ຫລາຍເຂດໃນຕົວເມືອງນ້ຳປະປາມາບໍ່ປົກກະຕິ

  ປັດຈຸບັນເຫັນວ່າສະພາບອາກາດຮ້ອນອົບເອົ້າ, ເຮັດໃຫ້ຄວາມຕ້ອງການນ້ຳດື່ມ, ນ້ຳໃຊ້ຂອງປະຊາຊົນເພີ່ມຫລາຍຂຶ້ນ, ຂະນະດຽວກັນການສະໜອງນ້ຳປະປາຍັງມີປະລິມານຈຳກັດ, ອັນໄດ້ສົ່ງຜົນກະທົບໃຫ້ຫລາຍໃນຕົວເມືອງນະຄອນຫລວງວຽງຈັນມີສະພາບນ້ຳປະປາມາບໍ່ເປັນປົກກະຕິ ຫລື ກໍ່ມີປະລິມານໜ້ອຍເປັນຕົ້ນ: ເຂດບ້ານໜອງທາໃຕ້, ໂພນຕ້ອງ, ເມືອງຈັນທະບູລີ, ເຂດບ້ານຂາມງອຍ, ເມືອງໄຊເສດຖາ ແລະ ເຂດອື່ນໆທີ່ຢູ່ເນີນສູງ, ອັນໄດ້ກະທົບຕໍ່ການດຳລົງຊີວິດຂອງປະຊາຊົນໃນຫລາຍເຂດ. ເຖິງວ່າກ່ອນໜ້ານີ້ພາກສ່ວນກ່ຽວຂ້ອງໄດ້ຢືນຢັນວ່າພາຍຫລັງສຳເລັດການກໍ່ສ້າງໂຮງງານນ້ຳປະປາດົງໝາກຄາຍໃນປີ 2016 ຜ່ານມາຈະສາມາດສະໜອງນ້ຳໃຊ້ໃນນະຄອນຫລວງວຽງຈັນໃຫ້ມີຄວາມສະດວກດີກວ່າເກົ່າ, ແຕ່ມາຮອດປັດຈຸບັນເຫັນວ່າມີຫລາຍເຂດຕົກຢູ່ໃນສະພາບນໍ້າປະປາມາບໍ່ປົກກະຕິໄດ້ຫລາຍວັນແລ້ວ, ຈຶ່ງຢາກໃຫ້ພາກສ່ວນກ່ຽວຂ້ອງໄດ້ຕິດຕາມກວດກາແກ້ໄຂບັນຫາດັ່ງກ່າວ, ເພາະວ່າອາດມີການຮົ່ວໄຫລຂອງທໍ່ສົ່ງນໍ້າໃນບາງຈຸດ, ຈຶ່ງເຮັດໃຫ້ນໍ້າປະປາມາບໍ່ປົກກະຕິ.

ນ້ຳປະປານະຄອນຫລວງ ໃຫ້ຮູ້ວ່າ: ພໍກ້າວເຂົ້າສູ່ລະດູຮ້ອນຂອງທຸກໆປີຄວາມຕ້ອງການຊົມໃຊ້ນ້ຳປະປາຢູ່ນະຄອນຫລວງວຽງຈັນມີຫລາຍກວ່າ 320 ພັນແມັດກອນຕໍ່ມື້, ຂະນະທີ່ກຳລັງການຜະລິດຂອງໂຮງງານນ້ຳປະປາມີພຽງແຕ່ 200 ພັນກວ່າແມັດກ້ອນຕໍ່ມື້ເທົ່ານັ້ນ ແລະ ພວມມີແຜນກໍ່ສ້າງໂຮງງານຜະລິດນໍ້າປະປາອີກຫລາຍແຫ່ງໃນອານາຄົດອັນໃກ້ເພື່ອສະໜອງໃຫ້ສັງຄົມໄດ້ພຽງພໍ, ແຕ່ແນວໃດກໍຕາມປັດຈຸບັນຂໍຮຽກຮ້ອງໃຫ້ທຸກຄົນຈົ່ງຊ່ວຍກັນໃຊ້ນ້ຳຢ່າງປະຢັດຈະເປັນການດີທີ່ສຸດ ແລະ ທັງເປັນການຫລຸດຜ່ອນລາຍຈ່າຍໃນຄອບຄົວອີກດ້ວຍ.