ຄວນເບິ່ງຄືນການເອົາແຄມທາງຈັດສັນເປັນບ່ອນຈອດລົດ

ຜູ້ໃຊ້ລົດໃຊ້ຖະໜົນຫລາຍຄົນມີຂໍ້ຂ້ອງໃຈບໍ່ໜ້ອຍກ່ຽວກັບຄ່າບໍລິການຝາກລົດຂອງກຸ່ມຄົນຈໍານວນໜຶ່ງຕາມແຄມທາງ ແລະ ສະຖານທີ່ສາທາລະນະຕ່າໆໃນນະຄອນຫລວວງວຽງຈັນ, ພາຍຫລັງເຫັນວ່າເກັບຄ່າບໍລິການແພງ ແລະ ຫລາຍບ່ອນບໍ່ທັນເປັນເອກະພາບກັນ, ບາງຈຸດເກັບ 6.000 ກີບ, ບາງບ່ອນ 8.000 ກີບ ແລະ ບາງເຂດເກັບ 10.000 ກີບ, ເບິ່ງແລ້ວຄືກັບວ່າບັນຫາດັ່ງກ່າວຍັງບໍ່ທັນມີການຄຸ້ມຄອງໃຫ້ເປັນເອກະພາບ ແລະ ບໍ່ຮູ້ວ່າຮ່ວງເງິນນີ້ຈະເຂົ້າຖົງໃຜ? ເຂົ້າຖົງບຸກຄົນ ຫລື ເຂົ້າງົບປະມານລັດ. ນອກຈາກນີ້ການຈັດສັນບ່ອນຈອດລົດຫລາຍຈຸດໃນຕົວເມືອງເຫັນວ່າບໍ່ມີຄວາມເໝາະສົມ ແລະ ສົ່ງຜົນເຮັດໃຫ້ການສັນຈອນມີຄວາມແອອັດສັບສົນຂຶ້ນຕື່ມ ເຊັ່ນ: ບ່ອນຈອດລົດແຄມທາງເບື້ອງຕະຫລາດຂົວດິນ, ໜ້າກະຊວງປ້ອງກັນຄວາມສະຫງົບ, ເສັ້ນທາງຮ່ວມ ກົມຕໍາຫລວດ ຕມ ແລະ ຈຸດອື່ນໆ. ຂະນະດຽວກັນການຄິດຄ່າຝາກລົດຍັງນັບເປັນຊົ່ວໂມງ, ຖ້າຫາກກາຍກໍໄດ້ເສຍເງິນຕື່ມອີກ ແລະ ອັນທີ່ເຈົ້າຂອງລົດອັບປະໂຫຍດແມ່ນການກໍານົດໃນປີ້ຝາກລົດທີ່ລະບຸວ່າ: ຈະບໍ່ຮັບຜິດຊອບໃດໆຕໍ່ການເສຍຫາຍຂອງລົດ, ພຽງບໍລິການສະຖານທີ່ຈອດລົດເທົ່ານັ້ນ.

ແນວໃດກໍຕາມ, ຕໍ່ບັນຫານີ້ຫລາຍຄົນໄດ້ໃຫ້ທັດສະນະວ່າຕ້ອງໃຫ້ພາກລັດເປັນຜູ້ຄຸ້ມຄອງໂດຍກົງ, ນັບແຕ່ການຈັດສັນບ່ອນຈອດລົດທີ່ເໝາະສົມເພື່ອຮັບປະກັນຄວາມເປັນລະບຽບຮຽບຮ້ອຍ ແລະ ການກໍານົດຄ່າບໍລິການໃຫ້ມີຄວາມເປັນເອກະພາບ, ໂປ່ງໃສ ຈຶ່ງຈະເປັນການດີ.