ຈີນສົ່ງດາວທຽມວາງລະບົບສື່ສານ ລະຫວ່າງໂລກກັບດວງຈັນ
ສຳນັກຂ່າວຕ່າງປະເທດລາຍງານວ່າ: ຈະຫລວດ “ລອງ ມາຣ໌ຊ-4ຊີ” ຂອງອົງການບໍລິຫານອະວະກາດແຫ່ງຊາດຈີນ (CNSA) ລອຍຂຶ້ນຈາກຖານປ່ອຍຈະຫລວດພາຍໃນສູນອະວະກາດຊີຊາງ ໃນມົນທົນເສສວນ ທາງຕອນກາງຂອງປະເທດ ໃນເວລາ 05:28 ໂມງ ຕາມເວລາທ້ອງຖິ່ນຂອງວັນທີ 21 ພຶດສະພາ (04:28 ໂມງ ວັນດຽວກັນຕາມເວລາຢູ່ລາວ) ເພື່ອນຳສົ່ງດາວທຽມສື່ສານ “ຊຽວສຽວ”.
ທັງນີ້, ພາລະກິດຫລັກຂອງດາວທຽມໜ່ວຍນີ້ ຄືການກຽມຄວາມພ້ອມເຮັດໜ້າທີ່ປະສານການຕິດຕໍ່ສື່ສານລະຫວ່າງສູນປະຕິບັດການໃນໂລກກັບພື້ນທີ່ຫ່າງໄກບໍລິເວນຂົ້ວໃຕ້ຂອງດວງຈັນ ເຊິ່ງຍານສຳຫລວດ “ສາງເອີ-4” ມີກຳນົດອອກເດີນທາງໃນເດືອນມິຖຸນານີ້ ແລະ ລົງຈອດບໍລິເວນນັ້ນໃນໄລຍະເດືອນທັນວາປີດຽວກັນ ເຊິ່ງຖ້າປະສົບຜົນສຳເລັດຈະເປັນຍານສຳຫລວດດວງຈັນລຳທີ 2 ຂອງຈີນໃນຮອບ 5 ປີ ຕໍ່ຈາກຍານສຳຫລວດ “ຢີທູ” ເຊິ່ງເປັນຍານສຳຫລວດດວງຈັນລຳທຳອິດໃນປະຫວັດສາດຈີນ ອອກເດີນທາງໄປລົງຈອດໃນເດືອນທັນວາ 2013.
