ລາວສາມາດລຶບລ້າງຄອບຄົວທຸກຍາກໄດ້ລື່ນແຜນການ 17%
ໃນໄລຍະປີ (2016-2017) ຜ່ານມາລາວເຮົາໄດ້ສຸມໃສ່ແກ້ໄຂຄວາມທຸກຍາກຂອງປະຊາຊົນດີຂຶ້ນຕາມລໍາດັບຄື: ສາມາດລຶບລ້າງຄອບຄົວທຸກຍາກໄດ້ຕື່ມອີກ 6.546 ຄອບຄົວ ລື່ນລໍາດັບຄາດໝາຍແຜນການວາງໄວ້ 17%, ເຮັດໃຫ້ຄອບຄົວຜູ້ທຸກຍາກຢູ່ລາວເຮົາຍັງເຫຼືອປະມານ 69.772 ຄອບຄົວ ເທົ່າກັບ 5,47% ຂອງຈໍານວນຄອບຄົວທັງໝົດ, ສ່ວນບ້ານທຸກຍາກຍັງເຫຼືອ 1.653 ບ້ານ ແລະ ມາຮອດປັດຈຸບັນທົ່ວປະເທດໄດ້ປະກາດບ້ານພັດທະນາແລ້ວ 3.917 ບ້ານ, ເທົ່າກັບ 46,2% ຂອງຈໍານວນບ້ານທົ່ວປະເທດ ແລະ ສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດໄດ້ 3 ບ້ານ; ຄາດວ່າ: ຮອດປີ 2020, 2025 ແມ່ນຈະລຶບລ້າງບ້ານທຸກຍາກໃຫ້ໄດ້ 213 ບ້ານ ໃນ 107 ເມືອງ ຂອງ 16 ແຂວງ. ຊຶ່ງຕົວເລກດັ່ງກ່າວໄດ້ຮັບການເປີດເຜີຍຈາກທ່ານລັດຖະມົນຕີ ກະຊວງກະສິກໍາ ແລະ ປ່າໄມ້ ຢູ່ໃນກອງປະຊຸມ ສໍາມະນາວິທະຍາສາດ ກ່ຽວກັບວຽກງານພັດທະນາ ແລະ ລຶບລ້າງຄວາມທຸກຍາກ, ທີ່ໄດ້ຈັດຂຶ້ນ ໃນວັນທີ 24 ພຶດສະພາ ນີ້, ທີ່ນະຄອນຫຼວງວຽງຈັນ.
ພ້ອມນັ້ນ, ກອງປະຊຸມຍັງໄດ້ຮັບຟັງການນໍາສະເໜີຫຼາຍບົດຮຽນ ເປັນຕົ້ນແມ່ນບົດຮຽນການພັດທະນາຈຸດສຸມ, ບົດຮຽນແກ້ໄຂຄວາມທຸກຍາກ ຂອງປະຊາຊົນ ບ້ານຄໍາປ່າແໜ ແລະ ບ້ານ ປ່າກ້ວຍ, ບົດຮຽນການຈັດຕັ້ງປະຕິບັດໂຄງການກອງທຶນຫຼຸດຜ່ອນຄວາມທຸກຍາກ, ບົດຮຽນຂອງແຊມວນອຸນດົງ ສ ເກົາຫຼີ ກ່ຽວກັບການພັດທະນາຊົນນະບົດ ແກ້ໄຂຄວາມທຸກຍາກ, ແນວຄິດຄວາມຄິດພັດທະນາຊົນນະບົດຂອງ ສປ ຈີນ ແລະ ລາຍງານຄວາມຄືບໜ້າ ໂຄງການຕົວແບບລຶບລ້າງຄວາມທຸກຍາກຮ່ວມມື ລາວ-ຈີນ ຢູ່ 2 ຈຸດສຸມ, ການພັດທະນາຊົນນະບົດຢູ່ ສສ ຫວຽດນາມ ແລະ ກອງທຶນຟື້ນຟູ ແລະ ພັດທະນາຊາວກະສິກອນຂອງໄທ ແລະ ອື່ນໆອີກ.
