6 ວິທີການລ້ຽງລູກແບບຜິດໆ

ພໍ່ແມ່ ຫຼື ຜູ້ປົກຄອງຫຼາຍຄົນອາດຈະບໍ່ທັນຮູ້ໂຕ ຫຼື ສັງເກດວ່າ ພຶດຕິກໍາ ຫຼື ສິ່ງທີ່ເຮົາສອນລູກນັ້ນເປັນການທໍາຮ້າຍເຂົາ ທັງທາງກົງ ແລະ ທາງອ້ອມແບບຮູ້ເທົ່າບໍ່ເຖິງການ ແລະ ມາເບິ່ງວ່າພຶຶດຕິກໍາໃດແດ່ທີ່ເຮົາບໍ່ຄວນນໍາໄປສອນ ຫຼື ໃຊ້ກັບລູກ.

1. ຢ່າເອົາຄວາມຝັນໃນໄວເດັກມາຕັ້ງເປົ້າໝາຍກັບເຂົາໃຫ້ເດີນຮອຍຕາມ: ທຸກຄົນມີຄວາມຝັນບໍ່ຄືກັນ ແລະ ລູກກໍຄືກັນເຂົາອາດມີຄວາມຝັນ ແລະ ຈິນຕະນາການຂອງເຂົາ ການນໍາເອົາຄວາມຝັນຂອງເຮົາເປັນເປົ້າໝາຍໃຫ້ເຂົາເຮັດຕາມນັ້ນເປັນສິ່ງທີ່ຜິດ ເຮັດໃຫ້ເຂົາອຶດອັດ ແລະ ອາດເຮັດໃຫ້ເຂົາຕ້ອງທົນເຮັດໃນສິ່ງທີ່ເຂົາບໍ່ມັກໄປຕະຫຼອດຊີວິດ.
2. ປຽບທຽບລູກຂອງຕົນກັບເດັກນ້ອຍຄົນອື່ນເປັນປະຈໍາ: ການປຽບທຽບເຂົາກັບເດັກນ້ອຍຄົນອື່ນຕະຫຼອດເວລາ ບໍ່ວ່າຈະເປັນດ້ານໃດ ຈະເຮັດໃຫ້ເຂົາຮູ້ສຶກກົດດັນ ຮູ້ສຶກວ່າຕົນເອງມີປົມດ້ອຍ, ຮູ້ສຶກວ່າພໍ່ແມ່ບໍ່ຮັກແຕ່ໄປຮັກຄົນອື່ນຫຼາຍກວ່າ ເຮັດໃຫ້ເຂົາຮູ້ສຶກອ່ອນແອ ແລະ ສະແດງອອກມາເປັນການຕໍ່ຕ້ານ.
3. ສະລະພັດການຮຽນພິເສດ: ແມ່ນຢູ່ວ່າການຮຽນພິເສດເປັນສິ່ງທີ່ດີ ແຕ່ຕ້ອງຖາມຄວາມສະໝັກໃຈເຂົາກ່ອນ ບໍ່ແມ່ນວ່າໃຫ້ເຂົາເອົາແຕ່ຮຽນຈົນບໍ່ມີເວລາພັກຜ່ອນ ຫຼື ເຮັດຢ່າງອື່ນ ຢ່າລັກເວລາໃນຊີວິດຂອງລູກໄປໂດຍເຂົາບໍ່ຍິນຍອມ.
4. ປົກປ້ອງລູກຈົນເກີນໄປ: ການປົກປ້ອງລູກເປັນສິ່ງທີ່ພໍ່ແມ່ຄວນເຮັດ ແຕ່ຕ້ອງປົກປ້ອງເຂົາແບບທາງສາຍກາງ ບາງຢ່າງຕ້ອງປ່ອຍໃຫ້ເຂົາຮຽນຮູ້ເອງ ໃຫ້ເຂົາຮູ້ຈັກແພ້ ຫຼື ຊະນະ ແລະ ແກ້ໄຂບັນຫາດ້ວຍໂຕເຂົາເອງກ່ອນ ຈະຕ້ອງຮ້ອງຂໍຄວາມຊ່ວຍເຫຼືອຈາກຄົນອື່ນ ເຮົາບໍ່ສາມາດປົກປ້ອງເຂົາໄດ້ຕະຫຼອດເວລາ ດັ່ງນັ້ນ ສິ່ງທີ່ດີທີ່ສຸດຄືສອນໃຫ້ລູກຮູ້ຈັກປົກປ້ອງໂຕເອງຈາກສັງຄົມທີ່ໂຫດຮ້າຍໃຫ້ໄດ້.
5. ເບິ່ງສິ່ງທີ່ເຂົາຮັກເປັນເລື່ອງໄຮ້ສາລະ: ການທີ່ເຂົາມີຄວາມຖະນັດ ແລະ ມັກເຮັດສິ່ງໃດເປັນພິເສດ ພໍ່ແມ່ຄວນປ່ອຍໃຫ້ລູກຮຽນຮູ້ ແລະ ເຮັດໃນສິ່ງນັ້ນ ແຕ່ຫາກຢູ່ໃນໄວຮຽນ ຫຼື ຊ່ວງເວລາທີ່ບໍ່ເໝາະສົມ ອາດຈະບອກເຂົາ ຫຼື ອະທິບາຍດ້ວຍເຫດຜົນ ບໍ່ແມ່ຫ້າມ ຫຼື ດູຖູກໃນສິ່ງທີ່ເຂົາຄິດໃນທັນທີ.
6. ໃຫ້ທ້າຍລູກ: ລູກເຮັດຖືກໄດ້ກໍຍ່ອມເຮັດຜິດໄດ້ ພໍ່ແມ່ມີໜ້າທີ່ຄອຍຊີ້ແນະເຂົາໄດ້ດໍາເນີນຊີວິດທີ່ຖືກຕ້ອງ ການໃຫ້ທ້າຍລູກໃນສິ່ງທີ່ຄວນສອນ ຫຼື ຕັກເຕືອນ ຈະເຮັດໃຫ້ເຂົາເຄີຍໂຕ ແລະ ບໍ່ຢ້ານ ຫຼື ບໍ່ເຄົາລົບໃຜ.