ລາວຫາລືການສົ່ງເສີມພາຫະນະນຳໃຊ້ພະລັງງານສະອາດ
ເມື່ອທ້າຍອາທິດຜ່ານມານີ້, ສະຖາບັນສົ່ງເສີມພະລັງງານທົດແທນກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມປຶກສາຫາລືກ່ຽວກັບການສົ່ງເສີມການພັດທະນາພາຫະນະໃຫ້ນຳໃຊ້ພະລັງງານສະອາດໃນອານາຄົດ, ໂດຍສະເພາະການລະດົມຄວາມຄິດເຫັນໃສ່ຮ່າງຍຸດທະສາດເພື່ອສົ່ງເສີມການພັດທະນາພາຫະນະທີ່ນຳໃຊ້ພະລັງງານສະອາດໃນ ສປປ ລາວ ແລະ ມີຄວາມຈຳເປັນ ຈະໄດ້ກຳນົດເປັນວິໄສທັດຮອດປີ 2050, ຍຸດທະສາດ 2030 ແລະ ແຜນພັດທະນາຮອດປີ 2025 ເພື່ອສາມາດກຳນົດລະບຽບຫລັກການ, ມາດຕະການ, ເຄື່ອງມືຄຸ້ມຄອງມະຫາພາກ ເພື່ອສົ່ງເສີມໃຫ້ມີການພັດທະນາຢ່າງແທ້ຈິງ ແລະ ເປັນຮູບປະທຳ ແລະ ເໝາະສົມກັບສະພາບເງື່ອນໄຂຂອງ ສປປ ລາວ ແນໃສ່ໃຫ້ມີການປະຢັດ ແລະ ອະນຸລັກພະລັງງານໃນພາກຂົນສົ່ງ, ຫລຸດຜ່ອນການນຳເຂົ້ານ້ຳມັນເຊື້ອໄຟ, ເພີ່ມການນຳໃຊ້ພະລັງງານໄຟຟ້າໃຫ້ມີປະສິດທິຜົນສູງ ເພື່ອສ້າງມູນຄ່າເພີ່ມ ແລະ ສ້າງເງື່ອນໄຂໃໝ່ໃນລະບົບການຄົມມະນາຄົມຂົນສົ່ງ ເພື່ອເພີ່ມຄວາມໝັ້ນຄົງດ້ານພະລັງງານພາຍໃນປະເທດໃຫ້ນັບມື້ດີຂຶ້ນ.
ກອງປະຊຸມ, ໄດ້ມີການແລກປ່ຽນບົດຮຽນການພັດທະນາພາຫະນະທີ່ໃຊ້ພະລັງງານສະອາດຂອງ ສປ ຈີນ ແລະ ມີພິທີລົງນາມບົດບັນທຶກການຮ່ວມມືດ້ານວິຊາການເພື່ອສຶກສາຄວາມເປັນໄປໄດ້ໃນການພັດທະນາພາຫະນະທີ່ແລ່ນດ້ວຍພະລັງງານໄຟຟ້າໃນ ສປປ ລາວ ລະຫວ່າງສະຖາບັນສົ່ງເສີມພະລັງງານທົດແທນກັບ ບໍລິສັດ ຫລວງປະສົງກໍ່ສ້າງ ຈຳກັດຜູ້ດຽວ ແລະ ບໍລິສັດ Chosen Energy ຈຳກັດ ເພື່ອເປັນບາດກ້າວເລີ່ມຕົ້ນຂອງໂຄງການສາທິດທົດລອງໃນຕໍ່ໜ້າ.
ກອງປະຊຸມດັ່ງກ່າວ, ໂດຍການເປັນປະທານຂອງທ່ານ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ມີຫົວໜ້າສະຖາບັນ, ກົມ, ຫ້ອງການ, ລັດວິສາຫະກິດ ແລະ ບັນດາບໍລິສັດກ່ຽວຂ້ອງຕ່າງໆເຂົ້າຮ່ວມເປັນຈໍານວນຫລາຍ.
