ເພາະກາຍແຫ່ງຊາດ ມອບໂລ້ກຽດຕິຄຸນ ໃຫ້ແກ່ຜູ້ສະໜັບສະໜູນ

ໃນວັນທີ 25 ພຶດສະພານີ້ ທີ່ບໍລິສັດ ວຽງຈັນ ຟິດເນັດ ຈໍາກັດ, ສະຫະພັນກິລາເພາະກາຍແຫ່ງຊາດ ມອບໂລ້ກຽດຕິຄຸນໃຫ້ແກ່ບໍລິສັດ ວຽງຈັນ ຟິດເນັດ ຈຳກັດ ເພື່ອສະແດງຄວາມຮູ້ບຸນຄຸນທີ່ມີຜົນງານດີເດັ່ນໃນການປະກອບສ່ວນອຸປະຖຳຫລັກທາງດ້ານວັດຖຸ ແລະ ທຶນຮອນສ່ວນຕົວເຂົ້າໃນການຈັດການແຂ່ງຂັນກິລາເພາະກາຍ ປະຈຳປີ 2018 ໂດຍໃຫ້ກຽດກ່າວມອບຂອງທ່ານ ຄໍາພະໄພວັນ ວົງໄຊ ຮັກສາການປະທານສະຫະພັນກິລາເພາະກາຍແຫ່ງຊາດລາວ ແລະ ຮັບ​ໂດຍທ່ານ ສະຖາພອນ ພິຈິດ ປະທານບໍລິສັດ ວຽງຈັນ ຟິດເນັດ ຈຳກັດ, ມີຄະນະບໍລິຫານສະຫະພັນເພາະກາຍແຫ່ງຊາດເຂົ້າຮ່ວມ.

ໂອກາດນີ້, ທ່ານ ຄໍາພະໄພວັນ ວົງໄຊ ກ່າວວ່າ: ການມອບໂລ້ກຽດຕິຄຸນໃຫ້ແກ່ບໍລິສັດ ວຽງຈັນ ຟິດເນັດ ຈຳກັດ ໃນຄັ້ງນີ້ ເພື່ອສະແດງເຖິງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ບໍລິສັດທີ່ໄດ້ເສຍສະຫລະທັງເຫື່ອແຮງ, ສະຕິປັນຍາ, ວັດຖຸ ແລະ ທຶນຮອນສ່ວນຕົວ ຈໍານວນ 100 ລ້ານກີບ ປະກອບສ່ວນຊ່ວຍເຫລືອສະຫະພັນກິລາເພາະກາຍແຫ່ງຊາດເຂົ້າໃນການຈັດການແຂ່ງຂັນກິລາເພາະກາຍ ປະຈຳປີ 2018 ໃນວັນທີ 7 ເມສາ 2018 ຜ່ານມາ ທີ່ສູນການຄ້າໄອເຕັກມໍ ນະຄອນຫລວງວຽງຈັນ.

ສໍາລັບການແຂ່ງຂັນກິລາເພາະກາຍ ປະຈຳປີ 2018 ແມ່ນມີການຊີງໄຊທັງໝົດ 6 ລາຍການ ຄື: ເພາະກາຍຊາຍ ຮຸ່ນນ້ຳໜັກ 65-70 ກິໂລ, ເພາະກາຍຊາຍ ຮຸ່ນນໍ້າໜັກ 71-80 ກິໂລ, ເພາະກາຍຊາຍ ໂອເພັນ ຊາຍໜຸ່ມງາມ ຄວາມສູງ 165-170 ຊັງຕີແມັດ, ຊາຍໜຸ່ມງາມ ຄວາມສູງ 171-180 ຊັງຕີແມັດ ແລະ ຍິງຮຸ່ນງາມ.