ອາເມລິກາຂັບໄລ່ທູດເວເນຊູເອລາ ສອງຄົນຕອບໂຕ້ທີ່ຖືກຂັບໄລ່ກ່ອນ
ອາເມລິກາສັ່ງຂັບໄລ່ນັກການທູດລະດັບສູງສອງຄົນຂອງເວເນຊູເອລາອອກນອກປະເທດພາຍໃນ 48 ຊົ່ວໂມງ ຕອບໂຕ້ທີ່ຖືກເວເນຊູເອລາຂັບໄລ່ທູດສອງຄົນອອກນອກປະເທດພາຍໃນ 48 ຊົ່ວໂມງໄປກ່ອນໜ້ານີ້.
ໂຄສົກກະຊວງຕ່າງປະເທດອາເມລິກາ ຖະແຫລງໃນວັນທີ 23 ພຶດສະພາວ່າ: ອຸປະທູດສະຖານທູດເວເນຊູເອລາໃນນະຄອນຫລວງວໍຊິງຕັນ ແລະ ຮອງກົງສຸນໃຫຍ່ເວເນຊູເອລາໃນເມືອງຮິວສຕັນ ຖືກປະກາດໃຫ້ເປັນບຸກຄົນບໍ່ເພິ່ງປາຖະໜາ ແລະ ຈະຕ້ອງອອກນອກອາເມລິກາພາຍໃນ 48 ຊົ່ວໂມງ ເປັນການຕອບໂຕ້ທີ່ລັດຖະບານເວເນຊູເອລາປະກາດໃຫ້ອຸປະທູດ ແລະ ອັກຄະລາຊະທູດທີ່ປຶກສາສະຖານທູດອາເມລິກາໃນນະຄອນຫລວງກາຣາກັສເປັນບຸກຄົນບໍ່ເພິ່ງປາຖະໜາໃນວັນທີ 22 ພຶດສະພາ. ໂຄສົກກະຊວງການຕ່າງປະເທດອາເມລິກາກ່າວເຖິງເລື່ອງທີ່ປະທານາທິບໍດີ ນິໂກລັສ ມາດູໂຣ ຂອງເວເນຊູເອລາ ອ້າງວ່າ: ເວເນຊູເອລາຕົກເປັນເຫຍື່ອທາງການເມືອງ ແລະ ການເງິນວ່າ: ເປັນຂໍ້ອ້າງທີ່ບໍ່ເປັນທຳ, ເຈົ້າໜ້າທີ່ສະຖານທູດອາເມລິກາປະຕິບັດໜ້າທີ່ດ້ວຍຄວາມຮັບຜິດຊອບ ແລະ ເປັນໄປຕາມທຳນຽມທາງການທູດ.
ຜູ້ນຳເວເນຊູເອລາປະກາດຂັບໄລ່ນັກການທູດອາເມລິກາ ເນື່ອງຈາກປະທານາທິບໍດີ ໂດນັນ ທຣຳ ຂອງອາເມລິກາ ເພີ່ມການຂວ້ຳບາດໃນວັນທີ 21 ພຶດສະພາ ເຮັດໃຫ້ຈຳໜ່າຍຊັບສິນຂອງລັດໄດ້ຍາກຂຶ້ນ, ຫລັງຈາກຄະນະກຳມະການການເລືອກຕັ້ງປະກາດໃຫ້ທ່ານຊະນະການເລືອກຕັ້ງປະທານາທິບໍດີ ໃນວັນທີ 20 ພຶດສະພາ. ກ່ອນໜ້ານີ້ ອາເມລິກາໄດ້ຂວ້ຳບາດທ່ານ ມາດູໂຣ ແລະ ຄົນໃກ້ຊິດ ລວມທັງຫ້າມບໍລິສັດອາເມລິກາຊື້ໜີ້ຂອງທາງການ ຫລື ບໍລິສັດນ້ຳມັນຂອງທາງການເວເນຊູເອລາ, ສ່ວນສະຫະພາບເອີຣົບ (EU) ກຳລັງພິຈາລະນາຂວ້ຳບາດເວເນຊູເອລາຄັ້ງໃໝ່ ເພາະການເລືອກຕັ້ງບໍ່ໂປ່ງໃສ ແລະ ບໍ່ໄດ້ມາດຕະຖານສາກົນ.
