ທ່ານ ທຣຳ ປະກາດຍົກເລີກປະຊຸມສຸດຍອດ ກັບທ່ານ ກິມ ຈ໋ອງອຸນ ເດືອນໜ້າ
ທຳນຽບຂາວເຜີຍແຜ່ຖະແຫລງການຂອງປະທານາທິບໍດີ ໂດນັນ ທຣຳ ສົ່ງເຖິງທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ລະບຸເຖິງການຍົກເລີກກອງປະຊຸມສຸດຍອດລະຫວ່າງປະທານາທິບໍດີ ທຣຳ ກັບທ່ານ ກິມ ຈ໋ອງອຸນ ທີ່ມີກຳນົດຈັດຂຶ້ນໃນວັນທີ 12 ມິຖຸນານີ້ ທີ່ປະເທດສິງກະໂປ.
ເນື້ອໃນຂອງຖະແຫລງການດັ່ງກ່າວລະບຸວ່າ: ປະທານາທິບໍດີ ທຣຳ ຈະບໍ່ເດີນທາງໄປປະຊຸມສຸດຍອດທີ່ສິງກະໂປ ໃນວັນທີ 12 ມິຖຸນານີ້ ແລະ ລັດຖະບານອາເມລິກາຈະຫັນໄປໃຊ້ການຂວ້ຳບາດກົດດັນ ສປປ ເກົາຫລີ ແທນ ໂດຍອ້າງວ່າ ສປປ ເກົາຫລີ ມີທ່າທີແຂງແກ່ນ ແລະ ບໍ່ເປັນມິດໃນໄລມໍ່ໆມານີ້ ຈຶ່ງເຫັນວ່າບໍ່ເໝາະສົມທີ່ຈະມີກອງປະຊຸມສຸດຍອດລະຫວ່າງກັນໃນໄລຍະນີ້.
ເນື່ອງຈາກຖະແຫລງການຫລ້າສຸດຂອງ ສປປ ເກົາຫລີ ສະແດງອອກເຖິງຄວາມເປັນປໍລະປັກຢ່າງຈະແຈ້ງ ຈາກກໍລະນີທີ່ກ່າວປະນາມຮອງປະທານາທິບໍດີ ໄມ ເພນ ຂອງອາເມລິກາ ແລະ ທ່ານ ທຣຳ ກ່າວເຕືອນວ່າ ສ ເກົາຫລີ ກັບ ຍີ່ປຸ່ນ ຕ້ອງກຽມພ້ອມຕອບໂຕ້ຖ້າ ສປປ ເກົາຫລີ ຈະດຳເນີນການຍົ່ວຍຸຫລັງຈາກນີ້, ພ້ອມທັງກ່າວຂອບໃຈທ່ານ ກິມ ຈ໋ອງອຸນ ທີ່ປ່ອຍຕົວນັກໂທດຊາວອາເມລິກາເຊື້ອສາຍເກົາຫລີ ແລະ ເຖິງວ່າກອງປະຊຸມໃນວັນທີ 12 ຈະບໍ່ເກີດຂຶ້ນ, ທ່ານ ທຣຳ ຍັງຫວັງວ່າຈະສາມາດມີກອງປະຊຸມສຸດຍອດກັບ ສປປ ເກົາຫລີ ໄດ້ໃນອະນາຄົດ.
ດ້ານເກົາຫລີໂດຍສຳນັກຂ່າວກາງ KCNA ໄດ້ເຜີຍແຜ່ຖະແຫລງຂອງທ່ານ ກິມ ເຢກວານ ລັດຖະມົນຕີຄົນທີ 1 ຂອງ ສປປ ເກົາຫລີ ລະບຸວ່າ: ການຕັດສິນໃຈຍົກເລີກພົບປະຄັ້ງນີ້ ເປັນສິ່ງທີ່ເໜືອຄວາມຄາດໝາຍ ແລະ ໜ້າເສຍດາຍ. ເຖິງຢ່າງໃດກໍດີ, ພຽງຢາງພ້ອມສະເໝີທີ່ຈະເຈລະຈາກັບລັດຖະບານວໍຊິງຕັນ.
