ລາວຟອດຊຸກຍູ້ທີມຊາດລາວຊຸດໃຫຍ່ 80 ລ້ານກວ່າກີບ
ບໍລິສັດລາວຟອດຊີຕີ ຊຸກຍູ້ນັກກິລາທີມຊາດລາວຊຸດໃຫຍ່ 80 ລ້ານກວ່າກີບ ເພື່ອຊຸກຍູ້ ແລະ ສົ່ງເສີມທີມຊາດກິລາບານເຕະຊຸດໃຫຍ່ ໃນໄລຍະປີ 2018-2019 ເຊິ່ງພິທີມອບໄດ້ຈັດຂຶ້ນໃນວັນທີ 6 ມິຖຸນານີ້ ທີ່ສະຫະພັນບານເຕະແຫ່ງຊາດລາວ (ສຕລ) ໂດຍມີທ່ານ ຈັກກະພົນ ມາລາບັນດິດ ຜູ້ຈັດການ ຝ່າຍບໍລິຫານ ແລະ ຝ່າຍຂາຍບໍລິສັດລາວຟອດຊີຕີ, ທ່ານນາງ ກັນຍາ ແກ້ວມະນີ ເລຂາທິການ ສຕລ ພ້ອມດ້ວຍພາກສ່ວນກ່ຽວຂ້ອງ ແລະ ສື່ມວນຊົນເຂົ້າຮ່ວມ.
ທ່ານ ຈັກກະພົນ ມາລາບັນດິດ ກ່າວວ່າ: ການຊຸກຍູ້ຄັ້ງນີ້ ເພື່ອຢາກໃຫ້ວົງການບານເຕະ ພັດທະນາ ແລະ ເຮັດໃຫ້ວົງການບານເຕະລາວກັບມາຄຶກຄື້ນອີກຄັ້ງ. ນອກນັ້ນ ຍັງຈະມີກິດຈະກຳຕ່າງໆຕະຫລອດການແຂ່ງຂັນພາຍໃນ ເພື່ອໃຫ້ແຟນບານເຂົ້າໄປຊົມໄປເຊຍ ແລະ ໃຫ້ກຳລັງໃຈທີມຊາດລາວໃນການແຂ່ງຂັນ, ໃນນັ້ນ ຍັງເປັນການຊຸກຍູ້ທີມຊາດລາວກຽມເຂົ້າສູ່ລາຍການແຂ່ງຂັນ ເອເອັຟເອັຟ ຊຸຊຸກິຄັບ 2018 (AFF Suzuki Cup 2018) ທີ່ຈະຈັດຂຶ້ນໃນເດືອນພະຈິກ 2018.
ການແຂ່ງຂັນ ເອເອັຟເອັຟ ຊຸຊຸກິ ຄັບ 2018 ທີມຊາດລາວ ຈະຢູ່ໃນສາຍ A ປະກອບມີ: ມຽນມາ, ກຳປູເຈຍ, ມາເລເຊຍ ແລະ ຫວຽດນາມ, ສາຍ B ມີໄທ, ສິງກະໂປ, ອິນໂດເນເຊຍ, ຟີລິບປີນ, ບຣູໄນ ແລະ ຕີມໍເລສເຕ.
