ລາວຄົ້ນຄວ້າອະໄພຍະໂທດຜູ້ຕ້ອງຂັງກວ່າ 300 ຄົນ
ເມື່ອທ້າຍອາທິດຜ່ານມານີ້, ກະຊວງປ້ອງກັນຄວາມສະຫງົບໄດ້ຈັດກອງປະຊຸມຄົ້ນຄວ້າ, ອະໄພຍະໂທດ, ຫລຸດຜ່ອນໂທດ ແລະ ປ່ອຍຕົວນັກໂທດຂັ້ນກະຊວງປ້ອງກັນຄວາມສະຫງົບປະຈຳປີ 2018, ໂດຍການເປັນປະທານຂອງທ່ານ ພົນຕີ ສົມຫວັງ ທຳມະສິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ມີຫົວໜ້າກົມຕຳຫລວດຄຸມຂັງ-ດັດສ້າງ ແລະ ພາກສ່ນກ່ຽວຂ້ອງເຂົ້າຮ່ວມ.
ກົມຄຸມຂັງ-ດັດສ້າງ ໃຫ້ຮູ້ວ່າ: ປີນີ້, ຢູ່ບັນດາຄ້າຍຄຸມຂັງໄດ້ສະເຫນີອະໄພຍະໂທດ, ຫລຸດຜ່ອນໂທດ ແລະ ປ່ອຍຕົວ ລວມມີທັງໝົດ 304 ຄົນ (ຍິງ 36 ຄົນ) ຕ່າງປະເທດ 15 ຄົນ, ຊຶ່ງສານໄດ້ລົງໂທດຕັດດສະຫລະພາບຕະຫລອດຊີວິດ 9 ຄົນ, ໂດຍສ່ວນໃຫຍ່ແມ່ນຜູ້ຕ້ອງຂັງຄະດີຢາເສບຕິດ. ໃນນີ້ ສຳລັບຄ້າຍຄຸມຂັງ-ດັດສ້າງຊຳເຄ້ສະເຫນີຜ່ອນໂທດ ແລະ ປ່ອຍຕົວມີ 163 ຄົນ (ຍິງ 21 ຄົນ), ຄ້າຍຄຸມຂັງໂພນຕ້ອງມີ 110 ຄົນ (ຍິງ 11 ຄົນ) ຕ່າງປະເທດ 14 ຄົນ, ຄ້າຍໂພນເງີນມີ 13 ຄົນ ແລະ ຄ້າຍໂພນທັນມີ 18 ຄົນ (ຍິງ 3 ຄົນ).
ທ່ານຮອງລັດຖະມົນຕີກະຊວງປ້ອງກັນຄວາມສະຫງົບ ກ່າວວ່າ: ກອງປະຊຸມນີ້, ແມ່ນການປະຕິບັດນະໂຍບາຍຫລຸດຜ່ອນໂທດໃຫ້ນັກໂທດຜູ້ທີ່ປະພຶດດີ, ມີຄວາມກ້າວໜ້າໃນການຝຶກຝົນຫລໍ່ຫລອມຕົນເອງ, ປະຕິບັດລະບຽບຄ້າຍຄຸມຂັງ-ດັດສ້າງ ແລະ ອອກແຮງງານດີ, ມີການປ່ຽນແປງດ້ານທັດສະນະແນວຄິດ ແລະ ມີຄວາມສຳນຶກຜິດ, ຮູ້ສຶກກິນແຫນງຕໍ່ການກະທຳຜິດທີ່ບໍ່ຖືກຕ້ອງຂອງຕົນເອງໃນໄລຍະຜ່ານມາ, ເຊິ່ງຈະໄດ້ຮັບການພິຈາລະນາຫລຸດຜ່ອນໂທດຕາມເງື່ອນໄຂທີ່ກຳນົດໄວ້ ແລະ ເປັນພຶ້ນຖານໃຫ້ແກ່ການຄົ້ນຄວ້າປະຕິບັດນະໂຍບາຍດ້ານຕ່າງໆຕໍ່ເຂົາເຈົ້າ, ໂດຍສະເພາະແມ່ນຄົ້ນຄວ້າດ້ານນະໂຍບາຍກ່ຽວກັບການສະເຫນີອະໄພຍະໂທດ, ຜ່ອນໂທດ, ປ່ອຍຕົວ ແລະ ການປ່ອຍຕົວກ່ອນກຳນົດໂດຍມີເງື່ອນໄຂຕາມກົດໝາຍທີ່ມີຕໍ່ນັກໂທດຕາມຄວາມເຫມາະສົມ, ສະນັ້ນ, ຈຶ່ງມີຄວາມຈຳເປັນກຳນົດມາດຖານ, ເງື່ອນໄຂຢ່າງລະອຽດ ເພື່ອຮັບປະກັນໃຫ້ແກ່ການຕີລາຄາຄັດເລືອກນັກໂທດໃຫ້ມີຄວາມຖືກຕ້ອງ, ຊັດເຈນ, ພາວະວິໃສ, ຍຸຕິທຳ ແລະ ໂປ່ງໃສ.
ຂ່າວ-ພາບ : ຫນັງສືພິມ ປກສ
