ຊາວກະສິກອນອາກຊັງຕິນແຈກຜັກຟຣີ ປະທ້ວງລາຄາຕົກຕໍ່າ

     ບົວໂນສໄອເຣສ 27 ເມສາ: ກະສິກອນຢູ່ອາກຊັງຕິນຂົນພືດຜັກຫລາຍຊະນິດນ້ຳໜັກລວມປະມານ 4.000 ກິໂລກຣາມ ມາແຈກຢາຍໃຫ້ປະຊາຊົນຢູ່ບໍລິເວນໃຈກາງນະຄອນຫລວງບົວໂນສໄອເຣສ ໃນວັນທີ 26 ເມສານີ້ ເພື່ອປະທ້ວງລາຄາສິນຄ້າກະສິກຳຕົກຕໍ່າໃນປະເທດ.

ລາຍງານລະບຸວ່າ: ຖືເປັນເທື່ອທີ 2 ຂອງອາທິດນີ້ທີ່ຊາວກະສິກອນນຳເອົາພືດຜັກຕ່າງໆເຊັ່ນ: ຜັກຫົມ ແລະ ໝາກເຫລັ່ນ ມາແຈກຢາຍປະຊາຊົນຫລາຍພັນຄົນຢູ່ບໍລິເວນໃຈກາງເມືອງຫລວງຂອງອາກຊັງຕິນ ເຊິ່ງຕັ້ງຢູ່ໃກ້ກັບທຳນຽບປະທານາທິບໍດີ. ນອກຈາກນີ້ ຊາວກະສິກອນຍັງນຳເອົາຕົ້ນຜັກກາດ ແລະ ຕົ້ນຊານາລີມາປູກໃນໜານຜັກ ເພື່ອສະແດງສັນຍາລັກປະທ້ວງລາຄາພືດຜັກຕົກຕໍ່າໃນປະເທດນຳອີກ.

ກະສິກອນຄົນໜຶ່ງກ່າວວ່າ: ຊີວິດຊາວໄຮ່ຊາວສວນພວມຊຸດໂຊມ ເພາະພວກເຂົາຂາຍສິນຄ້າໄດ້ໃນລາຄາພຽງກິໂລລະ 30-60 ເຊນ ເທົ່ານັ້ນ.