາລອ ໂອໂຊຣິໂອ ຜູ້ຈັດການທີມ ເມັກຊິໂກ ໄດ້ໃຫ້ສໍາພາດພາຍຫລັງເອົາຊະນະ ທີມຊາດເຢຍລະມັນ 1-0 ໃນວັນທີ 17 ມິຖຸນາ 2018 ຜ່ານມາ ຂອງການແຂ່ງຂັນບານໂລກ 2018 ທີ່ປະເທດຣັດເຊຍວ່າ: ການລົງສະໜາມຄັ້ງນີ້ ຕົນເອງໄດ້ວາງແຜນເພື່ອຮັບມືກັບຄູ່ຕໍ່ສູ້ຢ່າງເຕັມທີ ໂດຍຈັດປີກຄວາມໄວຍືນທັງ 2 ຝັ່ງ ໂດຍສະເພາະ ເອີຍຣວິ່ງ ໂລຊາໂນ່ ເຊິ່ງເປັນຄົນທີ່ມີຄວາມໄວທີ່ສຸດໃນທີມ ແລະ ເປັນຜູ້ຍິງປະຕູໄຊໃຫ້ກັບທີມ.

ຜູ້ຈັດການທີມຍັງເວົ້າວ່າ: ຊ່ວງເວລາທໍາອິດເນັ້ນໃຫ້ລູກທີມຕັ້ງຮັບຢ່າງເປັນລະບົບ ແລ້ວຖ້າຈັງຫວະສວນກັບ ເຊິ່ງທຸກຄົນຫລິ້ນເກມຮັບໄດ້ຢ່າງຄ່ອງແຄ້ວ ແລະ ມີປະສິດທິພາບ, ສາມາດຄຸ້ມເກມໄດ້ເໜືອກວ່າທີມຊາດ ເຢຍລະມັນ ຢ່າງຊັດເຈນ. ສ່ວນເຄິ່ງເວລາທີ 2 ກໍພ້ອມຮັບມື ເພາະວ່າຈະຖືກ ເຢຍລະມັນ ເປີດເກມບຸກເຂົ້າໃສ່ຢ່າງແນ່ນອນ ໂດຍການວາງລະບົບ ກອງກາງ 4 ຄົນ ແລະ ກອງໜ້າ 3 ຄົນ ຈົນຈະຍິງປະຕູທີ 2 ໄດ້ ແຕ່ກໍບໍ່ສາມາດເຮັດໄດ້ ຈົບເກມ ທີມຊາດເມັກຊິໂກ ເກັບ 3 ຄະແນນໄດ້ ໃນນັດທໍາອິດ.