WWF ສະແດງຄວາມຊົມເຊີຍລາວມີຄວາມເຂັ້ມງວດສະກັດກັ້ນການຂາຍສັດປ່າຫວງຫ້າມ
ພາຍຫລັງທ່ານນາຍົກລັດຖະມົນຕີແຫ່ງ ສປປ ລາວ ໄດ້ອອກຄໍາສັ່ງສະບັບ ເລກທີ 05/ນຍ ລົງວັນທີ 8 ພຶດສະພາ 2018 ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ, ກວດກາສັດປ່າ ແລະ ພືດປ່າຫວງຫ້າມ, ຊຶ່ງມໍ່ໆມານີ້, ອົງການກອງທຶນອະນຸລັກທໍາມະຊາດໂລກ (WWF) ໄດ້ສະແດງຄວາມຊົມເຊີຍວ່າ: ຈະເປັນບາດກ້າວອັນສຳຄັນຕໍ່ການຢຸດຕິການຄ້າ-ຂາຍສັດປ່າທີ່ຜິດກົດໝາຍ, ລວມທັງການສ້າງຟາມເສືອ ແລະ ຟາມໝີ, ການລ່າສັດ ແລະ ຄ້າ-ຂາຍສັດປ່າປະເພດຫວງຫ້າມ. ຖ້າຫາກຄຳສັ່ງດັ່ງກ່າວ, ໄດ້ຮັບການຈັດຕັ້ງປະຕິບັດຢ່າງເຂັ້ມງວດ, ປະເທດລາວ ຈະກາຍເປັນຜູ້ນຳໃນລະດັບພາກພື້ນ ຕໍ່ການຢັບຢັ້ງຂະບວນການຄ້າ-ຂາຍສັດປ່າ, ທີ່ມີມູນຄ່າຫລາຍພັນລ້ານໂດລາ ທີ່ສົ່ງຜົນໃຫ້ສັດຫລາຍຊະນິດເຊັ່ນ: ເສືອ, ຊ້າງ, ລີ່ນ ແລະ ໝີ ສູນພັນໄດ້.
ທ່ານນາຍົກລັດຖະມົນຕີ ເນັ້ນເຖິງບັນດາລັດຖະມົນຕີ, ຫົວໜ້າອົງການລັດທຽບເທົ່າ, ເຈົ້າຄອງນະຄອນຫລວງວຽງຈັນ ແລະ ບັນດາເຈົ້າແຂວງທົ່ວປະເທດ ໃຫ້ເພີ່ມທະວີຄວາມເຂັ້ມງວດຕໍ່ການຈັດຕັ້ງປະຕິບັດວຽກງານບັງຄັບໃຊ້ກົດໝາຍ ວ່າດ້ວຍການການຄຸ້ມຄອງ ແລະ ກວດກາການຄ້າ-ຂາຍສັດປ່າ ເພື່ອໃຫ້ສອດຄ່ອງກັບກົດໝາຍພາຍໃນປະເທດ ແລະ ສົນທິສັນຍາສາກົນ.
ທ່ານ ສົມພອນ ບົວສະຫວັນ, ຫົວໜ້າອົງການ WWF-Laos ໄດ້ສະແດງຄວາມຊົມເຊີຍລັດຖະ ບານລາວ ທີ່ຈະສຸມໃສ່ການແກ້ໄຂບັນຫາການຄ້າ-ຂາຍສັດປ່າທີ່ຜິດກົດໝາຍ ອັນເປັນໄພຂົ່ມຂູ່ໃຫ້ແກ່ສັດ ປ່າ ໂດຍສະເພາະຊະນິດທີ່ໃກ້ສູນພັນ ເຊັ່ນ: ເສືອ, ຊ້າງ, ໝີ ແລະ ລີ່ນ. ພ້ອມຢືນຢັນວ່າ ເປັນໂອກາດອັນສຳຄັນ ຂອງ ສປປ ລາວ ທີ່ຈະສະແດງອອກໃນການຕໍ່ຕ້ານການຄ້າ-ຂາຍສັດປ່າ ທີ່ ຜິດກົດໝາຍ ແລະ ເພື່ອເຮັດໃຫ້ສັດປ່າໄດ້ຮັບການຄຸ້ມຄອງ.
