ຢາເສບຕິດໄດ້ຊຶມເລິກເຂົ້າຫລາຍຊັ້ນຄົນໃນສັງຄົມ

ຢາເສບຕິດເປັນໄພອັນຕະລາຍທີ່ທ້າທາຍ ແລະ ພວມຂົ່ມຂູ່ຕໍ່ມວນມະນຸດໃນທົ່ວໂລກ. ປັດຈຸບັນຢາເສບຕິດ, ພວມກາຍເປັນສິນຄ້າທີ່ມີກໍາໄລສູງສຸດຢູ່ອັນດັບ 2 ທີ່ມີມູນຄ່າຊື້-ຂາຍໃນທົ່ວໂລກເຖິງ 1.000 ຕື້ໂດລາສະຫະລັດຕໍ່ປີ ແລະ ມີຜູ້ຕິດຢາເສບຕິດຫລາຍກວ່າ 243 ລ້ານຄົນ. ສໍາລັບຢູ່ປະເທດເຮົາ, ບັນຫາຢາເສບຕິດໃນປັດຈຸບັນພວມມີລັກສະນະເພີ່ມຂຶ້ນ ແລະແຜ່ຂະຫຍາຍໄປທົ່ວທຸກບ່ອນໃນສັງຄົມ, ໃນລະດັບທີ່ແຕກຕ່າງກັນ, ການພົວພັນຄ້າ-ຂາຍຢາເສບຕິດມີທັງຄົນລາວ ແລະ ຄົນຕ່າງປະເທດ, ມີການເຄື່ອນໄຫວຂ້າມຊາດ ແລະ ມີການນໍາໃຊ້ພາຫານະ-ເຕັກນິກທີ່ທັນສະໄໝ ເຂົ້າໃນການຂົນສົ່ງຢາເສບຕິດຢ່າງເລິກແລບແນບນຽນ ແລະ ບັນຫາທີ່ໜ້າເປັນຫ່ວງແມ່ນຢາເສບຕິດໄດ້ຊືມເລິກເຂົ້າຫລາຍຊັ້ນຄົນໃນສັງຄົມ, ອັນໄດ້ສ້າງຜົນເສຍຫາຍທາງດ້ານເສດຖະກິດ, ວັດທະນະທໍາ ແລະ ສັງຄົມ ເຊິ່ງສ້າງຄວາມບໍ່ສະຫງົບໃຫ້ແກ່ປະເທດເຮົາ, ທໍາລາຍຖັນແຖວໄວໜຸ່ມ-ເຍົາວະຊົນ, ກໍ່ໃຫ້ເກີດມີການຫລີ້ນກິນຟູມເຟືອຍ, ເປັນນັກເລງອັນຕະພານ, ຂີ້ລັກງັດແງະ, ປຸ້ນຈີ້-ຊີງຊັບ, ອາລະວາດຕີກັນ ແລະ ຢາເສບຕິດຍັງເປັນເສັ້ນທາງໃຫ້ເກີດມີການຊື້ຈ້າງ ແລະ ໃຫ້ສິນບົນ ສ້າງຄວາມເສຍຫາຍໃຫ້ແກ່ຖັນແຖວພະນັກງານ ແລະ ເຈົ້າໜ້າທີ່ຕ່າງໆເປັນຈໍານວນຫລວງຫລາຍ. ນີ້ຄືການລາຍງານຂອງທ່ານພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ຕໍ່ກອງປະຊຸມສະໄໝສາມັນເທື່ອທີ 5 ສະພາແຫ່ງຊາດ ຊຸດທີ VIII.

