ຖີບລົດເພື່ອສຸຂະພາບສະຫລອງວັນ ສັບປະດາການປ່ຽນແປງດິນຟ້າອາກາດ
ໃນວັນທີ 9 ມິຖຸນາຜ່ານມາ ທີ່ສວນເຈົ້າອານຸວົງ ນະຄອນຫລວງວຽງຈັນ, ອົງການອີຢູ (EU) ປະຈຳລາວ ຮ່ວມກັບ ສະຫະພັນລົດຖີບແຫ່ງຊາດລາວ ຈັດກິດຈະກຳຖີບລົດມິດຕະພາບ ເສີມສ້າງສຸຂະພາບໃຫ້ມວນຊົນຊາວນະຄອນຫລວງວຽງຈັນ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ລີໂອ ຟາເບີ ເອກອັກຄະລັດຖະທູດສະຫະພາບເອີຣົບ ປະຈຳລາວ, ມີທ່ານ ຄຳໄດ ແກ້ວມະນີ ຮອງປະທານ ແລະ ທັງເປັນຜູ້ປະຈຳການສະຫະພັນລົດຖີບແຫ່ງຊາດລາວ ພ້ອມດ້ວຍຄະນະບໍລິຫານງານທັງສອງເຂົ້າຮ່ວມຢ່າງຫລວງຫລາຍ.
ທ່ານ ລີໂອ ຟາເບີ ກ່າວວ່າ: ກິດຈະກຳຖີບລົດເພື່ອສົ່ງເສີມໃຫ້ພໍ່-ແມ່ປະຊາຊົນຊາວລາວ ກໍຄື ຊາວນະຄອນຫລວງວຽງຈັນ ແລະ ບັນດາຊາວຕ່າງຊາດຈາກປະເທດຕ່າງໆ ທີ່ໄດ້ມາດຳລົງຊີວິດເພື່ອປະຕິບັດໜ້າທີ່ວຽກງານຂອງຕົນຢູ່ ສປປ ລາວ ເປັນກິດຈະກຳໜຶ່ງທີ່ຈັດຂຶ້ນຄືກັບທຸກໆປີ ເພື່ອສ້າງຂະບວນການສະຫລອງວັນສັບປະດາການປ່ຽນແປງດິນຟ້າອາກາດໃຫ້ມີຄວາມໝາຍຢ່າງເລິກເຊິ່ງ.
ກິດຈະກຳລົດຖີບຄັ້ງນີ້ມີນັກກິລາລົດຖີບລະດັບຊາດ ແລະ ທີມຊາດ ຕະຫລອດຮອດມືສະຫມັກຫລິ້ນເຂົ້າຮ່ວມ 520 ຄົນ, ຍິງ 150 ຄົນ ສຳລັບໄລຍະທາງໃນການຖີບລົດ 20 ກິໂລແມັດ ຈາກສວນເຈົ້າອານຸວົງໄປທາງຫລັກ 10 ໄຟແດງບ້ານໜອງໄຮ ເມືອງຫາດຊາຍຟອງ ຜ່ານທາງໂຮງໝໍເຊດຖາທິຣາດ ບ້ານດອນກອຍ ເມືອງສີສັດຕະນາກ ຜ່ານໄຟແດງໄອເຕັກ ລ້ຽວໄຟແດງໄປທາງທາດຫລວງ ຜ່ານທາງໜອງສະພັງເລັນ ແລະ ຜ່ານໄຟແດງໜອງບອນ ອອກມາວົງວຽນຫໍມູນເຊື້ອກອງທັບ ກ່ອນຈະໄປຢຸດທີ່ສວນປະຕູໄຊ ເພື່ອຮ່ວມຖ່າຍຮູບເປັນທີ່ລະນຶກ.
