ຕະຫລາດນັດແຮງງານ ແລະ ການສຶກສາຄັ້ງທີ 6 ຈະຈັດຂຶ້ນກາງເດືອນພຶດສະພານີ້

ທ່ານ ບົວລິນ ສ້ອຍສຸວັນ ຄະນະບໍດີຄະນະວິສະວະກຳສາດມະຫາວິທະຍາໄລແຫ່ງຊາດ ໃຫ້ຮູ້ໃນວັນທີ 26 ເມສານີ້ວ່າ: ງານຕະຫລາດນັດແຮງງານ ແລະ ຕະຫລາດນັດການສຶກສາຄັ້ງທີ 6 ຈະຈັດຂຶ້ນໃນວັນທີ 19 ພຶດສະພານີ້ຢູ່ຄະນະວິສະວະກຳສາດມະຫາວິທະຍາໄລແຫ່ງຊາດ, ໂດຍໄດ້ການສະໜັບສະໜູນຈາກສະພາການຄ້າ ແລະ ອຸດສາຫະກຳແຫ່ງຊາດ ແລະ ສະພາການຄ້າ ແລະ ອຸດສາຫະກຳເອີຣົບປະຈຳລາວ. ເພື່ອເປີດໂອກາດໃຫ້ສະຖາບັນການສຶກສາ ແລະ ຜູ້ຕ້ອງການສະໜັກຮຽນ, ທັງເປີດໂອກາດໃຫ້ບັນດາຫົວໜ່ວຍທຸລະກິດໄດ້ຊອກຫາຜູ້ຮ່ວມງານທີ່ຖືກຕ້ອງກັບຄວາມຕ້ອງການ ຂອງການພັດທະນາທຸລະກິດຕົນ, ແລກປ່ຽນບົດຮຽນເຊິ່ງກັນ ແລະ ກັນໃນການພັດທະນາຕົນເອງເພື່ອຊອກວຽກເຮັດງານທຳທີ່ເໝາະສົມ. ໂດຍຄະນະຮັບພິຊອບຈະໄດ້ເຊີນບັນດາບໍລິສັດ, ສຳນັກງານ, ອົງການ ທັງພາຍໃນ ແລະ ຕ່າງປະເທດເຂົ້າຮ່ວມງານດັ່ງກ່າວ, ໂດຍສາມາດລົງທະບຽນຮ່ວມງານໄດ້ທີ່ຄະນະວິສະວະກຳສາດມະຫາວິທະຍາໄລແຫ່ງຊາດ.