ກຽມຄັດເລືອກນັກກິລາຍິງບັນຈຸເຂົ້າທີມຊາດ ຢູ 16
ສະຫະພັນບານເຕະແຫ່ງຊາດ (ສຕລ) ກຽມຄັດເລືອກນັກກິລາຍິງທີມຊາດລຸ້ນອາຍຸບໍ່ເກີນ 16 ປີ ຫລື ຢູ 16 ເພື່ອກະກຽມນັກກິລາທີມບານເຕະຍິງທີມຊາດລາວລຸ້ນອາຍຸ 16 ປີ ເຂົ້າຮ່ວມການແຂ່ງຂັນບານເຕະຍິງຊີງແຊ້ມອາຊີ ລຸ້ນອາຍຸ 16 ປີ ຮອບຄັດເລືອກ 2019 ຫລື AFC U-16 WOMEN’S CHAMPIONSHIP 2019 QUALIFIERS ROUND 1 ເຊິ່ງຈະໄດ້ຈັດຂຶ້ນໃນວັນທີ 15 ກັນຍາ ຫາ 23 ກັນຍາ 2018 ຢູ່ທີ່ປະເທດມົງໂກລີ ເຊິ່ງທີມຊາດລາວ ຢູ່ຮ່ວມກຸ່ມ B ປະກອບມີ: ລາວ, ອິນເດຍ, ຮົງກົງ, ປາກິດສະຖານ, ມົງໂກລີ (ເຈົ້າພາບ).
ການຄັດເລືອກຈະໄດ້ຈັດຂຶ້ນໃນວັນທີ 18-31 ມິຖຸນາ 2018 ຢູ່ສູນຝຶກສະຫະພັນບານເຕະແຫ່ງຊາດ ບ້ານຫ້ວຍຫົງ ເມືອງຈັນທະບູລີ ນະຄອນຫລວງວຽງຈັນ ໃນເວລາ 16:30–18:30 ໂມງ. ການຄັດເລືອກຄັ້ງນີ້ ນັກກິລາທີ່ເຂົ້າຮ່ວມຄັດເລືອກຕ້ອງຮັບປະກັນຄວາມພ້ອມຂອງຮ່າງກາຍຕະຫລອດໄລຍະການຄັດເລືອກ. ສຳລັບນັກກິລາຕ່າງແຂວງທີ່ຕ້ອງການມາຄັດເລືອກນັກກິລາໃນຄັ້ງນີ້ ທາງສະຫະພັນບານເຕະແຫ່ງຊາດແມ່ນອຳນວຍຄວາມສະດວກທາງດ້ານທີ່ພັກ ແແລະ ອາຫານການກິນຕະຫລອດໄລຍະການຄັດເລືອກ ສ່ວນການເດີນທາງແມ່ນຮັບຜິດຊອບເອງ.
