ລາວໂຕໂຢຕ້າ ຍັງຄອງອັນດັບ 1 ຂອງຕາຕະລາງຮອບຂາກັບ

ສະໂມສອນລາວໂຕໂຢຕ້າ ເອັຟຊີ ຍັງເປັນສະໂມສອນທີ່ຄອງອັນດັບທີ 1 ຂອງຕາຕະລາງຄະແນນໃນຮອບຂາກັບ ການແຂ່ງຂັນເປບຊີ ລາວພຣີເມຍລີກ 2018 ພາຍຫລັງລົງສະໜາມ 8 ຄັ້ງ ຊະນະ 6 ຄັ້ງ ເສຍ 1 ຄັ້ງ ສະເໝີ 1 ຄັ້ງ ລວມມີ 19  ຄະແນນ. ຂະນະທີ່ອັນດັບທີ 2 ແລະ ອັນດັບທີ 3 ຫ່າງກັນພຽງແຕ່ 2 ຄະແນນເທົ່ານັ້ນ.

ການແຂ່ງຂັນເປບຊີ ລາວພຣີເມຍລີກ 2018 ໄດ້ດໍາເນີນມາໃນຮອບຂາກັບ ເຊິ່ງມີຫລາຍສະ​ໂມສອນກໍສາມາດຫຍັບຂຶ້ນອັນດັບທີ່ດີ. ຂະນະທີ່ສະໂມສອນ ປກສ ເອັຟຊີ ລົງສະໜາມ 8 ຄັ້ງ ຊະນະ 4 ຄັ້ງ ສະເໝີ 1 ຄັ້ງ ເສຍ 3 ຄັ້ງ ລວມມີ 13 ຄະແນນ ເຊິ່ງຈັດຢູ່ອັນດັບທີ 2 ຂອງຕາຕະລາງຄະແນນ ມີຄະແນນຫ່າງຈາກສະໂມສອນຊ້າງນ້ອຍ ເອັຟຊີ ພຽງ 2 ຄະແນນເທົ່ານັ້ນ, ສໍາລັບສະໂມສອນ ຊ້າງນ້ອຍ ເອັຟຊີ ລົງສະໜາມ 8 ຄັ້ງ ຊະນະ 3 ຄັ້ງ ສະເໝີ 2 ຄັ້ງ ເສຍ 3 ຄັ້ງ ລວມມີ 11 ຄະແນນ ຈັດຢູ່ອັນດັບທີ 3 ຂອງຕາຕະລາງຄະແນນ. ສ່ວນສະໂມສອນຫລວງພະບາງ ຢູໄນເຕັດ ຍັງຮັກສາອັນດັບທີ 4 ຂອງຕົນເອງໄວ້ ຫລັງຈາກລົງສະໜາມ 8 ຄັ້ງ ຊະນະ 2 ຄັ້ງ ສະເໝີ 4 ຄັ້ງ ເສຍ 2 ຄັ້ງ ລວມມີ 10 ຄະແນນ. ສະໂມສອນ ກອງທັບ ເອັຟຊີ ແລະ ສະໂມສອນ ມາສເຕີ 7 ເອັຟຊີ ຍັງຮັກສາອັນດັບຂອງຕົນເອງໄວ້. ສ່ວນສະໂມສອນ ດີເຄ ເອັຟຊີ ລົງຈາກອັນດັບທີ 7 ເປັນອັນດັບທີ 8 ຂອງຕາຕະລາງຄະແນນປະຈໍາອາທິດນີ້.