ຟິວຣີ ຄືນສູ່ເວທີມວຍແລ້ວ
ໄທສັນ ຟິວຣີ ນັກມວຍຊື່ດັງຂອງອັງກິດ ກັບມາຂຶ້ນສັງວຽນອີກຫລັງຫາຍໜ້າໄປກວ່າ 2 ປີເຄິ່ງ ໂດຍການເອົາຊະນະ ເຊເຟີ ເຊເຟຣີ ຄູ່ຊົກຊາວແອລເບເນຍ ໄປຢ່າງສະບາຍ ໃນການຊົກຮຸ່ນເຮຟວີເວດ ທີ່ເມືອງແມນເຊັສເຕີ ໃນວັນທີ 9 ມິຖຸນານີ້.
ຟິວຣີ ບໍ່ໄດ້ຂຶ້ນຊົກອີກນັບແຕ່ຊະນະ ວະລາດິເມຍ ຄລິດໂກ ໃນປີ 2015 ເນື່ອງຈາກມີບັນຫາສ່ວນຕົວ ແຕ່ບໍ່ໄດ້ສະແດງໃຫ້ເຫັນເຖິງຄວາມຫ່າງເວທີ ເມື່ອໄລ່ຕີ ເຊເຟຣີ ຢ່າງໜັກໃນຍົກ 4 ກ່ອນຄູ່ຊົກຈະຂໍຍອມແພ້ບໍ່ຍອມອອກຈາກມຸມໃນຍົກ 5 ໂດຍໃນຊ່ວງຕົ້ນຍົກທຳອິດ ຟິວຣີ ພະຍາຍາມຫລິ້ນກັບຄົນເບິ່ງຫລາຍກວ່າຈະອອກໝັດ.
ໄຊຊະນະການຊົກນີ້ເຮັດໃຫ້ ຟິວຣີ ຍຶດສະຖິຕິຊະນະລວດອອກໄປເປັນ 26-0 ແລະ ປະກາດຫລັງການຊົກວ່າຈະຂຶ້ນຊົກອີກໃນເດືອນສິງຫານີ້ ແລະ ພ້ອມແລ້ວສຳລັບການທ້າຊີງແຊ້ມກ່ອນທ້າຍປີນີ້ ໂດຍໃນອະດີດ ຟິວຣີ ເປັນເຈົ້າຂອງສາຍແອວແຊ້ມໂລກຫລາຍສະຖາບັນ ທັງ IBF, WBA, WBO, IBO ແລະ ຣິງແມກາຊີນ.
