ອາເມລິກາ-ສ ເກົາຫລີ-ຍີ່ປຸ່ນ ຈະຮ່ວມມືປົດນິວເຄຼຍ ສປປ ເກົາຫລີ
ລັດຖະມົນຕີຕ່າງປະເທດອາເມລິກາ, ສ ເກົາຫລີ ແລະ ຍີ່ປຸ່ນ ໃຫ້ສັນຍາໃນວັນທີ 14 ມິຖຸນານີ້ວ່າ: ຈະຮ່ວມມືກັນໃຫ້ ສປປ ເກົາຫລີ ຍົກເລີກໂຄງການອາວຸດນິວເຄຼຍ ພາຍຫລັງປະທານາທິບໍດີ ໂດນັນ ທຣຳ ຂອງອາເມລິກາ ປະຊຸມສຸດຍອດກັບທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ໃນວັນທີ 12 ມິຖຸນານີ້.
ທ່ານ ໄມ ປອມເປໂອ ລັດຖະມົນຕີຕ່າງປະເທດອາເມລິກາ, ທ່ານນາງ ຄັງ ຍອງຮົວ ລັດຖະມົນຕີຕ່າງປະເທດ ສ ເກົາຫລີ ແລະ ທ່ານ ທາໂຣ ໂຄໂນະ ລັດຖະມົນຕີຕ່າງປະເທດຍີ່ປຸ່ນ ພົບກັນຢູ່ນະຄອນຫລວງເຊອຸນເປັນເວລາ 2 ວັນ ພາຍຫລັງປະທານາທິບໍດີ ທຣຳ ແລະ ທ່ານ ກິມ ຈ໋ອງອຸນ ໄດ້ລົງນາມໃນຂໍ້ຕົກລົງ ເພື່ອນຳໄປສູ່ການປົດອາວຸດນິວເຄຼຍຢູ່ແຫລມເກົາຫລີ. ທ່ານ ປອມເປໂອ ກ່າວວ່າ: ສປປ ເກົາຫລີ ໃຫ້ສັນຍາວ່າຈະຢຸດໂຄງການອາວຸດນິວເຄຼຍ, ແຕ່ມາດຕະການຂວ້ຳບາດທີ່ເຂັ້ມງວດກັບ ສປປ ເກົາຫລີ ຈະຍັງມີຕໍ່ໄປຈົນກວ່າຈະປົດອາວຸດນິວເຄຼຍໄດ້ທັງໝົດ.
