ຜົນງານດີຕໍ່ເນື່ອງນັກກິລາຍິງປືນລາວ

ສະໂມສອນຍິງປືນໄອພີເອັສຊີລາວ ໄດ້ສົ່ງນັກກິລາຍິງປືນທີມຊາດລາວ 1 ຄົນເຂົ້າຮ່ວມລາຍການ Paknam Shooting Sport Association ຈັດຂຶ້ນລະຫວ່າງວັນທີ 10-11 ມິຖຸນາຜ່ານມາ ທີ່ປະເທດໄທ ແລະ ສາມາດສ້າງຜົນງານດີຢ່າງຕໍ່ເນື່ອງ ໂດຍການຍາດໄດ້ອັນດັບທີ 1 ມາຄອງ.

ການແຂ່ງຂັນຍິງປືນ ປາກນໍ້າ ໄອພີເອັສຊີ ແຊມປ້ຽນຊິບ 2018 ມີນັກກິລາເຂົ້າຮ່ວມຈໍານວນ 100 ກວ່າຄົນ ໂດຍມີການແຂ່ງຂັນ 5 ລາຍການຄື: ປະເພດປືນໂປດັກຊັ່ນ, ຣີໂວນເວີ, ໂອເພັນ, ສະແຕັນດ໋າດ ແລະ ຄາສຊິກ. ຜ່ານການແຂ່ງຂັນໃນ 2 ວັນດັ່ງກ່າວຜົນປາກົດວ່າ: ທ່ານ ອາໂນໄທ ເມືອງມະນີ ສ້າງຜົນງານໄດ້ດີ ສາມາດເກັບຄະແນນໃນຈຳນວນ 8 ສະໜາມ ລວມຜົນງານໄດ້ 75% ຍາດໄດ້ອັນດັບທີ 1 ຄອງແຊ້ມລາຍການ​ດັ່ງກ່າວ.

ນອກຈາກຜົນງານດັ່ງກ່າວນີ້, ຜ່ານມາທ່ານ ອາໂນໄທ ເມືອງມະນີ ຍັງສາມາດຄວ້າຫລຽນຄຳຍິງປືນສະແຕນດາດ ດິວິຊັນ ຄາດຢູ ລາຍການ ໄອພີເອັສຊີ ຊີງແຊ້ມນາໆຊາດ ທີ່ແຂວງຊຽງລາຍ ປະເທດໄທ ເດືອນກຸມພາຜ່ານມາ ແລະ ຄວ້າຫລຽນຄຳຍິງປືນສະແຕນດາດ ໄອພີເອັສຊີ ເລໂວ 2 ຊີງຫຼຽນຄຳ ປະທານສະໂມສອນຍິງປືນໄອພີເອັສຊີລາວ ປະຈຳປີ 2018 ພາຍໃນປະເທດນໍາອີກ.