ນັກກິລາ 2 ມະຫາວິທະຍາໄລລາວເກັບ 3 ຄະແນນ ທີ່ ສປ ຈີນ

2 ມະຫາວິທະຍາໄລຈາກ ສປປ ລາວ ກໍຄືມະຫາວິທະຍາໄລແຫ່ງຊາດ (ມຊ) ແລະ ມະຫາວິທະຍາໄລສຸພານຸວົງ (ແຂວງຫລວງພະບາງ) ລົງສະໜາມຄັ້ງທໍາອິດ ສາມາດເກັບ 3 ຄະແນນ ໃນການແຂ່ງຂັນບານ​ເຕະນັກສຶກສາວິທະຍາໄລຕອນໃຕ້ ແລະ ອາຊີຕາເວັນອອກສຽງໃຕ້ ຄັ້ງທີ 4 (4th South and Southeast Asia College Student Culture and Sports Week) ທີ່ຈັດຂຶ້ນທີ່ມະຫາວິທະຍາໄລເຕັກໂນໂລຊີຄຸນໝິງ ສປ ຈີນ.

ພິທີເປີດການແຂ່ງຂັນບານເຕະຊາຍ ແລະ ບານສົ່ງຊາຍ-ຍິງ ໃນລາຍການສັບປະດາແລກປ່ຽນວັດທະນະທຳ ແລະ ກິລາຂອງນັກສຶກສາວິທະຍາໄລຕອນໃຕ້ ແລະ ອາຊີຕາເວັນອອກສຽງໃຕ້ ຄັ້ງທີ 4 (4th South and Southeast Asia College Student Culture and Sports Week) ທີ່ຈັດຂຶ້ນທີ່ມະຫາວິທະຍາໄລເຕັກໂນໂລຊີຄຸນໝິງ ສປ ຈີນ ລະຫວ່າງວັນທີ 21-28 ພຶດສະພາ 2018 ສປປ ລາວ ສົ່ງນັກກິລາປະເພດກິລາບານເຕະຊາຍຈາກ 2 ມະຫາວິທະຍາໄລເຂົ້າຮ່ວມ.

ສຳລັບການລົງສະໜາມຄັ້ງທໍາອິດຂອງນັກກິລາ ສປປ ລາວ ພົບກັບ ທີມຈາກ ມະຫາວິທະຍາໄລພະລະສຶກສາ ແລະ ກິລາຮ່າໂນ້ຍ ສສ ຫວຽດນາມ, ຜ່ານການແຂ່ງຂັນນັກກິລາ ສປປ ລາວ ສາມາດເກັບ 3 ​ໄດ້ຄະແນນ.

ສຳລັບງານແຂ່ງຂັນກິລາບານສົ່ງຊາຍ-ຍິງ ແລະ ບານເຕະຊາຍ ລະດັບນັກສຶກສາວິທະຍາໄລຕອນໃຕ້ ແລະ ອາຊີຕາເວັນອອກສຽງໃຕ້ ຄັ້ງທີ 4 ທີ່ຄຸນໝິງ ສປ ຈີນ ເປັນເຈົ້າພາບ ມີມະຫາວິທະຍາໄລຈາກບັນດາປະເທດອາຊີຕາເວັນສຽງໃຕ້ເຂົ້າຮ່ວມ 5 ຊາດ ຄື: ສປປ ລາວ, ສິງກະໂປ, ສສ ຫວຽດນາມ, ໄທ ແລະ ມາເລເຊຍ, ສ່ວນວິທະຍາໄລຕອນໃຕ້ມີ ອິນເດຍ, ບັງກາລາເທດ ແລະ ມະຫາວິທະຍາໄລຈາກ ສປ ຈີນ ເຂົ້າຮ່ວມ.