UAE ເປີດປ້ຳນ້ຳມັນພະລັງງານແສງຕາເວັນແຫ່ງທຳອິດຢູ່ດູໄບ
ດູໄບ 26 ເມສາ: ບໍລິສັດນ້ຳມັນຂອງລັດຖະບານສະຫະນະຄອນ ເອເມຣັດ ອາຣັບ (UAE) ເປີດປ້ຳນ້ຳມັນພະລັງງານແສງຕາເວັນເປັນແຫ່ງທຳອິດຂອງປະເທດໃນນະຄອນດູໄບ.
ບໍລິສັດນ້ຳມັນແຫ່ງຊາດເອເມຣັດຂອງລັດຖະບານເປີດເຜີຍວ່າ: ແຜງໂຊລາເຊວ ເຊິ່ງໄດ້ຮັບການຕິດຕັ້ງຢູ່ປ້ຳນ້ຳມັນແຫ່ງນີ້ສາມາດຜະລິດກະແສໄຟຟ້າໄດ້ສູງເຖິງ 120 ກິໂລວັດຕໍ່ຊົ່ວໂມງ ສູງກວ່າລະດັບພະລັງງານທີ່ປ້ຳນ້ຳມັນຈຳເປັນຕ້ອງໃຊ້ 30%. ດັ່ງນັ້ນ ກະແສໄຟຟ້າສ່ວນເກີນຈະຖືກສົ່ງກັບໄປລະບົບເຄືອຂ່າຍໄຟຟ້າຂອງເມືອງ ເພື່ອຈ່າຍໃຫ້ປະຊາຊົນຕໍ່ໄປ.
ສະຫະນະຄອນ ເອເມຣັດ ອາຣັບເປັນປະເທດຜູ້ຜະລິດນ້ຳມັນລາຍໃຫຍ່ອັນດັບທີ 4 ຂອງໂລກ, ແຕ່ໃນຂະນະດຽວກັນກໍພະຍາຍາມຊຸກຍູ້ໃຫ້ເປັນສູນກາງພະລັງງານໝູນວຽນ ໂດຍມີການສ້າງໂຮງໄຟຟ້າພະລັງງານແສງຕາເວັນ ຫລື ໂຊລາຟາມ ຂຶ້ນຫລາຍແຫ່ງ ລວມທັງເປັນທີ່ຕັ້ງສຳນັກງານໃຫຍ່ຂອງທະບວງການພະລັງງານໝູນວຽນສາກົນ (IRENA) ເຊິ່ງເປັນອົງການສາກົນທີ່ມຸ່ງເນັ້ນສົ່ງເສີມການໃຊ້ພະລັງງານໝູນວຽນແບບຍືນຍົງ.