ທ່ານລັດຖະມົນຕີກະຊວງປ້ອງກັນຄວາມສະຫງົບ ໄດ້ກ່າວວ່າ: ບັນຫາດັ່ງກ່າວ, ແມ່ນຍ້ອນປະຊາຊົນຈໍານວນໜຶ່ງຍັງບໍ່ທັນເຊື່ອມຊຶມຢ່າງເລິກເຊິ່ງ ຕໍ່ແນວທາງປ້ອງກັນຊາດ-ປ້ອງກັນຄວາມສະຫງົບຂອງພັກ, ການສຶກສາອົບຮົມຜົນຮ້າຍຂອງຢາເສບຕິດບໍ່ທັນກ້ວາງຂວາງ, ການບັງຄັບໃຊ້ກົດໝາຍ ຕໍ່ຜູ້ພົວພັນຊື້-ຂາຍຢາເສບຕິດບໍ່ທັນເດັດຂາດເຂັ້ມງວດ, ຈຶ່ງເຮັດໃຫ້ຜູ້ກະທໍາຜິດບໍ່ເຂັດຫລາບ-ບໍ່ຢ້ານກົວຕໍ່ລະບຽບກົດໝາຍ (ຜ່ານມາເຖິງວ່າມີການຕັດສິນຄະດີຢາເສບຕິດເຖິງໂທດປະຫານຊີວິດ, ແຕ່ຕົວຈິງພັດບໍ່ຖືກປະຫານຊີວິດ), ການປະສານງານລະຫວ່າງເຈົ້າໜ້າທີ່ຕໍາຫລວດກັບອົງການໄອຍະປະຊາຊົນ, ສານປະຊາຊົນ ແລະ ອົງການກ່ຽວຂ້ອງແຕ່ລະຂັ້ນຍັງບໍ່ທັນກົມກຽວແທດເຖິງຕົວຈິງ ຈຶ່ງພາໃຫ້ການແກ້ໄຂຄະດີຊັກຊ້າ ແລະ ແກ່ຍາວ, ມີບາງຄະດີຈະແຈ້ງແລ້ວແຕ່ບໍ່ຕັດສິນ ຫລື ຕັດສິນຕໍ່າກວ່າຄວາມຜິດໂຕຈິງ, ມີເຈົ້າໜ້າທີ່ແຕ່ລະຂັ້ນຈໍານວນໜຶ່ງບໍ່ໂປ່ງໃສ, ບໍ່ທ່ຽງທໍາ ໃນການດໍາເນີນຄະດີ, ປ່ຽນຮູບຄະດີໜັກເປັນເບົາ, ຜິດເປັນຖືກ, ຂອງແທ້ເປັນຂອງປອມ ແລະອື່ນໆ ແລະ ສໍາລັບການແກ້ໄຂໃນຕໍ່ໜ້ານັ້ນແມ່ນຕ້ອງໄດ້ສືບຕໍ່ເຊື່ອມຊຶມ ແລະ ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ແລະ ເອກະສານກ່ຽວຂ້ອງອື່ນໆ, ປັບປຸງບັນດາກົດໝາຍ ແລະ ນິຕິກໍາກ່ຽວຂ້ອງຕ່າງໆໃຫ້ຮັດກຸມ, ຮັບປະກັນບໍ່ໃຫ້ມີຊ່ອງຫວ່າງໃຫ້ກຸ່ມຄົນບໍ່ດີສວຍໃຊ້ ແລະ ເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍໄດ້ຮັບການຈັດຕັ້ງປະຕິບັດຢ່າງເດັດຂາດເຂັ້ມງວດ, ເຮັດໃຫ້ທຸກຄົນເກງຂາມ, ຢ້ານກົວ-ບໍ່ກ້າພົວພັນ, ຂົນສົ່ງ ແລະ ຊື້-ຂາຍຢາເສບຕິດ, ປັບປຸງກົງຈັກການຈັດຕັ້ງ ແລະ ບຸກຄະລາກອນທີ່ເຮັດໜ້າທີ່ຄວບຄຸມ, ສະກັດກັ້ນ, ປາບປາມ ແລະ ແກ້ໄຂບັນຫາຢາເສບຕິດໃຫ້ມີຄວາມປອດໃສ, ໜັກແໜ້ນ ແລະ ເຂັ້ມແຂງ, ມີຄວາມຍຸຕິທໍາຕໍ່ໜ້າທີ່ວຽກງານ, ສະໜອງງົບປະມານ, ວັດຖຸ, ພາຫະນະ-ເຕັກນິກທີ່ທັນສະໄໝ ຮັບໃຊ້ວຽກງານຄວບຄຸມ, ສະກັດກັ້ນ, ປາບປາມ ແລະ ແກ້ໄຂຢາເສບຕິດທີ່ຈໍາເປັນຢ່າງເໝາະສົມ.

