ປູກໄມ້ໃຫ້ໃສ່ໃຈບົວລະບັດຮັກສາ
ໃນຫລາຍປີຜ່ານມາ, ທໍາມະຊາດປ່າໄມ້ໄດ້ຖືກທໍາລາຍດ້ວຍນໍ້າມືຂອງມະນຸດເຮົາຢ່າງໜັກໜ່ວງຢູ່ຫລາຍປະເທດ, ເຮັດໃຫ້ປ່າໄມ້ນັບມື້ຫລຸດໜ້ອຍຖອຍລົງ ແລະ ບາງເຂດຈົນກາຍເປັນດິນປອກໂລ້ນ, ສິ່ງແວດລ້ອມຖືກທໍາລາຍຢ່າງຮຸນແຮງ ເຮັດໃຫ້ສະພາບດິນຟ້າອາກາດມີການປ່ຽນແປງ, ໄພພິບັດຕ່າງໆກໍເກີດມີຫລາຍຂຶ້ນ.
ຈາກບັນຫາດັ່ງກ່າວ, ລັດຖະບານຫລາຍໆປະເທດໃນໂລກຈຶ່ງເຫັນໄດ້ຄວາມສໍາຄັນຂອງການປົກປັກຮັກສາສະພາບແວດລ້ອມປ່າໄມ້ໃຫ້ຍືນຍົງ. ກໍດັ່ງຢູ່ລາວເຮົາ, ພັກ ແລະ ລັດຖະບານ ກໍໄດ້ເອົາໃຈໃສ່ວາງແຜນຍຸດທະສາດປ່າໄມ້ແຕ່ນີ້ຮອດປີ 2020 ຈະຕ້ອງໄດ້ສູ້ຊົນປຸກໄມ້ ແລະ ຟື້ນຟູປ່າໄມ້ໃຫ້ກວມເອົາ 70% ຂອງເນື້ອທີ່ທົ່ວປະເທດຈາກ 65% ໃນປີ 2015, ເນື່ອງຈາກວ່າໃນໄລຍະຜ່ານມາ ເນື້ອທີ່ປ່າໄມ້ຢູ່ປະເທດເຮົາໄດ້ຖືກທໍາລາຍເຜົາຜານຈາກລະເບີດສົງຄາມ, ຈາກການຖາງປ່າເຮັດໄຮ່ເພື່ອການຜະລິດ, ການຈູດປ່າເພື່ອລ່າສັດ, ການລັກລອບຕັດໄມ້ຢ່າງຊະຊາຍ ແລະ ອື່ນໆ, ເຮັດໃຫ້ປ່າໄມ້ຖືກດັບສູນໄປຢ່າງໜ້າເປັນຫວ່ງ, ເຊິ່ງມີຫລາຍບ່ອນເກີດເປັນດິນປອກໂລ້ນ. ດັ່ງນັ້ນ ເພື່ອບັນລຸຄາດໝາຍດັ່ງກ່າວ, ພັກ ແລະ ລັດຖະບານເຮົາ ຈຶ່ງໄດ້ກໍານົດເອົາວັນທີ 1 ມິຖຸນາ ເປັນວັນປູກຕົ້ນໄມ້ແຫ່ງຊາດຂອງທຸກໆປີ ແລະ ໄດ້ຈັດຕັ້ງຂະບວນການປູກໄມ້ຂຶ້ນໃນວັນດັ່ງກ່າວ, ເຊິ່ງມີທັງພສກລັດ ແລະ ເອກະຊົນ ກໍໄດ້ຫ້າງຫາກະກຽມລົງທຶນຊື້ເບ້ຍໄມ້ ແລະ ແນວພັນໄມ້ຫລາກຫລາຍຊະນິດ ເພື່ອແບ່ງປັນໃຫ້ທຸກພາກສ່ວນນັບແຕ່ສູນກາງລົງໄປຮອດຂັ້ນຮາກຖານທ້ອງຖິ່ນ ສະເລ່ຍໃນແຕ່ລະປີ ຖ້າຄິດເປັນເງິນກໍຫລາຍລ້ານຫລາຍຕື້ກີບ ເພື່ອແນໃສ່ເຮັດໃຫ້ອັດຕາການປົກຫຸ້ມຂອງເນື້ອທີ່ປ່າໄມ້ແຕ່ລະປີເພີ່ມຂຶ້ນເລື້ອຍໆ, ແຕ່ໜ້າເສຍດາຍຄວາມຫວັງດັ່ງກ່າວຍັງເປັນຈິງໜ້ອຍ ແລະ ໜ້າເປັນຫວ່ງຕໍ່ໂຊກຊະຕາກໍາຂອງຕົ້ນໄມ້ແຕ່ລະຕົ້ນທີ່ຖືກປູກຝັງລົງໄປໃນດິນແລ້ວຂາດການດູແລເບິ່ງແຍງ ແລະ ຂາດການປົກປັກຮັກສາແລ້ວມັນກໍຫ່ຽວແຫ້ງຕາຍໄປ, ສ່ວນຍັງເຫລືອບາງຕົ້ນກໍຖືກສັດທໍາລາຍລົ້ມຫາຍໄປ ແລະ ບາງບ່ອນແມ່ນບໍ່ຍັງຈັກຕົ້ນເລີຍ.
