ຢູຟາ ຕັດສິນວ່າ ຣາມອສ ບໍ່ຜິດ ຈັງຫວະເຮັດໃຫ້ ຊາລາ ລົ້ມຈົນເຈັບໜັກ
May 30, 2018 - 6:01 PM
ເຊີຄິໂອ ຣາມອສ ກອງຫລັງຂອງ ຣີລ ມາດຣິດ ຖືກວິຈານຢ່າງໜັກຈາກແຟນບານຂອງ ລິເວີພູລ ແລະ ນັກວິຈານຫລາຍຄົນ ຈາກການທີ່ປະທະກັບ ໂມຮາເໝັດ ຊາລາ ກອງໜ້າຕົວຄວາມຫວັງຂອງ ລິເວີພູລ ຈົນເຈັບໜັກຕັ້ງແຕ່ຕົ້ນເກມ ຈົນເຮັດໃຫ້ຕ້ອງອອກຈາກສະໜາມໄປ, ແຕ່ກຳມະການພັດບໍ່ໃຫ້ໃບເຫລືອງແຕ່ຢ່າງໃດ ກ່ອນທີ່ ລິເວີພູລ ຈະເສຍ 1-3 ສົ່ງໃຫ້ ຣີລ ມາດຣິດ ຄວ້າແຊ້ມ ຢູຟາ ແຊມປ້ຽນລີກ ໄປຄອງ.
ຫລ້າສຸດ ສະຫະພັນບານເຕະເອີຣົບ (ຢູຟາ) ໄດ້ສະແດງຈະແຈ້ງແລ້ວວ່າ: ຈະບໍ່ມີການລົງໂທດຢ້ອນຫລັງໃດໆຕໍ່ເຫດການດັ່ງກ່າວ ຫລັງບໍ່ພົບວ່າ ຣາມອສ ເຂົ້າປະທະທີ່ຜິດກົດລະບຽບ. ນອກຈາກນີ້ ຈາກການເບິ່ງວີດີໂອຢ້ອນຫລັງ ເບິ່ງຄືວ່າ ຣາມອສ ເປັນຝ່າຍຖືກຍູ້ອີກດ້ວຍ.
