ລາວຍັງພຽງເງື່ອນໄຂດຽວຈະຫຼຸດພົ້ນອອກຈາກຄວາມດ້ອຍພັດທະນາ
ສະຫະປະຊາຊາດ (ສປຊ) ໄດ້ກຳນົດເງື່ອນໄຂຫຼືເພດານການ ຫຼຸດພົ້ນອອກຈາກ ປະເທດດ້ອຍພັດທະນາ3ເງື່ອນໄຂ ຄື: ລວມຍອດລາຍໄດ້ແຫ່ງຊາດ ຫຼື GNI ຕ້ອງບັນລຸ 1.230 ໂດລາ; ດັດຊະນີຊັບສິນມະນຸດ ຫຼື ການພັດທະນາຊັບພະຍາກອນ ມະນຸດ HAI ຕ້ອງສູງກວ່າ 66 ແລະ ຄວາມອ່ອນໄຫວ ດ້ານເສດຖະກິດຕ້ອງຕ່ຳກວ່າ 32. ຂະນະທີ່ ສປປ ລາວ ເປັນປະເທດກຳລັງພັດທະນາ, ກໍາລັງບືນຕົວອອກຈາກປະເທດດ້ອຍພັດທະນາ,ມາຮອດປັດຈຸບັນ ຍັງເຫຼືອພຽງເງື່ອນໄຂດຽວຄືຄວາມອ່ອນໄຫວທາງດ້ານເສດ ຖະກິດ ຊຶ່ງ ສປປ ລາວ ຢູ່ທີ່ 1,7ເທົ່ານັ້ນ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຊີ້ແຈງຕໍ່ຄຳຊັກຖາມຂອງ ສສຊ ເມື່ອອາທິດຜ່ານມາວ່າ: ຕະຫຼອດ 43 ປີຜ່ານມາ, ພັກ ແລະ ລັດຖະບານ ໄດ້ພະຍາຍາມແກ້ໄຂ ຄວາມທຸກຍາກຂອງປະຊາຊົນ ແລະ ພະຍາຍາມສູ້ຊົນ ເພື່ອເຮັດໃຫ້ປະເທດເຮົາຫຼຸດພົ້ນອອກ ຈາກສະຖານະພາບປະເທດ ດ້ອຍພັດທະນາຕາມ 3 ເງື່ອນໄຂ ຂອງສະຫະປະຊາຊາດວາງອອກ. ໂດຍ ສປປ ລາວເຮົາ ໄດ້ກໍານົດສູ້ຊົນໃຫ້ ສປປ ລາວ ອອກຈາກປະເທດດ້ອຍພັດທະນາ ມາແຕ່ປີ 2001 ຊຶ່ງແຜນພັດທະນາເສດຖະ ກິດ-ສັງຄົມ ໄລຍະນັ້ນ ໄດ້ກຳ ນົດວ່າ: ອີກ 20 ປີຂ້າງໜ້າ ຈະພັດທະນາໃຫ້ປະເທດເຮົາຫຼຸດ ພົ້ນອອກຈາກປະເທດດ້ອຍ ພັດທະນາໃຫ້ໄດ້. ຜ່ານມາ ພັກ ແລະ ລັດຖະບານ ກໍພະຍາຍາມສູ້ຊົນໃຫ້ໄດ້ເຕັມທີ່, ແຕ່ຜ່ານການສຳຫຼວດຂອງ ສປຊ ຄັ້ງທຳອິດ ແມ່ນຍັງບໍ່ສາ ມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາໄດ້, ເນື່ອງຈາກວ່າ 3 ເງື່ອນ ໄຂທີ່ ສປຊ ວາງອອກນັ້ນ, ສປປ ລາວ ປະຕິບັດໄດ້ແລ້ວ 2 ເງື່ອນໄຂຄື: ລາຍຮັບແຫ່ງ ຊາດ ສປຊ ຕັ້ງໄວ້ 1.230 ໂດລາ, ສປປ ລາວ ປະຕິບັດໄດ້ 1.996 ໂດລາ, ສ່ວນເງື່ອນໄຂທີ 2 ແມ່ນດັດ ຊະນີຊັບສິນມະນຸດ ຕ້ອງສູງ ກວ່າ 66,ແຕ່ສປປ ລາວຢູ່ທີ່ 72, ແລະເງື່ອນໄຂທີ 3 ແມ່ນດັດຊະນີຄວາມບອບບາງຫຼືອ່ອນໄຫວທາງດ້ານ ເສດຖະກິດ EVI ຕ້ອງຕ່ຳກວ່າ 32, ແຕ່ ສປປ ລາວເຮົາ ຍັງຢູ່ທີ່ 33,7 ຊຶ່ງຍັງສູງກວ່າເພດານ1,7 ທີ່ພວກເຮົາຍັງປະຕິບັດບໍ່ທັນໄດ້.ເຊິ່ງປີ 2021 ສປຊ ຈະມາສຳຫຼວດອີກຄັ້ງຕໍ່ກັບເງື່ອນໄຂທີ່ຍັງບໍ່ທັນບັນລຸນີ້.
ທ່ານນາຍົກລັດຖະມົນຕີ ກ່າວວ່າ: ນະໂຍບາຍຂອງ ພັກ ແລະ ລັດຖະບານ ໄດ້ສຸມ ທຸກຄວາມພະຍາຍາມໃສ່ການ ແກ້ໄຂຄວາມທຸກຍາກຂອງປະຊາຊົນ, ສ້າງຮາກຖານໃຫ້ເຂັ້ມແຂງ, ສ້າງວຽກເຮັດງານທຳໃຫ້ ປະຊາຊົນມີລາຍຮັບທີ່ໝັ້ນຄົງ ແລະ ນັບມື້ນັບສູງຂຶ້ນ, ສ້າງການຜະລິດຢູ່ຮາກຖານໃຫ້ເຂັ້ມແຂງ, ມີສິນຄ້າ, ມີຕະຫຼາດຈຳໜ່າຍທີ່ແນ່ນອນ ແລະເຮັດໃຫ້ລາຍຮັບຂອງຄອບຄົວ, ບ້ານ ແລະ ເມືອງນັບມື້ສູງຂຶ້ນ.