ອົງການ WWF ພ້ອມຈະໃຫ້ການສະໜັບສະໜູນດ້ານວິຊາການແກ່ລັດຖະບານລາວ, ເພື່ອໃຫ້ທຸກພາກສ່ວນໄດ້ຈັດຕັ້ງປະຕິບັດຢ່າງເຂັ້ມງວດ ເຊິ່ງຈະກາຍເປັນບາດກ້າວອັນສຳຄັນ ໃຫ້ແກ່ການອະນຸລັກສັດປ່າ. ຄຳສັ່ງສະບັບນີ້, ຍັງໄດ້ເນັ້ນໃຫ້ທຸກພາກສ່ວນກ່ຽວຂ້ອງ ບັງຄັບໃຊ້ກົດໝາຍເພື່ອຢຸດຕິການລ່າສັດປ່າທຸກປະເພດ, ນັບທັງການນຳເຂົ້າ-ສົ່ງອອກ, ການນຳຜ່ານ ແລະ ການຄ້າຂາຍຊິ້ນສ່ວນສັດປ່າທີ່ຫວງຫ້າມ, ທັງໃຫ້ຢຸດຕິການສ້າງຟາມສັດປ່າ ແລະ ຟາມທີ່ມີຢູ່ແລ້ວ ໃຫ້ຫັນໄປສູ່ການລ້ຽງແບບຟາມເປີດ ຫລື ສວນສັດ ເພື່ອການອະນຸຮັກ, ການທ່ອງທ່ຽວ ແລະ ການຄົ້ນຄວ້າທາງວິທະຍາສາດເທົ່ານັ້ນ. ໃນຂະນະດຽວກັນ, ໃຫ້ບັນດາເຈົ້າໜ້າທີ່ເຂັ້ມງວດໃນການກວດກາ ແລະ ລາດຕະເວນຕາມ ເຂດທີ່ຫລໍ່ແຫລມ, ດ່ານຂາເຂົ້າ-ຂາອອກ, ເຂດເສດຖະກິດພິເສດ ແລະ ເຂດອື່ນໆ. ຜູ້ກະທຳຜິດກ່ຽວກັບການຂ້າຂາຍ, ເຄື່ອນຍ້າຍສັດປ່າຈະຖືກດຳເນີນການສືບສວນ-ສອບສວນ ແລະ ດຳເນີນຄະດີ. ພ້ອມດຽວກັນນັ້ນ, ຍັງໃຫ້ມີການຢຸດຕິການນຳເຂົ້າສັດປ່າ ໃນດ່ານພາສີສາກົນ ແລະ ຕາມເຂດຊາຍແດນ.
ປັດຈຸບັນ, ອົງການ WWF ໄດ້ສະໜັບສະໜູນແຜນງານ ການຕໍ່ຕ້ານການຄ້າຂາຍສັດປ່າ ໃນພາກ ພື້ນແມ່ນ້ຳຂອງ, ລວມທັງ ສປປ ລາວ, ເຊິ່ງການລ່າສັດປ່າ ແລະ ການຄ້າສັດປ່າແບບຜິດກົດໝາຍ ສົ່ງ ຜົນໃຫ້ມີການຫລຸດລົງຂອງປະຊາກອນຂອງສັດທີ່ໃກ້ຈະສູນ. ຈຸດປະສົງລວມຂອງແຜນງານ ກໍເພື່ອຫລຸດ ຜ່ອນຄວາມຕ້ອງການ ຂອງຜະລິດຕະພັນທີ່ເຮັດມາຈາກສັດປ່າ ແລະ ສະໜັບສະໜູນການປັບປຸງຄວາມອາດສາມາດຂອງໜ່ວຍງານລາດຕະເວນ ແລະ ກິດຈະກຳ ການບັງຄັບໃຊ້ກົດໝາຍສັດປ່າ ແລະ ກິດຈະກໍາສ້າງຄວາມອາດສາມາດ ໃຫ້ກັບກົມກວດກາປ່າໄມ້ ແລະ ພະແນກທີ່ກ່ຽວຂ້ອງຕ່າງໆ.
