ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຈະໄຂຂຶ້ນໃນວັນທີ 5 ມິຖຸນານີ້ ທີ່ນະຄອນຫລວງວຽງຈັນ
ຂປລ. ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ຈະໄດ້ໄຂຂຶ້ນຢ່າງເປັນທາງການໃນວັນທີ 5 ມິຖຸນາ 2018 ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນ ຫລວງວຽງຈັນ ຊຶ່ງຈະດໍາເນີນໄປເປັນເວລາ 18 ວັນ.
ທ່ານ ນາງ ສວນສະຫວັນ ວິຍະເກດ ກໍາມະການສໍາຮອງສູນກາງພັກ, ຄະນະປະຈໍາສະພາແຫ່ງຊາດ ໄດ້ຖະແຫລງໃຫ້ຮູ້ໃນວັນທີ 28 ພຶດສະພານີ້ວ່າ: ກອງປະຊຸມຄັ້ງນີ້ຈະໄດ້ຮັບຟັງການລາຍງານ, ພິຈາລະນາ ແລະ ຕົກລົງບັນຫາສຳຄັນຕ່າງໆດັ່ງນີ້: ຮັບຟັງບົດລາຍງານຂອງທ່ານນາຍົກລັດຖະມົນຕີ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາ 6 ເດືອນຕົ້ນປິີ 2018 ແລະ ທິດທາງວຽກງານຈຸດສຸມ ປະຈໍາ 6 ເດືອນທ້າຍປີ 2018, ມາດຕະການຊຸກຍູ້ການຂະຫຍາຍຕົວຂອງເສດຖະກິດ, ການສົ່ງເສີມທຸລະກິດຂະໜາດນ້ອຍ-ຂະໜາດກາງ, ການສົ່ງເສີມການລົງທຶນພາຍໃນ ແລະ ຕ່າງປະເທດ, ການແກ້ໄຂບັນຫາໜີ້ສິນ, ການຈັດຕັ້ງປະຕິບັດມະຕິຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII ລວມທັງຂໍ້ສະດວກ, ຂໍ້ຫຍຸ້ງຍາກ ແລະ ມາດຕະການແກ້ໄຂ ເພື່ອຮັບປະກັນໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາປີ 2018 ໃຫ້ບັນລຸຕາມຄາດໝາຍທີ່ວາງໄວ້; ຮັບຟັງບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍການອອກນິຕິກໍາລຸ່ມກົດໝາຍ; ຮັບຟັງບົດລາຍງານຂອງລັດຖະບານ ກ່ຽວກັບການປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍຜົນກະທົບຈາກການນໍາໃຊ້ເຄມີອັນຕະລາຍເກີນຄ່າມາດຕະຖານຕໍ່ສິ່ງແວດລ້ອມ, ສັງຄົມ ແລະ ທໍາມະຊາດ; ພິຈາລະນາ ແລະ ຮັບຮອງບົດລາຍງານຂອງລັດຖະບານກ່ຽວກັບແຜນແມ່ບົດຈັດສັນທີ່ດິນແຫ່ງຊາດ; ຮັບຟັງການຊີ້ແຈງສັງລວມຕໍ່ບັນຫາພົ້ນເດັ່ນທີ່ສະມາຊິກສະພາແຫ່ງຊາດຍົກຂຶ້ນ ຊຶ່ງຕິດພັນກັບການຄຸ້ມຄອງບໍລິຫານລັດຂອງລັດຖະບານ; ຮັບຟັງບົດລາຍງານກ່ຽວກັບການປະຕິບັດມະຕິກອງປະຊຸມຮ່ວມ ລະຫວ່າງ ຄະນະປະຈໍາສະພາແຫ່ງຊາດ ກັບລັດຖະບານ ສະບັບເລກທີ 0145/ຄປຈ, ລົງວັນທີ 13 ກັນຍາ 2017 ວ່າດ້ວຍການປະຕິບັດນະໂຍບາຍຊົດເຊີຍໃຫ້ແກ່ປະຊາຊົນທີ່ຖືກຜົນກະທົບຈາກໂຄງການລົງທຶນຂອງລັດ ເປັນຕົ້ນການຊົດເຊີຍຜົນກະທົບຈາກການກໍ່ສ້າງເສັ້ນທາງລົດໄຟ, ການກໍ່ສ້າງທາງດ່ວນ; ຮັບຟັງການຊີ້ແຈງກ່ຽວກັບໂຄງປະກອບລາຄານໍ້າມັນຢູ່ປະເທດເຮົາ, ສາເຫດການເພີ່ມຂຶ້ນຂອງລາຄານໍ້າມັນທີ່ສົ່ງຜົນກະທົບຕໍ່ການຜະລິດ, ຊີວິດການເປັນຢູ່ຂອງປະຊາຊົນ; ຮັບຟັງການຊີ້ແຈງກ່ຽວກັບມາດຕະການ ແລະ ວິທີການແກ້ໄຂຕໍ່ປາກົດການຫຍໍ້ທໍ້ໃນສັງຄົມ ເປັນຕົ້ນບັນຫາຢາເສບຕິດ ແລະ ບັນຫາອຸປະຕິເຫດ; ຮັບຟັງການຊີ້ແຈງກ່ຽວກັບສະພາບການຈັດຕັ້ງປະຕິບັດວຽກງານ 3 ສ້າງຕິດພັນກັບການພັດທະນາຊົນນະບົດ ແລະ ລຶບລ້າງຄວາມທຸກຍາກ; ຮັບຟັງບົດລາຍງານກ່ຽວກັບການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ຂອງຄະນະປະຈໍາສະພາແຫ່ງຊາດ; ພິຈາລະນາ ແລະ ຮັບຮອງບົດລາຍງານຂອງປະທານສານປະຊາຊົນສູງສຸດກ່ຽວກັບການສະເໜີແຕ່ງຕັ້ງສະມາຊິກສະພາຜູ້ພິພາກສາຂອງສານປະຊາຊົນສູງສຸດ. ນອກຈາກນັ້ນ, ຈະໄດ້ພິຈາລະນາ ຮັບຮອງເອົາຮ່າງກົດໝາຍສ້າງໃໝ່ ແລະ ຮ່າງກົດໝາຍປັບປຸງ ລວມທັງໝົດ 13 ສະບັບ ໃນນີ້ກົດໝາຍສ້າງໃໝ່ຈໍານວນ 5 ສະບັບຄື: ກົດໝາຍວ່າດ້ວຍການໃຫ້ວັກຊີນກັນພະຍາດ; ກົດໝາຍວ່າດ້ວຍການຈັດສັນພູມລໍາເນົາ ແລະ ອາຊີບ; ກົດໝາຍວ່າດ້ວຍປ້າຍ; ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ ແລະ ກົດໝາຍວ່າດ້ວຍສະຫະພັນນັກຮົບເກົ່າ. ສ່ວນກົດໝາຍປັບປຸງມີ 8 ສະບັບຄື: ກົດໝາຍວ່າດ້ວຍການແກ້ໄຂຂໍ້ຂັດແຍ່ງທາງດ້ານເສດຖະກິດ; ກົດໝາຍວ່າດ້ວຍອາກອນມູນຄ່າເພີ່ມ; ກົດໝາຍວ່າດ້ວຍທະນາຄານແຫ່ງ ສປປ ລາວ; ກົດໝາຍວ່າດ້ວຍປະກັນສັງຄົມ; ກົດໝາຍວ່າດ້ວຍທະບຽນຄອບຄົວ; ກົດໝາຍວ່າດ້ວຍການບິນພົນລະເຮືອນ; ກົດໝາຍວ່າດ້ວຍນາຍທະຫານກອງທັບປະຊາຊົນລາວ ແລະ ກົດໝາຍວ່າດ້ວຍແນວລາວສ້າງຊາດ.
ຂະນະດຽວກັນກໍຈະໄດ້ຮັບຮອງເອົາມະຕິ 4 ສະບັບຄື: ມະຕິຂອງກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບແຜນແມ່ບົດຈັດສັນທີ່ດິນແຫ່ງຊາດ; ມະຕິຂອງກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາການຊີ້ແຈງສະພາບພົ້ນເດັ່ນຂອງທ່ານນາຍົກລັດຖະມົນຕີ ແລະ ຂອງບັນດາທ່ານລັດຖະມົນຕີຕໍ່ບັນຫາໂຄງປະກອບລາຄານໍ້າມັນຢູ່ປະເທດເຮົາ; ມາດຕະການ ແລະ ວິທີການແກ້ໄຂຕໍ່ປາກົດການຫຍໍ້ທໍ້ໃນສັງຄົມ; ການຈັດຕັ້ງປະຕິບັດວຽກງານ 3 ສ້າງຕິດພັນກັບການພັດທະນາຊົນນະບົດ ແລະ ລຶບລ້າງຄວາມທຸກຍາກ; ມະຕິຂອງກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາການແຕ່ງຕັ້ງສະມາຊິກສະພາຜູ້ພິພາກສາຂອງສານປະຊາຊົນສູງສຸດຕາມການສະເໜີຂອງປະທານສານປະຊາຊົນສູງສຸດ ແລະ ມະຕິຂອງກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາກົດໝາຍຈໍານວນ 13 ສະບັບ. ໃນໄລຍະດຳເນີນກອງປະຊຸມສະພາແຫ່ງຊາດຄັ້ງນີ້ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນທີ່ຈະສົ່ງໄປຍັງກອງປະຊຸມດັ່ງນີ້: ໂທລະສັບບໍ່ເສຍຄ່າ ໝາຍເລກ 156; ໂທລະສານ ໝາຍເລກ: 021 413528; ສົ່ງເປັນຈົດໝາຍທາງໄປສະນີ ຕູ້ ປນ. 662 ຫລື ສົ່ງອີເມວ: na_session@na.gov.la
