ຕໍາຫລວດຈໍາປາສັກຈັບຜູ້ຄ້າຢາເສບຕິດລາຍໃຫຍ່ຫລາຍຄົນມາດໍາເນີນຄະດີ

  ເຈົ້າໜ້າທີ່ ປກສ ແຂວງຈໍາປາສັກ ໃຫ້ຮູ້ວ່າ: ໃນວັນທີ 15 ເມສາ ຜ່ານມານີ້, ກໍາລັງເຈົ້າໜ້າທີ່ຕົນສາມາດຈັບຜູ້ຄ້າຢາເສບຕິດລາຍໃຫຍ່ຢູ່ເຂດບ້ານແກ້ງຊັນ, ເມືອງປາກເຊ ໄດ້ຄື: ທ້າວ ສີສຸກ (ດຳ) ອາຍຸ 37 ປີ, ນາງ ສຸກມະນີ ອາຍຸ 30 ປີທັງສອງເປັນຜົວເມຍກັນ, ນາງ ຫຍອ (ຫລ້າ) ອາຍຸ 32 ປີ, ທ້າວ ສົມໃຈ (ຊຸຍ) ອາຍຸ 41 ປີ, ທ້າວ ສົມປອງ (ກົບ) ອາຍຸ 25 ປີຢູ່ບ້ານສິງສຳພັນ, ເມືອງຊະນະສົມບູນ, ທ້າວ ໝີ ອາຍຸ 45 ປີຢູ່ບ້ານບຸ່ນນ້ອຍ, ເມືອງໂຂງ, ທ້າວ ອ້ວນ ອາຍຸ 36 ປີຢູ່ບ້ານຊົ້ງເຊ ແຂວງຈຳປາສັກ ແລະ ທ້າວ ບຸນສະຖິດ (ເກັ່ງ) ອາຍຸ 35 ປີຢຸ່ບ້ານນາແສນພັນ, ເມືອງໂຂງ, ພ້ອມຂອງກາງຢາບ້າ 70 ພັນເມັດ ແລະ ຢາໄອ 300 ກວ່າກລາມ.

ເຈົ້າໜ້າທີ່ ໃຫ້ຮູ້ວ່າ: ຂະບວນການຄ້າຢາເສບຕິດອັນຕະລາຍນີ້, ຖືກຈັບໄດ້ພາຍຫລັງມີພົນລະເມືອງແຈ້ງໃຫ້ຊາບວ່າຈະມີການລັກລອບຂົນສົ່ງຢາເສບຕິດລາຍໃຫຍ່ໃນເຂດເມືອງປາກເຊ, ຈຶ່ງໄດ້ຈັດກໍາລັງລົງຕິດຕາມເປົ້າໝາຍ ແລະພົບເຫັນການເຄື່ອນໄຫວຂອງພວກກ່ຽວຢູ່ເຂດບ້ານແກ້ງຊັນ ແລະ ໄດ້ຈັບຕົວ ພວກກ່ຽວໃນຂະນະນັດສົ່ງຢາບ້າຈໍານວນ 7.011 ເມັດ, ພ້ອມຍຶດລົດໃຫຍ່ 1 ຄັນ, ລົດຈັກ 3 ຄັນ ແລະ ໂທລະສັບມືຖື 8 ໜ່ວຍທີ່ນໍາໃຊ້ເຂົ້າໃນການກະທໍາຜິດ. ຫລັງຈາກນັ້ນ, ເຈົ້າໜ້າທີ່ໄດ້ໄປກວດຄົ້ນເຮືອນທ້າວ ສີສຸກ ຢູ່ບ້ານໃໝ່ສິງສຳພັນ, ເມືອງຊະນະສົມບູນ ໄດ້ພົບເຫັນຂອງກາງຢາບ້າຫລາຍກວ່າ 69 ພັນເມັດ, ຢາໄອສ໌ 363 ກຣາມ.

ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ຢາເສບຕິດທັງໝົດເປັນຂອງພວກກ່ຽວແທ້, ໂດຍແມ່ນທ້າວ ສີສຸກ ແລະ ນາງ ສຸກມະນີ ໄດ້ຊື້ມາຈາກເຄືອຂ່າຍຄ້າຢາເສບຕິດຢູ່ແຂວງສະຫວັນນະເຂດ ເພື່ອສົ່ງໃຫ້ຜູ້ຮ່ວມຂະບວນການໄປຈໍາໜ່າຍຕໍ່, ແຕ່ຖືກເຈົ້າໜ້າທີ່ຈັບໄດ້ເສຍກ່ອນ.

ເຈົ້າໜ້າທີ່ ປກສ ແຂວງຈຳປາສັກ ໃຫ້ຮູ້ອີກວ່າ: ໃນມື້ດຽວກັນນີ້ເຈົ້າໜ້າທີ່ກໍໄດ້ຈັບຜູ້ຄ້າຂາຍຢາເສບຕິດຊື່ທ້າວ ພົມ ອາຍຸ 38 ປີຢູ່ບ້ານເບຢຽມ, ເມືອງສອງຄອນ, ແຂວງສະຫວັນນະເຂດພ້ອມຂອງກາງຢາບ້າ 2 ພັນເມັດ ແລະ      ຜ່ານການສືບສວນ-ສອບສວນຂອງເຈົ້າໜ້າທີ່ຜູ້ກ່ຽວຮັບສາລະພາບວ່າ: ຢາບ້າດັ່ງກ່າວແມ່ນເປັນຂອງຕົນແທ້, ໂດຍຈະເອົາມາສົ່ງໃຫ້ລູກຄ້າຢູ່ເມືອງປາກເຊ,  ໂດຍເອົາຢາບ້າຊຸກເຊື່ອງໃນກະເປົາເຄື່ອງແລ້ວຂຶ້ນລົດໂດຍສານຈາກເມືອງສອງຄອນແຂວງສະຫວັນນະເຂດມາເມືອງປາກເຊແຂວງຈຳປາສັກແລ້ວໄປພັກຢູ່ເຮືອນພັກແຫ່ງໜຶ່ງຢູ່ເຂດບ້ານໂຊກອຳນວຍ, ເມືອງປາກເຊ ເພື່ອລໍຖ້າຜູ້ສັ່ງຊື້ມາຮັບເອົາຢາ, ແຕ່ຖືກເຈົ້າໜ້າທີ່ຈັບຕົວຢູ່ເຮືອນພັກດັ່ງກ່າວເສຍກ່ອນ.

ຂ່າວໃຫ້ຮູ້ຕື່ມວ່າ: ໃນຕົ້ນເດືອນເມສາຜ່ານມາ, ເຈົ້າໜ້າທີ່ ປກສ ແຂວງຈຳປາສັກໄດ້ມ້າງເປົ້າໝາຍຄ້າຂາຍຢາເສບຕິດຢູ່ເຂດບ້ານຫ່າຫີນ, ເມືອງປາກເຊ ສາມາດຈັບຕົວທ້າວ ທະວີສຸກ (ຫລ້າ) ອາຍຸ 19 ປີຢູ່ບ້ານຫ້ວຍຍາງຄຳ, ເມືອງປາກເຊ, ພ້ອມຂອງກາງຢາບ້າ 3.667 ເມັດ, ຈຶ່ງໄດ້ຍຶດໄວ້ເປັນຫລັກຖານເພື່ອດຳເນີນຄະດີຕາມລະບຽບກົດໝາຍ.