ຂີ້ເຫຍື້ອປຣາສະຕິກໃນທະເລໂລກ ເຄິ່ງໜຶ່ງມາຈາກ 5 ປະເທດອາຊີ
ກຸ່ມອະນຸລັກສິ່ງແວດລ້ອມເຕືອນວ່າ: ອາຊີກຳລັງຜະເຊີນວິກິດຂີ້ເຫຍື້ອປຣາສະຕິກ ເພາະລາຍງານປີ 2014 ລະບຸວ່າ: ຂີ້ເຫຍື້ອປຣາສະຕິກທີ່ຖືກຖິ້ມໃນມະຫາສະໝຸດທົ່ວໂລກປີລະ 8 ລ້ານໂຕນ ຫລື ສະເລ່ຍນາທີລະ 1 ຄັນລົດບັນທຸກ ກວ່າເຄິ່ງໜຶ່ງເປັນຂີ້ເຫຍື້ອຈາກຈີນ, ອິນໂດເນເຊຍ, ຟີລິບປິນ, ຫວຽດນາມ ແລະ ໄທ.
ກຸ່ມສິ່ງແວດລ້ອມລະບຸວ່າ: ທັງ 5 ປະເທດນີ້ມີປຣາສະຕິກແຊກຢູ່ໃນຊີວິດປະຈຳວັນ, ແຕ່ພັດມີການກຳຈັດຂີ້ເຫຍື້ອປຣາສະຕິກຢ່າງເໝາະສົມພຽງ 40% ເທົ່ານັ້ນ, ຖ້າອັດຕາການໃຊ້ ແລະ ຖິ້ມປຣາສະຕິກຍັງບໍ່ຫລຸດລົງ ທະເລໂລກຈະມີຂີ້ເຫຍື້ອປຣາສະຕິກເພີ່ມຂຶ້ນເປັນ 250 ລ້ານໂຕນພາຍໃນ 7 ປີ ແລະ ອາດຈະມີຂີ້ເຫຍື້ອປຣາສະຕິກຫລາຍກວ່າປາພາຍໃນ 32 ປີ.
ວິກິດຂີ້ເຫຍື້ອປຣາສະຕິກກຳລັງເປັນບັນຫາໃຫຍ່ຂອງໂລກ ເຮັດໃຫ້ວັນສິ່ງແວດລ້ອມໂລກປີນີ້ກຳນົດບັນຫາຫລັກໃນການປຸກລະດົມເລື່ອງ Beat Plastic Pollution ໂດຍໃຊ້ຄຳຂວັນວ່າ: If you can’t reuse if, refuse it ຫລື ຮັກໂລກ ເລີກປຣາສະຕິກ. ຜູ້ຊ່ຽວຊານເຕືອນວ່າ: ປຣາສະຕິກນອກຈາກເປັນບັນຫາໃນການກຳຈັດແລ້ວ ຍັງເຮັດໃຫ້ສັດນ້ຳຈຳນວນຫລາຍຕາຍ, ຫລ້າສຸດພົບວ່າປາວານໂຕໜຶ່ງທາງຕອນໃຕ້ຂອງໄທທີ່ຕາຍໃນອາທິດກ່ອນໃນທ້ອງມີຖົງປຣາສະຕິກສູງເຖິງ 80 ຖົງ ແລະ ຮ້າຍແຮງໄປກວ່ານັ້ນ ປຣາສະຕິກອາດເປັນໄພທີ່ເບິ່ງບໍ່ເຫັນ. ນ້ຳປະປາ, ນ້ຳໃຕ້ດິນ ແລະ ປາທີ່ຊາວອາຊີບໍລິໂພກວັນລະຫລາຍລ້ານໂຕປົນເປື້ອນໄມໂຄຣປຣາສະຕິກທີ່ແຕກຕົວຈາກປຣາສະຕິກ ແລະ ສາມາດດູດຊຶມສານພິດໄວ້ເປັນຈຳນວນຫລາຍ.