ນີ້ຄືບົດຮຽນຕົວຈິງທີ່ຂ້າພະເຈົ້າເຄີຍໄດ້ໄປຮ່ວມປູກໄມ້ມາແລ້ວຫລາຍໆປີ, ນັບແຕ່ສະໄໝຍັງເຮັດວຽກຮາກຖານກໍເຫັນວ່າພາຍຫລັງທີ່ປູກໄດ້ປະມານ 4-5 ເດືອນ ເມື່ອລົງໄປກວດເບິ່ງບໍ່ເຫັນຕົ້ນໄມ້ຈັກຕົ້ນເລີຍ ຈຶ່ງຖາມນາຍບ້ານວ່າຕົ້ນໄມ້ໄປໃສໝົດແລ້ວ? ໄດ້ຮັບຄໍາຕອບແບບໜ້າຕາເສີຍວ່າ: ຕາຍໝົດແລ້ວ. ນີ້ຄືບັນຫາທີ່ພວກເຮົາຈະຕ້ອງໄດ້ຄົ້ນຄິດນໍາກັນວ່າຈະຫາວິທີແກ້ແນວໃດ ເພື່ອບໍ່ໃຫ້ການປູກໄມ້ຕົກຢູ່ໃນສະພາບເກົ່າ ຍ້ອນຂາດການບົວລະບັດຮັກສາ, ປີໃດກໍປູກໃສ່ແຕ່ຂຸມເກົ່າ ເຮັດໃຫ້ພວກເຮົາສູນເສຍທຶນຮອນ, ເຫື່ອແຮງ ແລະ ສະພາບແບບນີ້ ຍັງເປັນບັນຫາຊໍ້າເຮື້ອແກ່ຍາວມາຈົນຮອດປັດຈຸບັນກໍຍັງມີຫລາຍທ້ອງຖິ່ນຍັງຂາດການເອົາໃຈໃສ່ເບິ່ງແຍງດູແລ ແລະ ບົວລະບັດຮັກສາຕົ້ນໄມ້ປູກໃໝ່ ປູກແລ້ວກໍພາກັນຫັນຫລັງໃສ່ມັນກັບບ້ານຈັບປື້ມມາຂຽນບົດລາຍງານຢ່າງອວດອົ່ງວ່າປີນີ້ບ້ານເຮົາເມືອງເຮົາປູກໄມ້ໄດ້ທໍ່ນັ້ນທໍ່ນີ້ຢ່າງຂາດຄວາມເປັນຈິງ ເພື່ອອ້າງເອົາງົບປະມາແບ່ງກັນໃຊ້ສ່ວນຕົວ ໄມ້ຈະໃຫຍ່ໂຕ ຫລື ບໍ່ນັ້ນແມ່ນບໍ່ກ່ຽວ. ຈຶ່ງເປັນສາເຫດເຮັດໃຫ້ອັດຕາການປົກຫຸ້ມຂອງປ່າໄມ້ບໍ່ໄດ້ຕາມລະດັບຄາດໝາຍສູ້ຊົນ. ເພາະສະນັ້ນ ຈຶ່ງຮຽກຮ້ອງມາຍັງອົງການຈັດຕັ້ງພັກ-ລັດ, ບໍລິສັດຫ້າງຮ້ານ, ຫົວໜ່ວຍທຸລະກິດ ຕະຫລອດຮອດປະຊາຊົນບັນດາເຜົ່າໃນຂອບເຂດທົ່ວປະເທດ ຈົ່ງພ້ອມກັນເອົາໃຈໃສ່ເບິ່ງແຍງດູແລຕົ້ນໄມ້ປູກໃໝ່ໃຫ້ເຕີບໃຫຍ່ຂະຫຍາຍຕົວ ແລະ ບັນລຸໄດ້ຕົວເລກຄາດໝາຍວາງໄວ້.
