ລາວໂທລະຄົມຜູ້ສະໜັບສະໜູນຫລັກທີວີລາວ ໃນການຖ່າຍທອດບານໂລກ 2018
ໃນວັນທີ 7 ມິຖຸນາຜ່ານມາ ທີ່ໂຮງແຮມແລນມາກ ໄດ້ມີພິທີຖະແຫລງຂ່າວຜູ້ໃຫ້ການສະໜັບສະໜູນຂອງ ທີວີລາວ ທີ່ໄດ້ຊື້ລິຂະສິດພາບຖ່າຍທອດສົດບານໂລກ 2018 ແຫ່ງດຽວໃນ ສປປ ລາວ ໂດຍ ທ່ານ ຫົງຄຳ ສຸວັນນະວົງ ປະທານສະຖານີໂທລະພາບທີວີລາວ, ທ່ານ ທັນສະໄໝ ຊາມູນຕີ ຫົວໜ້າຄະນະພັດທະນາຄຸນນະພາບການບໍລິການຂອງບໍລິສັດ ລາວໂທລະຄົມ ຜູ້ສະໜັບສະໜູນຫລັກຂອງ ທີວີລາວ ໃນການຖ່າຍທອດສົດ ພ້ອມຜູ້ຕາງໜ້າຜູ້ສະໜັບສະໜູນເຂົ້າຮ່ວມຢ່າງພ້ອມພຽງ.
ທ່ານ ທັນສະໄໝ ຊາມູນຕີ ໄດ້ກ່າວວ່າ: ລາວໂທລະຄົມ ໃຫ້ການສະໜັບສະໜູນຫລັກ ທີວີລາວ ໃນການຖ່າຍທອດສົດບານໂລກ 2018. ນອກຈາກນັ້ນ ທີວີລາວ ຍັງມອບລິຂະສິດໃຫ້ ລາວໂທລະຄົມ ຖ່າຍທອດສົດຜ່ານມືຖືພຽງຜູ້ດຽວໃນ ສປປ ລາວ ດ້ວຍເຄືອຂ່າຍລາວໂທລະຄົມ ແລະ ເພື່ອເປັນການມອບປະສົບການອັນໃໝ່ທາງດ້ານບໍລິການເສີມຂອງພວກເຮົາໃຫ້ກັບລູກຄ້າໄດ້ມີຄວາມມ່ວນຊື່ນ ແລະ ສະດວກສະບາຍຂຶ້ນ ເພື່ອຄວາມສະດວກ ແລະ ວ່ອງໄວຂຶ້ນທາງ ລາວໂທລະຄົມ ໄດ້ສ້າງແອັບໃໝ່ (Application) ຂຶ້ນມາຊື່ວ່າ LTC Play ເຊິ່ງແອັບດັ່ງກ່າວສາມາດຮັບຊົມ TV Online ແລະ ສາມາດເບິ່ງການແຂ່ງຂັນບານໂລກໄດ້ທຸກໆນັດ ພ້ອມທັງພິທີເປີດ-ປິດການແຂ່ງຂັນໄດ້ອີກດ້ວຍ ໂດຍສາມາດດາວໂຫລດໄດ້ທັງລະບົບແອນດຣອຍ (Android ຫລື Google play) ແລະ ໄອໂອເອັສ (IOS ຫລື App Store).
ສຳລັບແອັບ LTC Play ສາມາດດາວໂຫລດໄດ້ງ່າຍໆ ໂດຍພິມ LTC Play ຜ່ານ Google play ຂອງແອນດຣອຍ ແລະ App Store ຂອງໄອໂອເອສ ສາມາດເຂົ້າໄປດາວໂຫລດໄດ້ພຽງແຕ່ 10 ກວ່າແມັກກາໄບເທົ່ານັ້ນ ເຊິ່ງໃນແອັບຈະມີຫລາຍຊ່ອງໃຫ້ຕິດຕາມ ໂດຍສະເພາະຊ່ອງທີວີລາວມີເຖິງ 2 ຊ່ອງທີ່ຈະຖ່າຍທອດສົດບານໂລກ 2018 ທັງໝົດ 64 ນັດ (ນັດທຳອິດຈົນເຖິງນັດຊີງຊະນະເລີດ), ເຖິງວ່າຈະມີ 2 ຄູ່ແຂ່ງພ້ອມກັນ, ແຕ່ກໍສາມາດເລືອກເບິ່ງໄດ້ທັງ 2 ຊ່ອງ.
