ມຊ ຖືກຕ້ອນຮັບຢ່າງອົບອຸ່ນຫລັງຍາດໄດ້ອັນດັບທີ 2 ທີ່ ສປ ຈີນ
ໃນວັນທີ 29 ພຶດສະພານີ້ ທີ່ສະໜາມບິນວັດໄຕ ໄດ້ມີພິທີຕ້ອນຮັບຄະນະນໍານັກກິລາ ມະຫາວິທະຍາໄລແຫ່ງຊາດ ຫລື ມຊ ທີ່ຍາດໄດ້ອັນດັບທີ 2 ໃນການແຂ່ງຂັນບານເຕະນັກສຶກສາ ວິທະຍາໄລຕອນໃຕ້ ແລະ ອາຊີຕາເວັນອອກສຽງໃຕ້ ຄັ້ງທີ 4 (4th South and Southeast Asia College Student Culture and Sports Week) ທີ່ຈັດຂຶ້ນທີ່ມະຫາວິທະຍາໄລເຕັກໂນໂລຊີຄຸນໝິງ ສປ ຈີນ ຕ້ອນຮັບໂດຍທ່ານ ອານຸລົມ ວິໄລພອນ ຄະນະບໍດີຄະນະວິທະຍາສາດການກິລາ-ກາຍະກໍາ ມຊ ພ້ອມດ້ວຍຄະນະ.
ການແຂ່ງຂັນຄັ້ງນີ້ ສປປ ລາວ ສົ່ງນັກກິລາເຂົ້າຮ່ວມພຽງໜຶ່ງປະເພດຄື: ບານເຕະຊາຍ ທີມ ມຊ ແລະ ທີມມະຫາວິທະຍາໄລສຸພານຸວົງ ການແຂ່ງຂັນໄດ້ດຳເນີນໃນລະຫວ່າງວັນທີ 21-28 ພຶດສະພາ 2018 ໂດຍມີ 5 ຊາດຄື: ສປປ ລາວ, ສິງກະໂປ, ສສ ຫວຽດນາມ, ໄທ ແລະ ມາເລເຊຍ ສ່ວນມະຫາວິທະຍາໄລຕອນໃຕ້ມີ ອິນເດຍ, ບັງກາລາເທດ ແລະ ມະຫາວິທະຍາໄລຈາກ ສປ ຈີນ ເຂົ້າຮ່ວມ. ສະເພາະກິລາບານເຕະມີ 10 ທີມ ແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1 ແລະ ທີ 2 ຜ່ານເຂົ້າໄປຫລິ້ນໃນຮອບຕໍ່ໄປ, ໃນນັ້ນ ທີມ ມຊ ຖືກຈັດຢູ່ກຸ່ມບີ ແລະ ທີມມະຫາວິທະຍາໄລ ສຸພານຸວົງ (ມສ) ຢູ່ຮ່ວມກຸ່ມເອ.
ການແຂ່ງຂັນໃນຮອບຮອງຊະນະເລີດ ທັງສອງທີມຈາກລາວພົບກັນເອງລະຫວ່າງເປັນທີມ ມຊ ກັບ ມສ ຜ່ານການແຂ່ງຂັນ ມຊ ສາມາດເອົາຊະນະໄປແບບຫວຸດຫວິດ 1-0 ປະຕູ ຜ່ານເຂົ້າຊີງຊະນະເລີດ ພົບກັບ ທີມມະຫາວິທະຍາໄລພະລະສຶກສາ ແລະ ກິລາຮ່າໂນ້ຍ ໃນຮອບຄັດເລືອກ ມຊ ຊະນະມາກ່ອນໜ້ານີ້ 3-1 ປະຕູ ຜ່ານການແຂ່ງຂັນໃນນັດຊີງຊະນະເລີດເກີດພິກລ໋ອກ ທີມມະຫາວິທະຍາໄລພະລະສຶກສາ ແລະ ກິລາຮ່າໂນ້ຍ ສາມາດແກ້ເກມມາດີລ້າງແຄ້ນເອົາຊະນະ ທີມ ມຊ ຈາກລາວໄປໄດ້ 2-0 ປະຕູ ຄວ້າແຊ້ມລາຍການນີ້ໄປຄອງ, ຂະນະທີມ ມຊ ໄດ້ຮັບຂັນຮອງແຊ້ມ ແລະ ເງິນລາງວັນ 10.000 ຢວນ ຫລື ປະມານ 12 ລ້ານກວ່າກີບ. ສ່ວນທີມມະຫາວິທະຍາໄລສຸພານຸວົງ ໄດ້ຮັບຂັນ ແລະ ເງິນລາງວັນ 5.000 ຢວນ ຫລື ປະມານ 6,4 ລ້ານກວ່າກີບ.
