ສ ເກົາຫລີ – ອາເມລິກາ ກຽມປະກາດຢຸດ ຊ້ອມຮົບທາງທະຫານໃນອາທິດນີ້
ສຳນັກຂ່າວຍອນຮັບຂອງ ສ ເກົາຫລີ ລາຍງານວ່າ: ສ ເກົາຫລີ ແລະ ອາເມລິກາ ກຽມປະກາດຢຸດປະຕິບັດການຊ້ອມຮົບທາງທະຫານຄັ້ງໃຫຍ່ໃນອາທິດນີ້ ໂດຍຈະຮື້ຟື້ນການຊ້ອມຮົບ ຖ້າ ສປປ ເກົາຫລີ ບໍ່ຍອມປະຕິບັດຕາມສັນຍາປົດອາວຸດນິວເຄຼຍ.
ສື່ ສ ເກົາຫລີ ລາຍງານອ້າງແຫລ່ງຂ່າວລັດຖະບານວ່າ: ການຢຸດປະຕິບັດການຊ້ອມຮົບຮ່ວມຈະສົ່ງຜົນຕໍ່ການຊ້ອມຮົບຂະໜາດໃຫຍ່ນັ້ນ, ແຕ່ຈະບໍ່ກະທົບການຝຶກຊ້ອມທາງທະຫານຕາມປົກກະຕິ. ປະທານາທິບໍດີ ໂດນັນ ທຣຳ ຂອງອາເມລິກາ ກ່າວສະແດງຄວາມປະຫລາດໃຈຕໍ່ເຈົ້າໜ້າທີ່ ສ ເກົາຫລີ ແລະ ອາເມລິກາວ່າ: ທ່ານສັນຍາວ່າຈະຢຸດການຊ້ອມຮົບຮ່ວມພາຍຫລັງກອງປະຊຸມສຸດຍອດກັບທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ທີ່ສິງກະໂປ ໃນອາທິດຜ່ານມາ ເຊິ່ງເຈົ້າໜ້າທີ່ ສ ເກົາຫລີ ຍັງບໍ່ຮູ້ແນ່ນອນວ່າໝາຍຄວາມເຖິງການຊ້ອມຮົບຮ່ວມໃນດ້ານໃດແດ່ ແລະ ປະທານາທິບໍດີ ມຸນ ແຈອິນ ຂອງ ສ ເກົາຫລີ ໄດ້ຂໍໃຫ້ເຈົ້າໜ້າທີ່ໃຫ້ການຮ່ວມມືກັບອາເມລິກາ. ທັງນີ້ ທະຫານອາເມລິກາປະມານ 28.500 ຄົນປະຈຳການຢູ່ ສ ເກົາຫລີ ເຊິ່ງຕໍ່ເນື່ອງມາແຕ່ສະໄໝສົງຄາມເກົາຫລີສິ້ນສຸດລົງໃນປີ 1953.