ຕໍ່ບັນຫາດັ່ງກ່າວ, ທ່ານພົນຈັດຕະວາ ຄໍາສຸກ ວີອິນທະວົງ ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ໄດ້ມີຄໍາເຫັນໃນການແກ້ໄຂ ໂດຍຕ້ອງພ້ອມກັນຕັ້ງໜ້າໂຄສະນາ, ສຶກສາອົບຮົມທົ່ວປວງຊົນເຂົ້າຮ່ວມສະກັດກັ້ນ ແລະ ຕ້ານຢາເສບຕິດດ້ວຍຫລາຍວິທີ ແລະ ຫລາຍຮູບການ ເພື່ອໃຫ້ວຽກງານນີ້ກາຍເປັນສະຕິ, ເປັນເຈົ້າການ ແລະ ຄວາມຮັບຜິດຊອບຂອງທົ່ວປວງຊົນ, ປັບປຸງວຽກງານວິຊາສະເພາະ, ປັບປຸງກໍາລັງ ປກສ ສະກັດກັ້ນ ແລະ ຕ້ານຢາເສບຕິດ, ປັບປຸງຍົກສູງຄຸນນະພາບວຽກງານສືບສວນ-ສອບສວນດໍາເນີນຄະດີຢ່າງຈະແຈ້ງ, ຊັດເຈນ, ຮັດກຸມ, ວ່ອງໄວ, ທັງມີຄວາມໂປ່ງໃສ, ສືບຕໍ່ຫັນລົງຮາກຖານຊ່ວຍທ້ອງຖິ່ນແກ້ໄຂບັນຫາຢາເສບຕິດ, ກໍາແໜ້ນທຸກສະພາບກົນອຸບາຍ-ເລ້ລ່ຽມການເຄື່ອນໄຫວຂອງບັນດາເປົ້າໝາຍທັງລາຍໃຫຍ່-ລາຍຍ່ອຍຢູ່ພາຍໃນ ແລະ ຕ່າງປະເທດ, ແກ້ແຕ່ກົກເຖິງປາຍ, ເອົາໃຈໃສ່ໃນການດໍາເນີນຄະດີຢາເສບຕິດທີ່ເຂົ້າໃໝ່ ແລະ ຍັງຄ້າງຢູ່ບັນດາອົງການກ່ຽວຂ້ອງໃນໄລຍະຜ່ານມາໃຫ້ຫລຸດຜ່ອນລົງ, ເຮັດວຽກງານໂຄສະນາສະກັດກັ້ນ ແລະ ຕ້ານຢາເສບຕິດ ປະຕິບັດໃຫ້ໄດ້ 4 ບໍ່ຄື: ບໍ່ຂາຍ-ບໍ່ຊື້-ບໍ່ເສບ ແລະ ບໍ່ຜະລິດປຸງແຕ່ງ ໃຫ້ກາຍເປັນຂອງທົ່ວປວງຊົນ, ເພີ່ມທະວີສະກັດກັ້ນ ແລະ ຕ້ານຢາເສບຕິດກັບບັນດາປະເທດໃກ້ຄຽງແນໃສ່ເພື່ອເຮັດໃຫ້ປະເທດເຮົາສືບຕໍ່ມີຄວາມໝັ້ນຄົງຍິ່ງໆຂຶ້ນ.

# ຂ່າວ-ພາບ: ຣັດສະໝີ ດວງສັດຈະ