ຮອງນາຍົກລັດຖະມົນຕີ ບຸນທອງ ຈິດມະນີ ລົງຊຸກຍູ້ການພັດທະນາຢູ່ເມືອງຜາອຸດົມ

ເມື່ອທ້າຍອາທິດຜ່ານມາ, ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ໄດ້ລົງເຄື່ອນໄຫວຊຸກຍູ້ການພັດທະນາຢູ່ເມືອງຜາອຸດົມແຂວງບໍ່ແກ້ວ, ໂດຍມີການນໍາຂອງແຂວງ, ເມືອງ ແລະ ປະຊາຊົນໃຫ້ການຕ້ອນຮັບຢ່າງອົບອຸ່ນ ແລະ ໄດ້ໃຫ້ກຽດໂອ້ລົມແນະນໍາໃຫ້ຄະນະພັກ-ຄະນະນໍາແຂວງ, ເມືອງ ເອົາໃຈໃສ່ວຽກງານພັດທະນາທະນາຊົນນະບົດ ແລະ ແກ້ໄຂຄວາມທຸກຍາກ ເປັນຕົ້ນການຈັດສັນທີ່ຢູ່ອາໃສ, ການຈັດສັນອາຊີບຄົງທີ່, ພັດທະນາສີມືແຮງງານໃຫ້ແກ່ຊາວໜຸ່ມ ແລະ ປະ

ຊາຊົນ ເພື່ອສາມາດສ້າງວຽກເຮັດງານທຳມີລາຍຮັບເພີ່ມຂຶ້ນ, ເອົາໃຈໃສ່ວຽກງານແກ້ໄຂຄວາມທຸກຍາກຂອງປະຊາຊົນໃຫ້ຫລຸດໜ້ອຍຖອຍລົງເປັນກ້າວໆ, ເພີ່ມທະວີວຽກງານຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆໃຫ້ມີປະສິດທິຜົນ, ຊຸກຍູ້ປະຊາຊົນເປັນເຈົ້າການເຄົາລົບລະບຽບກົດໝາຍ, ນັບຖືການຈັດຕັ້ງ, ສ້າງສະຕິຊາດ, ເອົາໃຈໃສ່ວຽກງານຮັກສາສຸຂະພາບຕາມຫລັກອະນາໄມ 3 ສະອາດ ແລະ ປັບປຸງລະບົບການເມືອງຢູ່ຮາກຖານໃຫ້ມີຄວາມໜັກແໜ້ນເຂັ້ມແຂງຂຶ້ນເທື່ອລະກ້າວ.

ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ຮັບຟັງລາຍງານວ່າ: ເມືອງຜາອຸດົມ ຍັງເປັນເມືອງທຸກຍາກຂອງແຂວງບໍ່ແກ້ວຢູ່ຫ່າງຈາກເທດສະບານແຂວງປະມານ 70 ກິໂລແມັດ, ມີເນື້ອທີ່ 1.889 ກິໂລຕາແມັດ, ເປັນເມືອງພູດອຍ, ແບ່ງອອກເປັນ 12 ກຸ່ມບ້ານພັດທະນາ, ມີ 66 ບ້ານ, ມີພົນລະເມືອງທັງໝົດ 42 ພັນກວ່າຄົນ ແລະ ປະກອບມີ 6 ຊົນເຜົ່າຄື: ລາວລຸ່ມ, ກຶມມຸ, ລະເມດ, ລື້, ມົ້ງ ແລະ ໄທດຳ. ປັດຈຸບັນ, ຍັງມີ 19 ບ້ານ ແລະ 2.000 ກວ່າຄອບຄົວທຸກຍາກ.