ອາຣັບບີ ຊາອຸດິດ ເລີ່ມອອກໃບຂັບຂີ່ໃຫ້ຜູ້ຍິງ
ລັດຖະບານອາຣັບບີ ຊາອຸດິດ ເລີ່ມອອກໃບຂັບຂີ່ໃຫ້ຜູ້ຍິງ ເຊິ່ງຜ່ານການທົດສອບ. ຖືເປັນການປ່ຽນແປງທາງສັງຄົມຄັ້ງປະຫວັດສາດ ເພື່ອກຽມພ້ອມກ່ອນກົດໝາຍຫ້າມຜູ້ຍິງຂັບລົດຈະຢຸດຕິໃນທ້າຍເດືອນນີ້.
ສຳນັກຂ່າວຕ່າງປະເທດລາຍງານວ່າ: ສູນຂໍ້ມູນຂ່າວສານຂອງກະຊວງຂ່າວສານອາຣັບບີ ຊາອຸດິດ ອອກຖະແຫລງການໃນວັນທີ 4 ມິຖຸນາວ່າ: ຜູ້ຍິງຊາວອາຣັບບີ ຊາອຸດິດ 10 ຄົນ ສ້າງປະຫວັດສາດໄດ້ຮັບໃບອະນຸຍາດຂັບຂີ່ລົດສ່ວນບຸກຄົນ ແລະ ຄາດວ່າໃນອາທິດໜ້າຈະມີຜູ້ຍິງຊາວອາຣັບບີ ຊາອຸດິດສະໝັກເສັງຂໍຮັບໃບຂັບຂີ່ເພີ່ມອີກບໍ່ຕໍ່າກວ່າ 2.000 ຄົນ ທັງໃນນະຄອນຫລວງຣິຢາດ ແລະ ເມືອງໃຫຍ່ອີກຫລາຍແຫ່ງ ໂດຍການເຄື່ອນໄຫວດັ່ງກ່າວຂອງລັດຖະບານອາຣັບບີ ຊາອຸດິດ ເກີດຂຶ້ນກ່ອນກົດໝາຍຫ້າມຜູ້ຍິງຂັບລົດຈະສິ້ນສຸດໃນວັນທີ 24 ມິຖຸນານີ້ ໝົດຍຸກການເປັນປະເທດດຽວໃນໂລກທີ່ບໍ່ອະນຸຍາດໃຫ້ຜູ້ຍິງຂັບລົດດ້ວຍຕົນເອງ.
