ວັດອົງຕື້ມະຫາວິຫານສະຖານທີ່ສຳຄັນພຸດທະສາສະໜາ

ວັດອົງຕື້ມະຫາວິຫານ ຕັ້ງຢູ່ເຂດບ້ານວັດຈັນ, ເມືອງຈັນທະບູລີ, ນະຄອນຫຼວງວຽງຈັນທີ່ເຄີຍມີຊື່ວ່າ: ວັດສີພູມ (ໄຊຍະພູມ). ໄດ້ສ້າງຂຶ້ນໂດຍເຈົ້າໄຊເຊດຖາທິຣາຊ ໃນປີ ຄສ 1566. ວັດອົງຕື້ເປັນໜຶ່ງໃນບັນດາວັດທີ່ເກົ່າ ແກ່ທີ່ສຸດໃນນະຄອນຫຼວງວຽງຈັນ ແລະ ມີຄວາມໝາຍສຳຄັນທາງບູຮານນະສະຖານກໍຄື   ທາງດ້ານປະຫວັດສາດ. ວັດອົງຕື້ມີພຣະອຸໂບສົດໃຫຍ່ຢູ່ໜຶ່ງຫຼັງ, ມີລວງກ້ວາງ 16,34 ແມັດ, ລວງຍາວ 40 ແມັດ ແລະ ລວງສູງປະມານ 25 ແມັດ ໂດຍມີພຣະເຈົ້າໃຫຍ່ອົງຕື້ເປັນປະທານມີໜ້າຕັກກ້ວາງ 3,40 ແມັດ, ລວງສູງ 5,80 ແມັດ.

ຕາມການບອກເລົ່າຂອງ ອະດີດພໍ່ຕູ້ສາລະວັດວັດອົງຕື້ໄດ້ ໃຫ້ຮູ້ວ່າ: ວັດອົງຕື້ ເຄີຍເປັນສະ ຖານທີ່ປະກອບພິທີ ສຳຄັນທາງລັດຖະການເຊັນ: ພິທີດື່ມນໍ້າສັດຕະຍາບັນ(ດື່ມນໍ້າສາບານ) ຂອງບັນດາກະສັດກໍຄືຜູ້ນຳປະເທດ ໃນສະໄໝກ່ອນປົດປ່ອຍ, ແຕ່ກ່ອນວັດອົງຕື້ມີອານາເຂດຕິດກັບວັດອິນແປງ, ວັດມີໄຊ ແລະ ວັດຫາຍໂສກ, ແຕ່ຍ້ອນວ່າໄດ້ມີການພັດທະນາຕົວເມືອງ ແລະ ການຕັດຖະໜົນຫົນທາງຈຶ່ງເຮັດໃຫ້ທັງສີ່ວັດ ໄດ້ຖືກແຍກອອກຈາກກັນດັ່ງທີ່ເຮົາເຫັນຢູ່ທຸກວັນນີ້.

ຕາມທີ່ເຄີຍໄດ້ເຫັນໃນ ທຸກໆປີພາຍຫຼັງບຸນນະມັດສະການພຮະທາດຫຼວງ ໄດ້ເຊັດສິ້ນລົງແມ່ນໄດ້ມີການຈັດພິທີ ແຫ່ຜາສາດເຜິ້ງຂຶ້ນຢູ່ທີ່ວັດອົງຕື້, ອິນແປງໂດຍໄດ້ມີປວງຊົນລາວຊາວພຸດທີ່ມາຈາກຂອບ ເຂດບ້ານ ແລະ ເມືອງໃກ້ຄຽງ, ມາຈາກຕ່າງບ້ານ, ຕ່າງເມືອງ ແລະ ນອກນັ້ນກໍຍັງໄດ້ມີແຂກ ຕ່າງດ້າວທ້າວຕ່າງແດນມາ ຮ່ວມພິທີມ່ວນຊື່ນນຳອີກດ້ວຍ.

ຈາກບັນຫາທີ່ໄດ້ກ່າວມາ ນັ້ນ, ວັດອົງຕື້ຈຶ່ງເປັນ ວັດໜຶ່ງ ທີ່ສຳຄັນບໍ່ວ່າທາງດ້ານການສັກກະລະບູຊາ ແລະ ທາງດ້ານ ການທ່ອງທ່ຽວເຫັນວ່າເປັນທີ່ນິຍົມຂອງຄົນລາວຊາວພຸດ  ແລະ ເປັນທີ່ໜ້າສົນໃຈຂອງຊາວ ຕ່າງດ້າວໃນການຄົ້ນຄ້ວາ ແລະ ຊອກຮູ້ຮໍ່າຮຽນທາງດ້ານຂະນົບທຳນຽມ-ຮີດຄອງປະເພນີ ການນັບຖື ແລະ ຄວາມໝາຍຄວາມສຳຄັນທາງດ້ານປະຫວັດສາດ.

               ດັ່ງກາບກອນທີ່ໄດ້ພັນລະນາໄວ້:

*   ວັດອົງຕື້ມີຊື່ຕັ້ງ               ວັດໃຫຍ່ໄຊຍະພູມ
ເຈົ້າໄຊເຊດຖາປະຕິສັງຂອນ       ເປັນຜູ້ນໍາພາສ້າງ
ຕາມປະຫວັດກ່າວອ້າງ            ເປັນວັດສຳຄັນທີ່ເກົ່າແກ່
ພຣະອຸໂບສົດໃຫຍ່ສ້າງຂຶ້ນ        ມີໄວ້ໜຶ່ງຫຼັງ  ທ່ານເອີຍ.
*     ມີທັງພຣະອົງຕື້               ຄືພະໃຫຍ່ເປັນປະທານ
ເປັນສະຖານທີ່ບູຊາ                ມາກາບຊົມພະນົມໄຫວ້
ຈຶ່ງໄດ້ມີນາມໄວ້                     ເທົ່າທຸກວັນໄດ້ເອີ້ນຊື່
ວັດອົງຕື້ລືກະເດື້ອງ                ຮຸ່ງເຮືອງບ້ານຖິ່ນສະຖານ ແທ້ນາ.