ທ່ານ ທຣຳ – ທ່ານ ກິມ ມຸ່ງໝັ້ນ ສ້າງສັນຕິພາບ-ປົດນິວເຄຼຍ
ປະທານາທິບໍດີອາເມລິກາ ແລະ ຜູ້ນຳສູງສຸດຂອງ ສປປ ເກົາຫລີ ປິດສາກສິງກະໂປຊຳມິດ ລົງນາມຮ່ວມກັນໃນ “ຂໍ້ຕົກລົງຄວາມເຂົ້າໃຈ” ລະບຸເຖິງການທີ່ລັດຖະບານພຽງຢາງ “ຍຶດໝັ້ນ” ຕໍ່ຂະບວນການປົດນິວເຄຼຍ, ການຮ່ວມກັນສ້າງສັນຕິພາບແບບຍືນຍົງຢູ່ແຫລມເກົາຫລີ ແລະ ລັດຖະບານວໍຊິງຕັນມອບຫລັກປະກັນຄວາມໝັ້ນຄົງໃຫ້ແກ່ ສປປ ເກົາຫລີ.
ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ໂດນັນ ທຣຳ ແລະ ທ່ານ ກິມ ຈ໋ອງອຸນ ລົງນາມຮ່ວມກັນໃນເອກະສານສະບັບໜຶ່ງ ເຊິ່ງຜູ້ນຳອາເມລິກາກ່າວວ່າ: ເປັນ “ຂໍ້ຕົກລົງທີ່ຄວບຄຸມ” ໂດຍຂະບວນການປົດອາວຸດນິວເຄຼຍຢູ່ແຫລມເກົາຫລີ “ຈະເກີດຂຶ້ນຢ່າງວ່ອງໄວພາຍໃນອະນາຄົດອັນໃກ້ນີ້” ເຊິ່ງບັນຫາດັ່ງກ່າວມີລະບຸໃນຂໍ້ຕົກລົງວ່າ: ລັດຖະບານພຽງຢາງ “ຍຶດໝັ້ນຕໍ່ພັນທະສັນຍາໃນການປົດອາວຸດນິວເຄຼຍ” ການລົງນາມຄັ້ງນີ້ຈະນຳໄປສູ່ການພົວພັນທີ່ຫລາຍຂຶ້ນ ລວມທັງສະຖານະການທີ່ດີຂຶ້ນຂອງແຫລມເກົາຫລີ, ຂ້າພະເຈົ້າຮູ້ສຶກດີໃຈ ແລະ ຂໍຂອບໃຈທ່ານ ກິມ ຈ໋ອງອຸນ ແລະ ຄະນະຂອງ ສປປ ເກົາຫລີ ແລະ ຜົນຂອງກອງປະຊຸມມີຜົນດີກວ່າການຄາດຄະເນໄວ້.
ຂະນະທີ່ທ່ານ ກິມ ຈ໋ອງອຸນ ກ່າວວ່າ: ການລົງນາມຄັ້ງນີ້ ໂລກຈະໄດ້ເຫັນການປ່ຽນແປງຄັ້ງໃຫຍ່, ຂ້າພະເຈົ້າຈະວາງອະດີດໄວ້ເບື້ອງຫລັງ. ພ້ອມຂອບໃຈ ປະທານາທິບໍດີ ທຣຳ ທີ່ເຮັດໃຫ້ກອງປະຊຸມຄັ້ງນີ້ເກີດຂຶ້ນ ພ້ອມຈັບມືຜູ້ນຳອາເມລິກາ ກ່ອນທັງສອງທ່ານຈະຍ່າງອອກຈາກຫ້ອງຖະແຫລງຂ່າວ.
