ເຫດການເດັກນ້ອຍເບື່ອເຂົ້າໜົມທີ່ເມືອງຮ້ຽມມີແທ້ ຍ້ອນເຂົ້າໜົມໝົດອາຍຸການນຳໃຊ້
ໂຮງໝໍເມືອງ ຮ້ຽມ ແຂວງ ຫົວພັນ ຢືນຢັນວ່າ: ໃນວັນທີ 28 ພຶດສະພາ ນີ້, ໄດ້ມີປະຊາຊົນ ຄອບຄົວໜຶ່ງ ຢູ່ບ້ານ ນາວຽງ ເມືອງ ຮ້ຽມ ແຂວງດັ່ງກ່າວ, ໄດ້ນຳເອົາລູກຂອງຕົນ ທີ່ເປັນເພດຍິງ ອາຍຸ 4 ປີ, ມາປິ່ນປົວຢູ່ໂຮງໝໍ ພາຍຫລັງ ມີອາການເປັນຜື່ນຕາມຕົນໂຕ ແລະ ຄັນ, ພ້ອມທັງຫາຍໃຈຝຶດ ຍ້ອນກິນເຂົ້າໜົມທີ່ຜະລິດຈາກ ສສ ຫວຽດນາມ ແລະ ເກີດເປັນພູມແພ້, ຈຶ່ງໄດ້ປິ່ນປົວໃຫ້ກິນຢາ ແລະ ໃຫ້ຜູ້ປົກຄອງ ນຳເມືອບ້ານພັກຜ່ອນຕິດຕາມອາການ, ຊຶ່ງຈາກການກວດກາຂອງແພດໝໍ ໄດ້ພົບວ່າ: ເຂົ້າໜົມທີ່ເດັກນຳມາກິນນັ້ນ ແມ່ນໝົດຄຸນນະພາບແລ້ວ, ເຮັດໃຫ້ເປັນອັນຕະລາຍຕໍ່ຜູ້ບໍລິໂພກ, ສະນັ້ນ ຈຶ່ງຢາກໃຫ້ໜ່ວຍງານທີ່ກ່ຽວຂ້ອງຕ້ອງໄດ້ເອົາໃຈໃສ່ລົງກວດກາສິນຄ້າ ເພື່ອສະກັດກັ້ນສິນຄ້າເສຍຄຸນ ຫລື ໝົດອາຍຸນຳໃຊ້ ເພື່ອບໍ່ໃຫ້ເປັນອັນຕະລາຍຕໍ່ຜູ້ບໍລິໂພກ.
