ອາເມລິກາອອກຫລຽນທີ່ລະນຶກ ປະຊຸມສຸດຍອດທ່ານ ທຣຳ – ທ່ານ ກິມ
ສຳນັກຂ່າວຕ່າງປະເທດລາຍງານວ່າ: ສຳນັກງານການສື່ສານທຳນຽບຂາວ (WHCR) ອອກຖະແຫລງການໃນວັນທີ 21 ພຶດສະພາ ກ່ຽວກັບການເຮັດຫລຽນທີ່ລະນຶກສຳລັບກອງປະຊຸມຄັ້ງປະຫວັດສາດ ລະຫວ່າງປະທານາທິບໍດີ ໂດນັນ ທຣຳ ຜູ້ນຳອາເມລິກາ ກັບທ່ານ ກິມ ຈ໋ອງອຸນ ຜູ້ນຳສູງສຸດຂອງ ສປປ ເກົາຫລີ ຕາມກຳນົດຈະມີຂຶ້ນທີ່ສິງກະໂປ ໃນວັນທີ 12 ມິຖຸນານີ້ ໂດຍເບື້ອງເທິງຂອງຫລຽນປາກົດຄຳວ່າ: “ການຫາລືສັນຕິພາບ”.
ຂະນະທີ່ເບື້ອງຊ້າຍຂອງຫລຽນເປັນຮູບໃບໜ້າຂອງທ່ານ ທຣຳ ແລະ ເບື້ອງຂວາເປັນຮູບໃບໜ້າຂອງທ່ານ ກິມ ຈ໋ອງອຸນ ພ້ອມຄຳວ່າ “ຜູ້ນຳສູງສຸດແຫ່ງ ສປປ ເກົາຫລີ”, ສ່ວນທາງຫລັງຂອງຫລຽນເປັນຮູບທຳນຽບຂາວ, ເຮືອບິນປະຈຳຕຳແໜ່ງ “ແອຣ ຟອດ ວັນ” ແລະ ກາສັນຍາລັກປະທານາທິບໍດີອາເມລິກາ.
ເຖິງຢ່າງໃດກໍຕາມ, ຫົນທາງສູ່ກອງປະຊຸມຄັ້ງສຳຄັນນີ້ ເຊິ່ງຈະເປັນການພົບກັນຢ່າງເປັນທາງການເທື່ອທຳອິດລະຫວ່າງປະທານາທິບໍດີອາເມລິກາກັບຜູ້ນຳສູງສຸດຂອງ ສປປ ເກົາຫລີ ມີຄວາມບໍ່ແນ່ນອນຫລາຍຂຶ້ນ ເມື່ອລັດຖະບານພຽງຢາງເຕືອນ “ການທົບທວນ” ເຂົ້າຮ່ວມການພົບປະຫາລືຄັ້ງນີ້ ເນື່ອງຈາກບໍ່ພໍໃຈການຊ້ອມຮົບລະຫວ່າງອາເມລິກາກັບ ສ ເກົາຫລີ ແລະ ການທີ່ລັດຖະບານວໍຊິງຕັນເດີນໜ້າກົດດັນໃຫ້ ສປປ ເກົາຫລີ ປົດນິວເຄຼຍຝ່າຍດຽວ, ແຕ່ທ່ານ ທຣຳ ຍັງເຊື່ອໝັ້ນເຕັມຮ້ອຍວ່າກອງປະຊຸມຈະເກີດຂຶ້ນ ແລະ ຜູ້ນຳອາເມລິກາຍັງຮຽກຮ້ອງໃຫ້ຈີນຮັກສາລະດັບຄວາມເຂັ້ມງວດທາງທະຫານຕາມຊາຍແດນຕິດກັບ ສປປ ເກົາຫລີ ຈົນກວ່າຈະມີການບັນລຸຂໍ້ຕົກລົງ, ສ່ວນລັດຖະບານປັກກິ່ງຍັງບໍ່ສະແດງທ່າທີຕໍ່ຄຳກ່າວຂອງທ່ານ ທຣຳ ໃນເລື່ອງນີ້.
