ທົບທວນຄືນການແກ້ໄຂຜົນກະທົບຈາກໂຄງການກໍ່ສ້າງທາງລົດໄຟລາວ-ຈິນ.
ໃນທ້າຍອາທິດຜ່ານມານີ້, ກະຊວງໂຍທາທິການ ແລະ ຂົນສົ່ງ (ຍທຂ) ໄດ້ຈັດກອງປະຊຸມທົບທວນການແກ້ໄຂຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ, ໂດຍການເປັນປະທານຂອງທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງ ຍທຂ, ຫົວໜ້າຄະນະຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ, ພ້ອມດ້ວຍພາກສ່ວນກ່ຽວຂ້ອງຕ່າງໆເຂົ້າຮ່ວມ, ຊຶ່ງໄດ້ຫາລື
ກັນຫລາຍບັນຫາຄື: ຄູ່ມືການເບີກຈ່າຍຄ່າຊົດເຊີຍສິ່ງກີດຂວາງໂຄງການກໍ່ສ້າງທາງລົດໄຟລາວ-ຈີນ, ການແກ້ໄຂບັນຫາ ແລະ ຜົນກະທົບທີ່ຜ່ານມາ, ກວດກາຄືນການຈັດຕັ້ງ, ກົນໄກ ແລະ ປັດໄຈການປະຕິບັດວຽກງານ ແລະ ສະເໜີຜ່ານຮ່າງຄູ່ມືແນະນຳການປະສານງານ ແລະ ວຽກງານອື່ນໆ.
ທ່ານຮອງລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ໂຄງການດັ່ງກ່າວໄດ້ມີຜົນກະທົບຕໍ່ທີ່ດິນ, ສິ່ງປຸກສ້າງ ແລະ ຜົນລະປູກຂອງປະຊາຊົນ ແລະ ສາທາລະນະ, ເຊິ່ງທັງໝົດແມ່ນຄວາມຮັບຜິດຊອບຂອງໂຄງການໃນການແກ້ໄຂ ແລະ ຈ່າຍຄ່າຊົດເຊີຍຜົນກະທົບເຫລົ່ານີ້ໃຫ້ຖືກຕ້ອງສອດຄ່ອງກັບລະບຽບກົດໝາຍ, ມີຄວາມເປັນເອກະພາບໃນດ້ານຂໍ້ມູນຖືກຕ້ອງ, ສາມາດກວດສອບໄດ້ ແລະ ທັງຮັບປະກັນໄດ້ຄວາມສະຫງົບຂອງປະຊາຊົນໃນເວລາຈ່າຍຄ່າຊົດເຊີຍ.
