ມາສເຕີ 7 ເອັຟຊີ ເອົາຊະນະ ຫລວງພະບາງ ຢູໄນເຕັດ 2-1

ສະໂມສອນມາສເຕີ 7 ເອັຟຊີ ສາມາດເອົາຊະນະ ສະໂມສອນຫລວງພະບາງ ຢູໄນເຕັດ 2-1 ເຖິງຖິ່ນໃນວັນທີ 3 ມິຖຸນາຜ່ານມານີ້ ທີ່ສະໜາມກິລາຫລວງພະບາງ ແຂວງຫລວງພະບາງ ຂອງການແຂ່ງຂັນເປັບຊີ ລາວພຣີເມລີກ 2018.

ສະໂມສອນມາສເຕີ 7 ເອັຟຊີ ໄດ້ປະຕູຂຶ້ນນໍາ ສະໂມສອນຫລວງພະບາງ ຢູໄນເຕັດ 1-0 ໃນນາທີ 1 ຈາກຜູ້ຫລິ້ນທ້າວ shin yutaro ຈົບເກມໃນເຄິ່ງເວລາທໍາອິດ ສະໂມສອນ ມາສເຕ 7 ເອັຟຊີ ເປັນຝ່າຍຂຶ້ນນໍາ ສະໂມສອນຫລວງພະບາງ ຢູໄນເຕັດ ແຕ່ພໍເຂົ້າເຄິ່ງ​ເວລາ​ທີ​ສອງ ສະໂມສອນຫລວງພະບາງ ຢູໄນເຕັດ ເປັນຝ່າຍທີ່ຫລິ້ນບານ ແລະ ຄອງບານໄດ້ຫລາຍກວ່າ ຈົນມາຮອດນາທີ 71 ສາມາດຍິງປະຕູຕີສະເໝີໄດ້ເປັນ 1-1 ຈາກລູກຍິງຂອງທ້າວ MIKAEL ANNY ແຕ່ສະໂມສອນມາສເຕີ 7 ເອັຟຊີ ສາມາດຍິງປະຕູໄຊໄດ້ໃນນາທີ 81 TASHIRO CHIKARA ຈົບເກມສະໂມສອນ ມາສເຕີ 7 ເອັຟຊີ ເອົາຊະນະສະໂມສອນ ຫລວງພະບາງ ຢູໄນເຕັດ 2-1.

ສ່ວນຜົນການແຂ່ງຂັນວັນທີ 2 ມິຖຸນາ ສະໂມສອນລາວໂຕໂຢຕ້າ ເອັຟຊີ ສາມາດເອົາຊະນະສະໂມສອນ ຊ້າງນ້ອຍ ເອັຟຊີ 3-1, ສະໂມສອນກອງທັບ ເອັຟຊີ ສາມາດເອົາຊະນະສະໂມສອນ ປກສ ເອັຟຊີ 1-0, ສະໂມສອນສຫວັນ ຢູໄນເຕັດ ສາມາດເອົາຊະນະສະໂມສອນ ດີເຄ ເອັຟຊີ 1-0.