ລາວເຈລະຈາເປັນຄູ່ຄ້າຜະລິດຕະພັນໄມ້ໃນຕະຫຼາດອີຢູ
ຈາກຜົນຂອງການເຈລະຈາລະຫວ່າງລັດຖະບານລາວກັບສະຫະພາບເອີຣົບ(EU),ກ່ຽວກັບແຜນງານ “ການຈັດຕັ້ງປະຕິບັດກົດໝາຍປ່າໄມ້,ການຄຸ້ມຄອງແລະການຄ້າໄມ້ ແບບສະໝັກໃຈ”(FLEGT VPA),ເມື່ອບໍ່ມານີ້ແລະໃນວັນທີ7ພຶດສະພາ ນີ້. ສອງຝ່າຍກໍໄດ້ຮ່ວມກັນຖະແຫຼງຜົນຂອງການເຈລະຈາດັ່ງກ່າວຕໍ່ສື່ມວນຊົນ, ໂດຍ ທ່ານ ໂຣເຣ ຣອດຣີ ເກັດສ໌ ຫົວໜ້າສິ່ງແວດລ້ອມ,ຄະນະກຳມາທິການສະຫະພາບເອີຣົບ ກ່າວວ່າ:ຕະຫຼາດ EU ເປັນຕະຫຼາດໃຫຍ່,ເຊິ່ງການເຈລະຈາ ກໍເພື່ອອອກໃບຢັ້ງຢືນຄວາມຖືກຕ້ອງໃຫ້ແກ່ຜະລິດຕະພັນໄມ້ລາວ ເພື່ອໃຫ້ມີຄວາມສາມາດນຳເອົາຜະລິດຕະພັນເຂົ້າໄປຕະຫຼາດ EU ໄດ້ສະດວກແລະບໍ່ຈຳແນກປະເພດໄມ້ ,ເຖິງຈະເປັນໄມ້ປູກຫຼືໄມ້ຈາກທຳມະຊາດແລະການເຈລະຈາເທື່ອນີ້ເປັນຄັ້ງທີ2 ແມ່ນຕ້ອງການສິ່ງຢັ້ງຢືນຈາກລັດຖະບານລາວກ່ຽວກັບຄວາມຖືກຕ້ອງຂອງໄມ້,ແຫຼ່ງກຳເນີດ,ໂຮງງານ,ຄຸນນະພາບແລະອື່ນໆຕົ້ນຕກໍແມ່ນລະບຽບການຄຸ້ມຄອງຕ່າງໆຂອງພາກລັດແລະຄຳສັ່ງເລກທີ15/ນຍ ຂອງລັດຖະບານລາວ. ກໍເປັນນະໂຍບາຍໜຶ່ງທີ່ສາມາດສົ່ງເສີມການສົ່ງອອກ ຢ່າງຖືກຕ້ອງ.
ທ່ານ ພວງ ປະຣິສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳແລະປ່າໄມ້ ລາວ ກ່າວວ່າ:ການເຈລະຈາດັ່ງກ່າວຍັງຈະມີຂື້ນອີກຢູ່ປະເທດນີວຊີແລນແລະແບນຊິກໃນປີ2019 ເພື່ອປັບປຸງລະບົບຕ່ອງໂສ້ການສົ່ງອອກໄມ້ໄປຕະຫຼາດດັ່ງກ່າວໃຫ້ຖືກຕ້ອງກວ່າເກົ່າ ນັບແຕ່ນິຕິກຳກຳນົດປະເພດໄມ້,ແຫຼ່ງທີ່ມາຂອງໄມ້,ການພັດທະນາໂຮງງານ,ການຄຸ້ມຄອງແຮງງານ,ຄຸນນະພາບຂອງຜະລິດຕະພັນ ໃຫ້ໄດ້ຕາມເງື່ອນໄຂ,ມາດຕະຖານຂອງສະຫະພາບເອີຣົບ,ຊຶ່ງທັງໝົດແມ່ນຂື້ນຢູ່ກັບຝ່າຍລາວວ່າຈະບັນລຸຈຸດນັ້ນຊ້າຫຼືໄວ.
ແນວໃດກໍຕາມ ຜົນຂອງການເຈລະຈາຄັ້ງທີ2ນີ້ ກໍສະຫຼຸບໄດ້ແລ້ວວ່າ ຈະຮ່ວມມືກັນໃນ ການທົບທວນບັນດາຮ່າງນິຍາມໄມ້ທີ່ຖືກຕ້ອງຕາມກົດໝາຍ(TLD)ແລະຜະລິດຕະພັນໄມ້ ທີ່ກຳນົດໄວ້ໃນສັນຍາການຄ້າແບບສະໝັກໃຈ(VPA) ຊື່ງໄດ້ດັດປັບແລະຮັບຮອງເອົາສົມບູນຕາມກົດໝາຍຄື:ປ່າຜະລິດ;ພັນທະແຮງງານ;ການປຸງແຕ່ງໄມ້ແລະການຄ້າ ທີ່ໄດ້ບັນລຸຄວາມສຳເລັດແລະສາມາດນຳໃຊ້ໄດ້.ທັງນີ້ກໍເພື່ອຮ່ວມກັນຄຸ້ມຄອງການຄ້າໄມ້ທີ່ຖືກຕ້ອງຕາມກົດໝາຍ ເຊິ່ງຈະສົ່ງຜົນດີໃຫ່ແກ່ຂະແໜງການປ່າໄມ້ຂອງ ສປປລາວແລະການຄຸ້ມຄອງປ່າໄມ້ສາກົນທີ່ຍືນຍົງ.
