ລັດໂຈະການອະນຸມັດສ້າງເຂື່ອນໄຟຟ້າຂະໜາດ 15 ເມກາວັດລົງມາແລ້ວ
ຫລັງຈາກໄດ້ມີບົດຮຽນຜ່ານມາ, ລັດຖະບານຈຶ່ງຕັດສິນໃຈໂຈະການອະນຸມັດການລົງທຶນສ້າງເຂື່ອນໄຟຟ້ານ້ຳຕົກທີ່ມີກຳລັງການຜະລິດ 15 ເມກາວັດລົງມາ ເພື່ອຈະທົບທວນດ້ານເຕັກນິກ ແລະ ນິຕິກຳກ່ຽວຂ້ອງຕ່າງໆໃຫ້ຮັດກຸມສາກ່ອນຈຶ່ງຈະກ້າວສູ່ການຄົ້ນຄວ້າການອະນຸມັດຄືນໃໝ່.
ບັນຫາດັ່ງກ່າວ, ແມ່ນລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ອອກແຈ້ງການສະບັບເລກທີ 1167 ລົງວັນທີ 28 ພຶດສະພາ 2018 ເຖິງເຈົ້າຄອງນະຄອນ, ເຈົ້າແຂວງ, ກະຊວງແຜນການ ແລະ ການລົງທຶນ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງການເງິນ ໃຫ້ຢຸດຊົ່ວຄາວການອະນຸມັດໂຄງການສ້າງເຂື່ອນໄຟຟ້ານ້ຳຕົກໃນກຳລັງຕິດຕັ້ງ 15 ເມກາວັດລົງມາ ແລະ ໃຫ້ກວດຄືນດ້ານເຕັກນິກຂອງບັນໂຄງການທີ່ອະນຸມັດໄປແລ້ວລວມເຖິງດ້ານນິຕິກຳໃຫ້ຖືກຕ້ອງຕາມລະບຽບກົດໝາຍ.
ໄລຍະຜ່ານມາ, ໂຄງການສ້າງເຂື່ອນໄຟຟ້າຂະໜາດນ້ອຍແມ່ນໄດ້ຮັບການພັດທະນາແບບບໍ່ສອດຄ່ອງກັບມາດຕະຖານເຕັກນິກວິຊາການ ແລະ ຂັ້ນຕອນອະນຸມັດກໍບໍ່ເປັນໄປຕາມລະບຽບກົດໝາຍຂອງລັດຖະບານວາງອອກ, ອັນໄດ້ເຮັດໃຫ້ໂຄງການມີຄຸນນະພາບຕ່ຳ, ມີຄວາມສ່ຽງທາງດ້ານຄວາມປອດໄພໃນເວລາກໍ່ສ້າງ ແລະ ດຳເນີນການຜະລິດ, ເຊິ່ງໄດ້ມີຕົວຢ່າງການເກີດອຸປະຕິເຫດຮ້າຍແຮງມາແລ້ວຢູ່ຫລາຍທ້ອງຖິ່ນ.
